Post News Media ព័ត៌មានជាតិ កម្លាំងមានសមត...

កម្លាំងមានសមត្ថកិច្ចចុះបង្ក្រាបគំនរឈើសុក្រំ ដែលឈ្មួញដឹកយកមកលាក់ទុក

ចែកចាយបន្ត

រតនគិរី: គំនរឈើប្រភេទសុក្រំចំនួន៤៣កំណាត់មុខយក្ស ដែលមានមុខកាត់ធំៗជាប្រភេទឈើមូលដែលមាន​ប្រវែងចាប់ពី៥​ម៉ែត្រ ឡើងទៅ១០ម៉ែត្រដែលក្រុមឈ្មួញដឹកយកមកលាក់ទុកនៅក្នុងដីចំការកៅស៊ូរបស់ក្រុមហ៊ុនម៉ាងយ៉ាងខេ (វៀតណាម) ក្បែររោងចក្រឈើក្រុមហ៊ុន​នោះ ត្រូវបានកម្លាំងជំនាញរដ្ឋបាលព្រៃឈើផ្នែកអូរជុំ សហការជាមួយកម្លាំងកងរាជអាវុធហត្ថស្រុកវ៉ឺនសៃ ចុះបង្ក្រាបបាន។

ការចុះបង្ក្រាបគំនរឈើខាងលើនេះបានធ្វើឡើងកាលពីរសៀលថ្ងៃទី៥ ខែតុលា ឆ្នាំ២០១៦ ត្រង់ចំណុចក្នុងចំការកៅស៊ូ ក្រុមហ៊ុនម៉ាងយ៉ាងខេ (វៀតណាម)ស្ថិតនៅក្នុងស្រុកវ៉ឺនសៃ ខេត្តរតនគិរី ។

តាមប្រភពព័ត៌មានពីប្រជាពលរដ្ឋរស់នៅស្រុកវ៉ឺនសៃបានបង្ហើបឲ្យដឹងថា ឈើសុក្រំដែលឈ្មួញយកមកលាក់ទុក​នៅក្នុងដីចំការ​កៅស៊ូរបស់​ក្រុមហ៊ុនម៉ាង​យ៉ាងខេ នេះគឺ ជាឈើរបស់ឧកញ៉ា ម្នាក់ដែលល្បី​ល្បាញខាងរកស៊ីដឹកជញ្ជូនឈើជាយូមកហើយដែលកន្លងមកតែងតែធ្វើការដឹកជញ្ជូនយកមក​លាក់​នៅក្រុមហ៊ុនម៉ាងយ៉ាងខេនេះ។

ប្រភពបានបន្តទៀតថា បើតាមការអង្កេតគឺឈើដែលឈ្មួញបានយកមកលាក់ទុកនៅទីតាំងខាងលើគឺបណ្តាលមកពីពេលថ្មីៗមកនេះ មានការដាក់​ចេញ​នូវបទបញ្ជាពីប្រមុខរាជរដ្ឋាភិបាលឲ្យការទប់ស្កាត់ និងបង្ក្រាបបទល្មើសព្រៃឈើ ហើយស្ថាប័ន និងកម្លាំងជំនាញដែលពាក់ព័ន្ធបានធ្វើការដោយ​យក​ចិត្តទុកដាក់ ទើបឈានទៅដល់ធ្វើការបង្ក្រាប។

តាមការឲ្យដឹងពីលោក ជា កុណារ៉ា នាយផ្នែករដ្ឋបាលព្រៃឈើបីស្រុក(ស្រុកវ៉ឺនសៃ តាវែង អូរជុំ)បានឲ្យដឹងថា មូលហេតុដែលអាចបង្ក្រាបបទល្មើស​ឈើ​សុក្រំនៅចំណុចខាងលើបានគឺដោយសារមានការសហការពីកម្លាំងសម្ងាត់ ក៏ដូចជាក្រុមអ្នកសារព័ត៌មាន ទើបលោកបានដឹកនាំកម្លាំងជំនាញ​ដោយ​សហការជាមួយកម្លាំងកងរាជអាវុធហត្ថស្រុកវ៉ឺនសៃចុះបង្ក្រាបតែម្តង។

លោក ជា កុណារ៉ា នាយផ្នែករដ្ឋបាលព្រៃឈើ បានបញ្ជាក់ទៀតថា ឈើសុក្រំទាំងនេះមានចំនួន៤៣កំណាត់ ហើយនៅព្រឹកថ្ងៃទី៦ ខែតុលា ឆ្នាំ២០១៦​នេះ កម្លាំងជំនាញរួមនឹងអាវុធហត្ថកំពុងតែស្នើឲ្យខាងក្រុមហ៊ុនម៉ាងយ៉ាងខេ ជួយធ្វើការដឹកជញ្ជូនយកមកផ្ញើទុកនៅក្នុងក្រុមហ៊ុនម៉ានយ៉ាង​ខេជាបណ្តោះ​អាសន្នសិន ព្រោះឈើទាំងនេះវែងហើយផ្លូវក៏ពិបាកទៀត ប៉ុន្តែលោកបានបញ្ជក់បន្ថែមថា ឥឡូវនេះលោកកំពុងតែរករថយន្តណាដែល​អាចស្ទួចឈើ​ទាំងនេះបាន​ដើម្បីធ្វើការដឹកជញ្ជូនយកមករក្សាទុកនៅខណ្ឌរដ្ឋបាលព្រៃឈើខេត្តចាត់ការបន្តទៅតាមនិតិវិធី៕

បង្ក្រាបឈើ

បង្ក្រាបឈើ

បង្ក្រាបឈើ

បង្ក្រាបឈើ