សមត្ថកិច្ចចាប...

សមត្ថកិច្ចចាប់ខ្លួនបក្ខពួកដែលកាប់ប្លន់យកម៉ូតូជនរងគ្រោះបានម្នាក់ទៀតហើយ

ចែកចាយបន្ត

ភ្នំពេញៈ សមត្ថកិច្ចខណ្ឌឬស្សីកែវ បានធ្វើការបង្ក្រាបបក្ខពួកក្រុមចោរកាប់ប្លន់ដែលនៅសល់បានម្នាក់ទៀតហើយ កាលពីវេលាម៉ោង១រំលងអាធ្រាត ថ្ងៃទី២៤ ខែវិចិ្ឆកា ឆ្នាំ២០១៦ ដែលស្ថិតនៅក្រុម៩ ភូមិទួលគោក សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។

ជនសង្ស័យឈ្មោះ ស្វាយ មាន ភេទប្រុស អាយុ ២០ឆ្នាំ មុខរបរ មិនពិតប្រាកដ មានទីលំនៅផ្ទះជួល ម្តុំរង្វង់មូលកាំកូ ស្ថិតនៅក្នុងសង្កាត់ទួលសង្កែ ខណ្ឌឬស្សីកែវ ។ចំណែកឯជនរងគ្រោះឈ្មោះ គ្រុយ ហស្ស ភេទប្រុស អាយុ ១៨ឆ្នាំ មុខរបរ លក់ដូរ ស្នាក់នៅផ្ទះលេខ៥០ ផ្លូវលេខ១១១ សង្កាត់អូរឬស្សីទី១ ខណ្ឌ៧មករា។

សមត្ថកិច្ចបានប្រាប់ឲ្យដឹងថា នៅយប់ថ្ងៃទី២៤ ខែវិចិ្ឆកា កម្លាំងសមត្ថកិច្ចយើងបានធ្វើការជិះល្បាតនៅក្នុងមូលដ្ឋាន ខណៈពេលជិះល្បាត ស្រាប់តែឃើញជនសង្ស័យបានចេញពីក្លឹបកម្សាន្ត មួយកន្លែង យីហោ ម៉ារីន ដែលនៅម្តុំរង្វង់មូលកាំកូ ស្ថិតនៅក្នុងភូមិទួលគោក សង្កាត់ទួលសង្កែ ដោយដេញកាប់គ្នានៅមុខក្លិបនោះ ភ្លាមៗនោះ ក៏ត្រូវកម្លាំងសមត្ថកិច្ចយើងធ្វើការឃាត់ខ្លួន និងឆែកឆេររកឃើញដាវសាំម៉ូរ៉ៃ មួយដើម ហើយសមត្ថកិច្ចយើងបានឃាត់ខ្លួនយកមកប៉ុស្តិ៍នគរបាលរដ្ឋបាលទួលសង្កែ ដើម្បីធ្វើការសាកសួរ។

ក្រោយពីធ្វើការសាកសួររួចមក ជនសង្ស័យបានសារភាពថា ខ្លួនហើយនិងបក្ខពួក ៧នាក់ទៀតពិតជាបានធ្វើសកម្មភាពកាប់ប្លន់យកម៉ូតូរបស់ជនរងគ្រោះពិតប្រាកដមែន។

គួររំលឹកផងដែរថា ក្រុមចោរទាំងនេះ គឺមានគ្នា ៨នាក់បានធ្វើសកម្មភាពកាប់ប្លន់យកម៉ូតូពីជនរងគ្រោះម៉ាក ហុងដាឌ្រីសង់ សេ១២៥ សេរី២០១៣ ពណ៌ខ្មៅ ពាក់ស្លាកលេខ ភ្នំពេញ 1E-2264 កាលពីវេលាម៉ោង ១រំលងអាធ្រាតឈានចូលថ្ងៃទី១៥ ខែសីហា ឆ្នាំ២០១៦ នៅត្រង់ចំណុចមុខណេត៨៩ តាមបណ្តោយផ្លូវជាតិលេខ៥ ស្ថិតក្នុងភូមិផ្សារតូច សង្កាត់ទួលសង្កែ ខណ្ឌឬស្សីកែវ បានបណ្តាលឲ្យជនរងគ្រោះរងរបួស ចំណែកឯបក្ខពួកជនសង្ស័យផ្សេងទៀត ត្រូវបានសមត្ថកិច្ចធ្វើការបង្ក្រាបបានហើយ។

បច្ចុប្បន្នជនសង្ស័យខាងលើ រួមនឹងវត្ថុតាង ត្រូវសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឬស្សីកែវ ដើម្បីកសាងសំណុំរឿង បញ្ជូនទៅកាន់តុលាការ ចាត់ការតាមផ្លូវច្បាប់៕

photo_2016-11-24_21-46-23

photo_2016-11-24_21-46-25

photo_2016-11-24_21-46-27

photo_2016-11-24_21-46-29

photo_2016-11-24_21-46-32

photo_2016-11-24_21-46-34

ចែកចាយបន្ត