ក្របួចចោរលួចម...

ក្របួចចោរលួចម៉ូតូ ស្វាគមន៍យ៉ាងចាស់ដៃ រួច​ប្រគល់ឲ្យ​សមត្ថកិច្ច

ចែកចាយបន្ត

ភ្នំពេញៈ ជនសង្ស័យម្នាក់ បានធ្វើសកម្មភាពលួចម៉ូតូមួយគ្រឿងតែមិនសម្រេច ព្រោះម្ចាស់ឃើញទាន់ស្រែកឆោឡោ បង្កការភ្ញាក់ផ្អើលនាំគ្នាដេញចាប់វាយមួយដៃមួយជើងទ្រមខ្លួន រួចប្រគល់ឱ្យសមត្ថកិច្ច។

ករណីនេះ បានកើតឡើងកាលពីវេលាម៉ោង៧និង៣០នាទីព្រឹកថ្ងៃទី២ ខែធ្នូ ឆ្នាំ២០១៦ នៅត្រង់ចំណុចមុខផ្ទះលេខ៦៤៤ ផ្លូវបេតុង ក្រុម៥ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។

ជនសង្ស័យឈ្មោះ ស្ងួន វុទ្ធី ភេទប្រុស អាយុ២៩ឆ្នាំ មុខរបរ មិនពិតប្រាកដ ស្នាក់នៅបន្ទប់ជួល ក្រុម៤ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ ។ ចំណែកម្ចាស់ម៉ូតូឈ្មោះ ស្រី ឆេងហួន ភេទប្រុស អាយុ៣៣ឆ្នាំ មុខរបរ លក់ដូរ ស្នាក់នៅផ្ទះលេខ៦៤៤ ក្រុម៥ ភូមិក្រោនគោ សង្កាត់គីឡូម៉ែតលេខ៦ ខណ្ឌឫស្សីកែវ រាជធានីភ្នំពេញ។

សមត្ថកិច្ចបានឲ្យដឹងថា នៅមុនពេលកើតហេតុជនរងគ្រោះបានទុកម៉ូតូនៅខាងមុខផ្ទះ ហើយបានដើរចូលទៅក្នុងផ្ទះរួចបិទទ្វារ ដោយជាប់រវល់លាងចាននៅក្នុងផ្ទះ។ មួយសន្ទុះក្រោយមក ក៏ឃើញជនសង្ស័យម្នាក់ដើរមកជិតម៉ូតូរបស់ខ្លួនម៉ាក សង់កូរ៉េ ពណ៌ខៀវ ពាក់ស្លាកលេខ ភ្នំពេញ 1BM-7630 ហើយធ្វើសកម្មភាពលួចយកម៉ូតូបណ្តើរបានបន្តិច ក៏គាត់ឃើញតាមកញ្ចក់ទ្វារ ហើយរត់ចេញពីក្នុងផ្ទះ ស្រែកផ្អើសឆោឡោបង្កឲ្យមានការភ្ញាក់ផ្អើលដល់អ្នកជិតខាង ក៏នាំគ្នាដេញតាមចាប់វាយមួយដៃមួយជើងម្នាក់ទ្រមខ្លួន រួចប្រគល់ឲ្យសមត្ថកិច្ចប៉ុស្តិ៍នគរបាលរដ្ឋបាលគីឡូម៉ែត្រលេខ៦ ដើម្បីសាកសួរ។

ក្រោយពីសមត្ថកិច្ចសាកសួរជនសង្ស័យខាងលើរួចរាល់ ហើយបានធ្វើឯកសារប្រគល់ម៉ូតូឲ្យទៅជនរងគ្រោះយកទៅផ្ទះវិញ។

បច្ចុប្បន្នជនសង្ស័យ ត្រូវសមត្ថកិច្ចកំពុងឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការបន្តតាមផ្លូវច្បាប់៕

photo_2016-12-02_15-36-41

photo_2016-12-02_15-36-43

photo_2016-12-02_15-36-44

photo_2016-12-02_15-36-45

ចែកចាយបន្ត