Post News Media ព័ត៌មានជាតិ មន្ទីររៀបចំដែ...

មន្ទីររៀបចំដែនដី នគររូបនីយកម្ម និងសំណង់ បើកសិក្ខាសាលាស្តីពីការរៀបចំប្លង់គោលប្រើប្រាស់ដី ស្រុកលំផាត់

ចែកចាយបន្ត

រតនគិរី: សិក្ខាសាលាពិគ្រោះយោបល់ស្តីពីការកសាងប្លង់គោល ប្រើប្រាស់ដីស្រុកលំផាត់ ត្រូវបានមន្ទីររៀបចំដែនដី នគររូបនីយកម្ម និងសំណង់ រៀបចំធ្វើឡើង នៅសាលប្រជុំ សាលាខេត្តរតនគិរី នាព្រឹកថ្ងៃទី២៣ ខែវិច្ឆិកា ឆ្នាំ២០១៦ ក្រោមអធិបតីភាព លោក ឌុច វនទីតូ អនុរដ្ឋលេខាធិការ តំណាងខ្ពង់ខ្ពស់ លោកទេសរដ្ឋមន្ត្រី ជា សុផារ៉ា រដ្ឋមន្ត្រី ក្រសួងរៀបចំដែនដីនគររូបនីយកម្ម និងសំណង់ និងលោក យឹម ផែន អភិបាលរងខេត្ត។

ថ្លែងបើកអង្គសិក្ខាសាលា លោក យឹម ផែន និងលោក ឌុច វនទីតូ បានលើកឡើងថា ការអនុវត្តគោលនយោបាយជាតិ ស្តីពីការរៀបចំដែនដីនៃព្រះរាជាណាចក្រកម្ពុជា និងការអនុវត្តគោលនយោបាយ វិមជ្ឈការ និងវិសហមជ្ឈការ ដែលជាផ្នែកមួយក្នុងការអនុវត្តយុទ្ធសាស្ត្រចតុកោណ ដំណាក់កាលទី៣ ដើម្បីកំណើនការងារសមធម៌ និងប្រសិទ្ធភាព របស់រាជរដ្ឋាភិបាលនីតិកាលទី៥នៃរដ្ឋសភា ការកសាង ប្លង់គោលប្រើប្រាស់ដី គឺជាការរួមចំណែកដ៏សំខាន់ក្នុងការជួយឲ្យសម្រេចបានទិសដៅអភិវឌ្ឍន៍ជាតិ។

លោក យឹម ផែន និងលោក ឌុច វនទីតូ បានបន្តថា ប្លង់គោល ប្រើប្រាស់ដីស្រុកលំផាត់ នៃខេត្តរតនគិរី ជាផ្នែកមួយ ជំរុញឲ្យតំបន់ភូមិភាគឥសាន ដែលជាតំបន់ កន្ទុយនាគ ក្លាយជាប៉ូលសេដ្ឋកិច្ចទី៤តាមរយ:សក្តានុពល ដីមានជីវជាតិ សម្បូរធនធានធម្មជាតិ រួមផ្សំនឹងកត្តាភូមិសាស្ត្រ ទៅជាការអភិរក្ស និងការអភិវឌ្ឍន៍ប្រកបដោយចីរភាព។

តាមរយ:ការសិក្សាប្លង់គោលប្រើប្រាស់ដីស្រុកលំផាត់ឆ្នាំ២០៣០ អាចចាត់ទុកថា ភូមិសាស្ត្រស្រុកលំផាត់ ខេត្តរតនគិរី គឺជាស្រុកដែលមានលក្ខណ:យុទ្ធសាស្ត្រល្អ មិនត្រឹមតែសម្រាប់ជំរុញការអភិវឌ្ឍន៍ស្រុកផ្ទាល់ប៉ុណ្ណោះទេ គឺថែមទាំង សមាហរណកម្មជាមួយបណ្តាស្រុកពាក់ពាន់ក្នុងខេត្តទៀតផង តាមរយ:ការអភិវឌ្ឍន៍វិស័យទេសចរណ៍ វិស័យកសិកម្ម កសិឧស្សាហកម្ម ធនធានរ៉ែ និងការបើកច្រកចេញចូលទៅកាន់តំបន់ជុំវិញស្រុកសម្រាប់ទំនាក់ទំនងសេដ្ឋកិច្ចឲ្យមានប្រសិទ្ធភាព។

លោក បានផ្តាំផ្ញើដល់សិក្ខាកាមទាំងអស់ចូលរួមពិភាក្សាឲ្យបានផុសផុលទៅលើចំណុចចំនួន៣សំខាន់ៗ ទី១. ចក្ខុវិស័យសម្រាប់ស្រុកលំផាត់ ទី២. យុទ្ធសាស្ត្រសម្រាប់ការអភិវឌ្ឍន៍ស្រុក ទី ៣. ផែនទីប្រើប្រាស់ដីស្រុកលំផាត់ដល់ឆ្នាំ២០៣០ ដើម្បីឲ្យឯកសារប្លង់គោលស្រុកលំផាត់ មានខ្លឹមសារគ្រប់ជ្រុងជ្រោយ អាចទទួលយកបាន និងយកទៅអនុវត្តមានប្រសិទ្ធភាព៕

សិក្ខាសាលាស្តីពីការរៀបចំប្លង់គោល

សិក្ខាសាលាស្តីពីការរៀបចំប្លង់គោល

សិក្ខាសាលាស្តីពីការរៀបចំប្លង់គោល