Post News Media ព័ត៌មានជាតិ ឃាត់ខ្លួនជនសង...

ឃាត់ខ្លួនជនសង្ស័យ៧នាក់ ព្រមទាំងដកហូតថ្នាំញៀន៣កញ្ចប់ និងម៉ូតូ៣គ្រឿង

ចែកចាយបន្ត

ភ្នំពេញ: សមត្ថកិច្ចខណ្ឌជ្រោយចង្វា បានធ្វើការឃាត់ខ្លួនជនសង្ស័យប្រើប្រាស់គ្រឿងញៀចំនួន៧នាក់ជាបន្តបន្ទាប់ ព្រមទាំងបានដកហូតថ្នាំញៀន៣កញ្ចប់ និងម៉ូតូ៣គ្រឿង កាលពីវេលាម៉ោង ២និង៣០នាទីរសៀល ថ្ងៃទី២៣ ខែវិចិ្ឆកា ឆ្នាំ២០១៦ ដែលស្ថិតនៅមុខចំណុចវត្តគៀនឃ្លាំង តាមបណ្តោយផ្លូវជាតិលេខ៦ ភូមិគៀនឃ្លាំង សង្កាត់ជ្រោយចង្វា ខណ្ឌជ្រោយចង្វា។

សមត្ថកិច្ចបានឲ្យដឹងថា ជនសង្ស័យទាំង៧នាក់ ទី១-ឈ្មោះ រី សារ៉ាត់ ភេទប្រុស អាយុ២៨ឆ្នាំ មុខរបរនៅផ្ទះ ទី២-ឈ្មោះ ហុង ដាវីន ភេទប្រុស អាយុ១៧ឆ្នាំ មុខរបរ កម្មករផ្សារដែក បច្ចុប្បន្នអ្នកទាំង២នាក់ មានទីលំនៅភូមិព្នៅកើត ឃុំព្រែកចាស្រុកជើងព្រៃ ខេត្តកំពង់ចាម។ ទី៣-ឈ្មោះ ពិសិដ្ឋ កក្កដា ភេទប្រុស អាយ២៩ឆ្នាំ មុខរបររត់ម៉ូតូឌុប មានទីលំនៅភូមិ២១ សង្កាត់ស្រះចក ខណ្ឌដូនពេញ ទី៤-ឈ្មោះ រ៉ា សុផល ភេទប្រុស អាយុ២២ឆ្នាំ មុខរបរនៅផ្ទះ ទី៥-ឈ្មោះ រ៉ុម ភារិទ្ធ ភេទប្រុស អាយុ២២ឆ្នាំ មុខរបររត់ម៉ូតូឌុប បច្ចុប្បន្នអ្នកទាំង២នាក់ មានទីលំនៅភូមិតាស្គរ ឃុំសារិកាកែវ ស្រុកល្វាឯម ខេត្តកណ្តាល។ ទី៦-ឈ្មោះ ណាត់ កុសល ភេទប្រុស អាយុ១៨ឆ្នាំ មុខរបរសន្តិសុខ មានទីលំនៅផ្ទះជួល ខណ្ឌទួលគោក និងទី៧-ឈ្មោះ ម៉ៃ ប៊ុនធឿន ភេទប្រុស អាយុ១៦ឆ្នាំ មុខរបរ មិនពិតប្រាកដ មានទីលំនៅភូមិកោះដាច់ សង្កាត់កោះដាច់ ខណ្ឌជ្រោយចង្វា ហើយសមត្ថកិច្ចបានដកហូតថ្នាំញៀន៣កញ្ចប់ និងម៉ូតូ៣គ្រឿង។

សមត្ថកិច្ចបន្តថា នៅរសៀលថ្ងៃទី២៣ ខែវិចិ្ឆកា កម្លាំងសមត្ថកិច្ចបានដាក់គោលដៅត្រួតពិនិត្យច្បាប់ចរាចរណ៍ តាមបណ្តោយផ្លូវជាតិលេខ៦ ខណ:ពេលកំពុងតែត្រួតពិនិត្យ ស្រាប់តែប្រទះឃើញជនសង្ស័យទាំង៧នាក់ ហើយសមត្ថកិច្ចបានឃាត់ខ្លួនជាបន្តបន្ទាប់ ព្រមទាំងបានដកហូតបានម្សៅក្រាមពណ៌(ស)ថ្លា ចំនួន ៣កញ្ចប់ ជាប្រភេទ ម៉ាកទឹកកក និងម៉ូតូ ៣គ្រឿង យកទៅអធិការដ្ឋាននគរបាលខណ្ឌ ដើម្បីធ្វើការសាកសួរ។

ក្រោយពីធ្វើការសាកសួររួចមក ជនសង្ស័យខាងលើបានសារភាពថា ពួកគេបាននាំគ្នាទៅទិញថ្នាំញៀននៅម្តុំរោងចក្រឆ្នាំង ដែលស្ថិតនៅក្នុងសង្កាត់បឹងកក់២ ខណ្ឌទួលគោក ដោយទិញក្នុង ១កញ្ចប់តម្លៃ ៣០០០០ម៉ឺនរៀល ដើម្បីយកមកប្រើប្រាស់នៅស្រុកកំណើត។ សូមបញ្ជាក់ថា ទីតាំងនៅម្តុំរោងចក្រឆ្នាំងនេះ គឺជាតំបន់ដែលចែកចាយគ្រឿងញៀនដូចទំនិញក្នុងផ្សារ ដូចជាមិនខ្លាចសមត្ថកិច្ចសូម្បីតែបន្តិចសោះឡើយ។

បច្ចុប្បន្ន ជនសង្ស័យទាំង៧នាក់ខាងលើ រួមនឹងវត្ថុតាង ត្រូវសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿង បញ្ជូនទៅកាន់តុលាការចាត់ការបន្តតាមផ្លូវច្បាប់៕

គ្រឿងញៀន

គ្រឿងញៀន