ប្រជាពលរដ្ឋ៖ ...

ប្រជាពលរដ្ឋ៖ ផ្លូវជាតិលេខ៦Aធ្វើជាប់រហូត ដូចពាក្យលោកព្រហ្ម ម៉ាញបាននិយាយ

ចែកចាយបន្ត

ភ្នំពេញៈ ប្រជាពលរដ្ឋរស់នៅក្នុងខណ្ឌជ្រោយចង្វា បានធ្វើការរិះគន់យ៉ាងចំៗថា ការស្ថាបនាផ្លូវជាតិលេខ៦Aមិនមានគុណភាពសោះ ពោលគឺខូចខាតខ្ទេចខ្ទី និងជួសជុលជាប់រហូត ដូចពាក្យលោកព្រហ្មម៉ាញបាននិយាយក្នុងពេលសម្តែងអាយ៉ៃអញ្ចឹងដែរ។ ការសម្តែងការរិះគន់ពីសំណាក់ប្រជាពលរដ្ឋ ពាក់ព័ន្ធនឹងផ្លូវជាតិលេខ៦Aនេះ ធ្វើឡើងកាលព្រឹកថ្ងៃ២៤ វិច្ឆិកា ក្នុងវេទិកាសាធារណៈរបស់ក្រុមប្រឹក្សារាជធានីភ្នំពេញ នៅក្នុងផ្សាររុងរឿង ស្ថិតក្នុងតំបន់អភិវឌ្ឍន៍ជ្រាយចង្វា ខណ្ឌជ្រោយចង្វា ក្រោមអធិបតីភាពលោក ជួប ខុនតំណាង លោកម៉ប់ សារិន ប្រធានក្រុមប្រឹក្សារាជធានីភ្នំពេញ លោកស៊ុយ សេរិទ្ធ អភិបាលរងរាជធានីភ្នំពេញ និងមានការចូលរួមពីមន្ទីរ អាជ្ញាធរដែនដី រួមនឹងប្រជាពលរដ្ឋរាប់រយនាក់ផងដែរ។

ប្រជាពលរដ្ឋបានលើកឡើងថា ការស្ថាបនាផ្លូវជាតិលេខ៦A ហាក់មិនមានគុណភាពទាល់តែសោះ ប្រើប្រាស់មិនបានប៉ុន្មានផងខូចខាតខ្ទេចខ្ទី និងជួសជុលជាប់រហូត ដូចពាក្យលោកព្រហ្ម ម៉ាញបាននិយាយក្នុងពេលសម្តែងអាយៃអញ្ចឹងដែរ។ ពួកគាត់ចោទសួរថា ហេតុអ្វីបានជាការស្ថាបនាផ្លូវនេះមិនមានគុណភាព បណ្តាលមកពីអ្វី? ពួកគាត់ពិតជាមានការងឿងឆ្ងល់ខ្លាំងណាស់ និងបានសូមឲ្យមន្ទីរពាក់ព័ន្ធ ពិសេសមន្ទីរសាធារណការ និងដឹកជញ្ជូនរាជធានីភ្នំពេញធ្វើការបកស្រាយឲ្យពួកគាត់បានអស់ចម្ងល់ផង។

ក្នុងវេទិការសាធារណៈនោះ លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញបានលើកឡើងថា ចំពោះផ្លូវជាតិលេខ៦Aដែលទទួលរងការខូចខាតញឹកញាប់ ជួសជុលជាប់រហូតនោះ វាផ្តើមចេញពីមូលហេតុ ៣ចំណុច ក្នុងនោះរួមមាន ទី១. ផ្លូវខាងលើត្រូវបានបំផ្លាញដោយរថយន្ត ដឹកដែក ស៊ីម៉ង់តិ៍ ដឹកលើសទម្ងន់ ទី២. មកពីមានការដក់ទឹកនៅលើផ្លូវជាប្រចាំនៅក្នុងរដូវវស្សា និងទី៣. បណ្តាលមកពីទឹកជ្រាបពីសួនច្បារនៅកណ្តាលទ្រូវផ្លូវនេះតែម្តង។

លោកបន្តថា ផ្លូវជាតិលេខ៦Aនេះ មន្ទីរសាធារណការ និងដឹកជញ្ជូនរាជធានីភ្នំពេញនឹងធ្វើការជួសជុលភ្លាមៗជាថ្មីម្តងទៀត ប៉ុន្តែលោកបានបញ្ជាក់ប្រាប់ទៅប្រជាពលរដ្ឋផងដែរថា ក្រោយការជួសជុលមិនបានប៉ុន្មានទេផ្លូវនេះនឹងខូចវិញទៀតហើយ ពោលគឺគ្រាន់តែធ្វើការជួសជុលបណ្តោះអាសន្នប៉ុណ្ណោះ។ លោកថា ជាទិសដៅ ដែលមានការឯកភាពពីសាលារាជធានីភ្នំពេញហើយនោះ ផ្លូវជាតិលេខ៦Aនឹងធ្វើការស្ថាបនាជាថ្មីនៅកន្លែងដែលឧស្សាហ៍ខូចជាងមួយពាន់ម៉ែត្រ នៅម្តុំមុខវត្តគៀនឃ្លាំង ដោយត្រូវស្ថាបនា ចាក់គ្រឹះថ្ម រួចចាក់ជាបេតុង ទើបអ៊ុតកៅស៊ូពីលើ ធ្វើបែបនេះផ្លូវខាងលើនឹងមានភាពមាំ ប្រើប្រាស់បានយូរអង្វែងលែងខូចខាតទៀតហើយ។

លោក សាំ ពិសិដ្ឋ ក៏បានបញ្ជាក់ផងដែរថា សម្រាប់រាជធានីភ្នំពេញ ជាទិសដៅនៅពេលដ៏ខ្លីខាងមុខនេះ រដ្ឋបាលរាជធានីភ្នំពេញ នឹងធ្វើយុទ្ធនាការជួសជុល ស្ថាបនាផ្លូវចំនួន៥៤ខ្សែ ដែលមានប្រវែង៧៣គីឡូម៉ែត្រ ដើម្បីសម្រួលចរាចរប្រជាពលរដ្ឋជាអ្នកដំណើរ និងដើម្បីជាការលើកសោភ័ណភាពរាជធានីភ្នំពេញផងដែរ៕

ផ្លូវជាតិលេខ៦Aធ្វើជាប់រហូត

ផ្លូវជាតិលេខ៦Aធ្វើជាប់រហូត

ផ្លូវជាតិលេខ៦Aធ្វើជាប់រហូត

ផ្លូវជាតិលេខ៦Aធ្វើជាប់រហូត

ផ្លូវជាតិលេខ៦Aធ្វើជាប់រហូត

ផ្លូវជាតិលេខ៦Aធ្វើជាប់រហូត

ផ្លូវជាតិលេខ៦Aធ្វើជាប់រហូត

ចែកចាយបន្ត