Post News Media ព័ត៌មានជាតិ អង្គការ API ន...

អង្គការ API និងដៃគូពាក់ព័ន្ធ រៀបចំកិច្ចប្រជុំពិគ្រោះយោបល់ពហុភាគី ស្តីពីសុវត្ថិភាពចរាចរណ៍ផ្លូវគោកនៅកម្ពុជា

ចែកចាយបន្ត

ភ្នំពេញ: ដើម្បីដោះស្រាយបញ្ហាគ្រោះថ្នាក់ចរាចរណ៍នៅក្នុងប្រទេសកម្ពុជា នាពេលបច្ចុប្បន្ននេះ អង្គការ API និងដៃគូពាក់ព័ន្ធរួមមាន ស្ថាប័នរដ្ឋាភិបាល អង្គការមិនមែនរដ្ឋាភិបាល និងស្ថាប័នផ្សព្វផ្សាយ បានបើកកិច្ចប្រជុំពិគ្រោះយោបល់មួយ ស្តីពីសុវត្ថិភាពចរាចរណ៍ផ្លូវគោកនៅកម្ពុជា និងស្វែងរកយុទ្ធសាស្ត្រលុបបំបាត់បញ្ហាប្រឈមនៃការអនុវត្តច្បាប់ចរាចរណ៍ផ្លូវគោកថ្មី។ កម្មវិធីនេះ បានធ្វើឡើងរយ:ពេល១ថ្ងៃគឺថ្ងៃទី២៩ ខែវិច្ឆិកា ឆ្នាំ២០១៦ នៅសណ្ឋាគារ អ៊ីនធឺខនធីណង់តាល់ ក្រោមអធិបតីភាព ឯកឧត្តម តូច ចាន់កុសល អនុរដ្ឋលេខាធិការក្រសួងសាធារណ:ការ និងដឹកជញ្ជូន និងជាអនុប្រធានគណ:កម្មាធិការជាតិសុវត្ថិភាពចរាចរណ៍ផ្លូវគោក។

លោក ណែប ស៊ីនថៃ នាយកអង្គការ API បានមានប្រសាសន៍ថា កិច្ចប្រជុំនៅថ្ងៃនេះ មានគោលបំណងឲ្យភាគីពាក់ព័ន្ធទាំងថ្នាក់ជាតិ ថ្នាក់មូលដ្ឋាន និងអង្គការដៃគូ ចូលរួមពិភាក្សាគ្នាយ៉ាងផុសផុល ដើម្បីរកនូវចំណុចខ្វះចន្លោះនៃការអនុវត្តច្បាប់ និងជំរុញឲ្យមានការអនុត្តច្បាប់ចរាចរណ៍ថ្មីនេះប្រកបដោយប្រសិទ្ធភាព សម្តៅកាត់បន្ថយជាអតិបរិមានៃអត្រាគ្រោះថ្នាក់ចរាចរណ៍។

លោក តូច ចាន់កុសល បានថ្លែងថា នៅក្នុងឆ្នាំ២០១៥មានពលរដ្ឋខ្មែរស្លាប់ដោយសារគ្រោះថ្នាក់ចរាចរណ៍ចំនួន ២ ២៣១នាក់ និងរងរបួសចំនួន ៥ ៤៥០នាក់ ដែលមានតួលេខអ្នកស្លាប់មានចំនួនច្រើនជាងការស្លាប់ដោយមេរោគអេដស៍ និងគ្រោះដោយសារមីនទៅទៀត។ លោកបន្តថា កម្ពុជាបានខាតបង់ថវិកា ជាច្រើនពាន់លានរៀលក្នុង១ឆ្នាំៗដោយសារគ្រោះថ្នាក់ចរាចរណ៍ ដែលមិនរាប់បញ្ចូលបញ្ហា ជាផលវិបាកសង្គមដែលបន្សល់ពីបញ្ហាគ្រោះចរាចរណ៍នេះ រួមមាន ស្រីមេម៉ាយ ក្មេងកំព្រា ជនពិការ ជាដើម។ លោក សង្ឃឹមថា កិច្ចប្រជុំពិភាក្សានៅថ្ងៃនេះ នឹងបានចូលរួមចំណែកក្នុងការសម្រេចឲ្យបាននូវ គោលនយោបាយជាតិស្តីពី សុវត្ថិភាពចរាចរណ៍ផ្លូវគោក ២០១១-២០២០ ដែលរាជរដ្ឋាភិបាលប្តេជ្ញាកាត់បន្ថយគ្រោះថ្នាក់ចរាចរណ៍ឲ្យបាន៥០%នៅបំណាច់ឆ្នាំ២០២០។

បើយោងតាមសេចក្តីថ្លែងការរួមរបស់ស្ថាប័នពាក់ព័ន្ធដែលធ្វើការលើវិស័យសុវត្ថិភាពចរាចរណ៍ផ្លូវគោកនៅកម្ពុជាបានឲ្យដឹងថា យ៉ាងហោចណាស់មានពលរដ្ឋខ្មែរស្លាប់ចំនួន ៦នាក់ និងរងរបួសធ្ងន់ចំនួន ១៧នាក់ ក្នុងមួយថ្ងៃៗដោយសារតែគ្រោះថ្នាក់ចរាចរណ៍។

របាយការណ៍របស់គណ:កម្មាធិការសុវត្ថិភាពចរាចរណ៍ផ្លូវគោកបានបង្ហាញថា នៅក្រោយពេលដែលរដ្ឋាភិបាលកម្ពុជាបានដាក់ចេញ ឲ្យអនុវត្តនូវច្បាប់ចរាចរណ៍ផ្លូវគោកថ្មី កាលពីថ្ងៃទី១ ខែមករា ឆ្នាំ២០១៦ មក នៅក្នុងរយ:ពេល១១ខែនៃឆ្នាំ២០១៦នេះ ការគោរពច្បាប់ចរាចរណ៍របស់ពលរដ្ឋខ្មែរហាក់មានការកើនឡើង ជាពិសេសការបើកបរទោចក្រយានយន្តពាក់ពួកសុវត្ថិភាព គឺមានចំនួន ៩០%។ ទោះយ៉ាងណា របាយការណ៍នៅតែបង្ហាញថា បញ្ហាគ្រោះថ្នាក់ចរាចរណ៍នៅតែកើតឡើងគួរឲ្យព្រួយបារម្ភនៅឡើយ ដោយកត្តាមនុស្សចំនួន ៩៥% ដូចជា: ១.ការបើកបរលើសល្បឿនកំណត់ ២.ការបើកបរក្រោមឥទ្ធិពលនៃគ្រឿងស្រវឹង និង៣.ការមិនពាក់មួកសុវត្ថិភាព ឬខ្សែក្រវ៉ាត់សុវត្ថិភាពក្នុងពេលបើកបរ៕

កិច្ចប្រជុំស្តីពីគ្រោះថ្នាក់ចរាចរណ៍

កិច្ចប្រជុំស្តីពីគ្រោះថ្នាក់ចរាចរណ៍

កិច្ចប្រជុំស្តីពីគ្រោះថ្នាក់ចរាចរណ៍

កិច្ចប្រជុំស្តីពីគ្រោះថ្នាក់ចរាចរណ៍