Post News Media ព័ត៌មានជាតិ រដ្ឋមន្ត្រី អ...

រដ្ឋមន្ត្រី អ៊ិត សំហេង សង្ឃឹមថា ទីម័រ នឹងសហការបន្ថែមលើជំនាញឯកទេស និងការផ្លាស់ប្តូរជំនាញសម្រាប់ទប់ស្កាត់រាល់ការបំពានលើពលករ

ចែកចាយបន្ត

ភ្នំពេញ: លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវ: នាព្រឹកថ្ងៃទី០៦ ខែតុលា ឆ្នាំ២០១៦នេះ បានអនុញ្ញតឲ្យលោកស្រី Felicidade de Sousa Guterres ឯកអគ្គរដ្ឋទូតនៃសាធារណរដ្ឋប្រជាធិបតេយ្យទីម័រឡេស្តេ ប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ។

ក្នុងជំនួបនោះ លោកស្រីបានសម្តែងនូវអំណរគុណនូវអ្វីដែលជាការចាប់ផ្តើមនូវកិច្ចសហប្រតិបត្តិប្រកបដោយភាពវិជ្ជមាន បន្ទាប់ពីដំណើរទស្សនកិច្ចជាផ្លូវការរបស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទៅកាន់ប្រទេសទីម័រឡេស្តេ កាលពីពាក់កណ្តាលខែសីហាកន្លងទៅ។ ពាក់ព័ន្ធនឹងកិច្ចសហប្រតិបត្តិការលើវិស័យការងារ និង   បណ្តុះបណ្តាលវិជ្ជាជីវ: ភាគីទាំងពីរនឹងចាប់ផ្តើមអនុវត្តនូវអនុស្សរណ:យោគយល់គ្នាស្តីពីកិច្ចសហប្រតិបត្តិការលើវិស័យការងារដែលបានចុះហត្ថលេខារួចហើយ កាលពីថ្ងៃទី១៩ ខែសីហា ឆ្នាំ២០១៦ ដើម្បីធ្វើការរួមគ្នាឆ្ពោះទៅសម្រេចឲ្យបាននូវការលើកទឹកចិត្ត ដល់កិច្ចសហប្រតិបត្តិការបច្ចេកទេសរវាងប្រទេសទាំងពីរនៅក្នុងវិស័យការងារ មានដូចតទៅ:

១.ការផ្លាស់ប្តូរប្រព័ន្ធកម្មវិធី ការសិក្សាជំនាញឯកទេស ការស្រាវជ្រាវ ការសិក្សា និងព័ត៌មានពាក់ព័ន្ធវិស័យនានា រួមទាំង (តែមិនកំណត់ត្រឹម) ការសិក្សាប្រៀបធៀបលើវិស័យការងារមុខរបរ ការបណ្ដុះបណ្ដាលវិជ្ជាជីវ: និងរដ្ឋបាលការងារ ដូចជា ការចរចារជាសមូហភាព ការដាក់ឲ្យអនុវត្ត និងការអនុវត្តច្បាប់ ការដោះស្រាយវិវាទការងារ សន្តិសុខសង្គម ការគាំពារពលកម្ម សេរីភាពខាងសមាគម សុខភាពនិងសុវត្ថិភាពការងារ ការគ្រប់គ្រងហត្ថពលកម្មបរទេស និងការផ្លាស់ប្ដូរព័ត៌មានទៅលើការពង្រឹងផលិតភាពការងារ។

២. ការលើកទឹកចិត្តការផ្លាស់ប្តូរទស្សន:កិច្ចរវាងមន្ត្រីទទួលបន្ទុក និងមន្ត្រីជំនាញ។

៣. ការគ្រប់គ្រងទេសន្តរប្រវេសន៍ការងាររវាងប្រទេសទាំងពីរ។

៤. ការផ្លាស់ប្ដូរព័ត៌មាន ដើម្បីទប់ស្កាត់ការជ្រើសរើស និងប្រើប្រាស់ពលករខុសច្បាប់ ក៏ដូចជាការបង្ការ និងប្រយុទ្ធប្រឆាំងការកេងប្រវ័ញ្ចកម្លាំងពលកម្ម និងការជួញដូរមនុស្ស។

៥. ផ្នែកផ្សេងទៀតនៃកិច្ចសហប្រតិបត្តិការដែលភាគីទាំងពីរបានព្រមព្រៀងគ្នាលើវិស័យការងារ។

ទន្ទឹមនឹងនេះ ភាគីទាំងពីរនឹងសហការគ្នាក្នុងការអភិវឌ្ឍមុខជំនាញ ចំណេះដឹង និងការចែករំលែកបច្ចេកទេស ដើម្បីបង្កើនសមត្ថភាពជំនាញហត្ថពលកម្ម និងពង្រឹងផលិតភាពការងារផងដែរ។ គណ:ប្រតិភូទីម័រឡេស្តេដឹកនាំដោយរដ្ឋលេខាធិការនៃរដ្ឋលេខាធិការដ្ឋានបណ្ដុះបណ្ដាលវិជ្ជាជីវ: និងគោលនយោបាយមុខរបរគ្រោងនឹងមកបំពេញទស្សនកិច្ចសិក្សានៅកម្ពុជានាដើមឆ្នាំក្រោយ៕

photo_2016-10-06_15-42-44

photo_2016-10-06_15-42-42