អាម៉ៃដែលរួចពី...

អាម៉ៃដែលរួចពីចំណង ពេលនេះចាប់បានវិញហើយ!…

ចែកចាយបន្ត

មណ្ឌលគិរីៈ សត្វដំរីឈ្មោលឈ្មោះអាម៉ៃ ដែលធ្លាប់មានប្រវត្តិចុះប្រេងជាន់សម្លាប់ហ្មរបស់វា និងបានរួចពីចំណងរត់ចូលព្រៃកាលពីថ្ងៃទី២៦ វិច្ឆិកា ចុងសប្ដាហ៍មុនកន្លងទៅនោះ បច្ចុប្បន្ននេះ ត្រូវបានម្ចាស់របស់វាតាមចាប់បានមកវិញហើយ នៅព្រឹកថ្ងៃទី២ ខែធ្នូ ឆ្នាំ២០១៦នេះ ត្រង់ចំណុចអង់ដែន០១២ ស្ថិតក្នុងភូមិពូក្រូច ឃុំស្រែអំពូម ស្រុកពេជ្រាដា ខេត្តមណ្ឌលគិរី។

លោក ពុក នៅ ជាជនជាតិភាគតិចព្នង និងជាគ្រួសារម្ចាស់សត្វដំរីឈ្មោះអាម៉ៃនេះ បានឲ្យដឹងថា វិធីសាស្ត្រក្នុងការចាប់សត្វដំរីនេះមកវិញ គឺនៅពេលដែលលោក និងហ្មរបស់អាមៃបានឃើញឱកាសល្អ គ្រាដែលវាកំពុងដើរស៊ីចំណីនោះ ក៏ចូលទៅចាប់យកច្រវ៉ាក់ ដែលចងជាប់នៅជើងសត្វដំរីនេះស្រាប់ ទៅរុំនៅគល់ឈើ បន្ទាប់មកលោកបានយកចំណីឲ្យវាស៊ី និងបានយកខ្សែ ព្រមទាំងច្រវ៉ាក់មកចងបន្ថែមនៅជើងមុខ-ក្រោយរបស់អាម៉ៃ កុំឲ្យវាមានឱកាសអាចរត់បាន ឬបង្កគ្រោះ ថ្នាក់ដល់អ្នកធ្វើដំណើរតាមដងផ្លូវ ក្រោយមកគឺបានឲ្យហ្មឡើងជិះលើខ្នងរបស់វា ដើម្បីងាយស្រួលក្នុងការបណ្ដើរវាមក សហគមន៍ជនជាតិវិញ នៅភូមិពលូង សង្កាត់រម្យនា ក្រុងសែនមនោរម្យ។

ម្ចាស់របស់វាបានឲ្យដឹងទៀតថា មូលហេតុដែល ធ្វើឲ្យសត្វដំរីនេះមានចរិតកាចសាហាវ និងព្រិចសម្លាប់ហ្មរបស់វា កាលពីពេលកន្លងទៅ គឺអាចបណ្ដាលមកពីមានដែក គោលមួយដើមមុតជាប់នៅប្រមោយរបស់វា ហើយក្រោយពីបានរកឃើញដែកគោលនោះ និងបានដកវាចេញពីប្រមោយរបស់អាម៉ៃ អាម៉ៃបានប្រែចរិតមកស្លូតបូតចាប់តាំងពីពេលនោះមកម្លេះ ហើយលោកជាម្ចាស់របស់វាអាចមើលដឹងនៅពេល ដែលវាកាច ដោយសង្កេតទៅលើត្រចៀករបស់វា នៅពេលដែលត្រចៀកវាប៉ោងចេញមកក្រៅទើបវាកាចសាហាវ ប៉ុន្តែទោះ បីជាវាបានស្លូតបូតវិញទៅហើយក្ដី ក៏ត្រូវតែប្រុងប្រយ័ត្នជាប់ជានិច្ច។

លោកឃុន ឌីយ៉ូន នាយកអង្គការ ELIEជាអង្គការគាំពារសត្វដំរីនៅខេត្តមណ្ឌលគិរីបានឲ្យដឹងដែរថា ទោះជាយ៉ាងណា ភាគីសមាគមន៍សត្វដំរីនៅខេត្តរតនគិរី ដែលព្រមព្រៀងទិញអាម៉ៃក្នុងតម្លៃ១ម៉ឺន៧ពាន់ដុល្លារនោះ និងនៅតែទទួលទិញអាម៉ៃយកទៅថែរក្សា ប៉ុន្តែត្រូវឲ្យហ្មថ្មីរបស់អាម៉ៃរស់នៅជាមួយវាឲ្យវាស្គាល់ច្បាប់សិន ទើបអាចយកវាទៅបាន ។

សូមបញ្ជាក់ថា អាម៉ៃ មានអាយុ២៨ឆ្នាំ ជាសត្វដំរីបម្រើលើវិស័យទេសចរណ៍នៅសហគមន៍ជនជាតិដើមភាគតិច នៅភូមិពូលុង សង្កាត់រម្យនា ក្រុងសែនមនោរម្យ ខេត្តមណ្ឌលគិរី ហើយវាបានវ័ធ និងជាន់សម្លាប់ហ្មរបស់វាឲ្យធ្លាយពោះវៀនស្លាប់ភ្លាមៗ មិនមានអ្នកណាហ៊ានចូលជួយឡើយ នៅចំណុចក្បែរអូរទេរ ក្នុងភូមិពូក្រូច ស្ថិតនៅឃុំស្រែអំពូម ស្រុកពេជ្រាដា ខេត្តមណ្ឌលគិរី តាមបណ្ដោយផ្លូវឆ្ពោះទៅរមណីដ្ឋានទឹកជ្រោះប៊ូស្រា កាលពីរសៀលថ្ងៃទី១៩ ខែកញ្ញា ឆ្នាំ២០១៦ ខណៈបុរសដែលជាហ្មដំរីរូបនោះ ព្យាយាមតាមទាក់ដំរីរបស់ខ្លួន ដែលកំពុងមានអារម្មណ៍ខឹងសម្បារ(ចុះប្រេង)ដេញវ័ធគេឯងតាមទីសាធារណៈ។ ហើយសត្វដំរីនេះ ត្រូវបានអ្នកជំនាញចាប់វាបានកាលពីថ្ងៃទី២១ ខែកញ្ញា ឆ្នាំ២០១៦ នៅចំណុច ដែលវាជាន់សម្លាប់ហ្មរបស់វានោះ ដោយអ្នកជំនាញបានប្រើវិធីយកសត្វដំរីញី៥ក្បាល មកធ្វើជាធ្នាក់ហៅសត្វដំរីចុះប្រេងនោះ បន្ទាប់មកគេបានបាញ់ថ្នាំសណ្ដំ២ម្ជុលទៅលើវា ទើបអាចចាប់វាបាន៕

អាម៉ៃ

អាម៉ៃ

អាម៉ៃ

ចែកចាយបន្ត