មន្ត្រី​កាំកុ...

មន្ត្រី​កាំកុងត្រូល​ ចុះ​ត្រួត​ពិនិត្យ​គុណភាព​ទំនិញ​នៅ​ផ្សា​របឹង​ត្រកួន​ជាប់​ព្រំដែន​ថៃ

ចែកចាយបន្ត

បន្ទាយមានជ័យៈ ក្នុងប្រតិបត្តិការចុះត្រួតពិនិត្យគុណភាពទំនិញ ផ្សារបឹងត្រកួន ក្នុងភូមិបឹងត្រកួន ឃុំគោករមៀត ស្រុកថ្មពួក ខេត្តបន្ទាយមានជ័យ ពីសំណាក់សមត្ថកិច្ចចម្រុះ ដឹកនាំដោយសាខាកាំកុងត្រូលខេត្តបន្ទាយមានជ័យ កាលពីថ្ងៃទី២៤ ខែវិច្ឆិកា ឆ្នាំ២០១៦ គឺមិនបានដកហូត ឬរកឃើញទំនិញខូចគុណភាពអ្វីឡើយ។

លោក ហុង លៀង អនុប្រធានទី១ សាខាកាំកុងត្រូលខេត្តបន្ទាយមានជ័យ ទទួលបន្ទុកស្ថិតិទីផ្សារបានឲ្យដឹងថា អនុវត្តតាមផែនការណែនាំរបស់លោក ស៊ាន ស៊ីណាត ប្រធានសាខាកាំកុងត្រូលខេត្តបន្ទាយមានជ័យ ក៏ដូចជា ដើម្បីធានាបាននូវគុណភាពទំនិញ ម្ហូបអាហារ លើទីផ្សារក្នុងខេត្តបន្ទាយមានជ័យ លោកបានដឹកនាំមន្ត្រីរបស់លោកសហការជាមួយ ប៉ូលិសសេដ្ឋកិច្ចក្រសួង-ខេត្ត មន្ត្រីមន្ទីរពាណិជ្ជកម្មខេត្ត សមត្ថកិច្ចមូលដ្ឋាន ចុះធ្វើការត្រួតពិនិត្យគុណភាពទំនិញក្នុងទីផ្សារបឹងត្រកួន ដែលជាផ្សារមួយស្ថិតនៅចុងកាត់មាត់ញក ជាប់ព្រំប្រទល់កម្ពុជា ថៃ។

លោកបន្តថា បន្ទាប់ពីមន្ត្រីជំនាញកាំកុងត្រូលខេត្តបន្ទាយមានជ័យ ឧស្សាហ៍ធ្វើការ ចុះត្រួតពិនិត្យ អប់រំណែនាំ តាមបណ្ដាទីផ្សារនានា ក្នុងខេត្តបន្ទាយមានជ័យ បច្ចុប្បន្ន អាជីវករលក់ដូរ ក្នុងផ្សារបឹងត្រកួននេះ មានការយល់ដឹងច្រើន ពីគុណភាពម្ហូបអាហារ ទំនិញផ្សេងៗ ដែលហួសកាលបរិច្ឆេទ ឫច្បាប់ហាមឃាត់ ពោលគឺពួកគាត់មិនមាន ការដាក់លក់ នៅទំនិញទាំងនោះឡើយ៕

police-2

police-1

ចែកចាយបន្ត