ដឹកស្វាយពីបាត...

ដឹកស្វាយពីបាត់ដំបងទៅលក់វៀតណាម មកធ្លាក់ចូលទឹកនៅព្រៃវែង

ចែកចាយបន្ត

ព្រៃវែងៈ រថយន្តម៉ាកហ៊ីយ៉ាន់ដាយ១គ្រឿង បានបើកធ្លាក់ទឹកបណ្ដាលឲ្យជះផ្លែស្វាយអណ្ដែតព្រោងព្រាត​ កាលពីវេលាម៉ោង៨និង១០នាទីព្រឹក ថ្ងៃទី៣០ ខែវិច្ឆិកា ឆ្នាំ២០១៦ ត្រង់ចំណុចផ្លូវជាតិលេខ៨ ភូមិគគរ ឃុំកំពង់ពពិល ស្រុកពារាំង ខេត្តព្រៃវែង។

សមត្ថកិច្ចមូលដ្ឋានបានប្រាប់ឲ្យដឹងថា អ្នកបើកបររថយន្ត ឈ្មោះ វួង វឹង អាយុ៥៦ឆ្នាំ ជនជាតិវៀតណាម រស់នៅភូមិថ្មគោល ឃុំថ្មគោល ស្រុកល្វាឯម ខេត្តកណ្ដាល ជាម្ចាស់រថយន្ត បានបើករថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ ឃ-១២៥៥ព២ ដឹកស្វាយពេញ ក្នុងទិសដៅពីលិចមកកើត ពីខេត្តបាត់ដំបង ទៅវៀតណាម។ សមត្ថកិច្ចបន្តថា លុះមកដល់ចំណុចកើតហេតុ អ្នកបើកបរបានងងុយដេកមួយភាំង ស្រាប់តែជ្រុលចង្កូត ធ្លាក់មកខាងត្បូងផ្លូវ ចូលទឹកតែម្ដងបណ្ដាលឲ្យជះស្វាយចោលអណ្ដែតពេញទឹក ចំណែករថយន្តរងនូវការខូចខាតស្ទើរទាំងស្រុង។ សមត្ថកិច្ចបញ្ជាក់ថា ម្ចាស់រថយន្តនិងអ្នករួមដំណើរម្នាក់មិនបានរងរបួសទេ។

ក្រោយពេលកើតហេតុ ម្ចាស់រថយន្តបានប្រមូលផ្លែស្វាយដើម្បីសាងឡាន និងរករថយន្តស្ទូចផងដែរ៕

ចែកចាយបន្ត