Post News Media ព័ត៌មានជាតិ សមត្ថកិច្ចចុះ...

សមត្ថកិច្ចចុះបង្ក្រាបបទល្មើសនេសាទ ក្នុងស្រុកកំពង់លែង

ចែកចាយបន្ត

កំពង់ឆ្នាំង: បន្ទាប់ពីមានព័ត៌មានលើកឡើងថា មានបទល្មើសជាច្រើន បានកើតឡើង នៅចំណុច វាលភក់ ស្ថិតក្នុងឃុំប្រឡាយមាស និងឃុំផ្លូវទូក ស្រុកកំពង់លែង ហើយសមត្ថកិច្ចមិនបង្ក្រាបនោះ កាលពីថ្ងៃម្សិលមិញនេះ ត្រូវបាន​កម្លាំង​សមត្ថកិច្ចចម្រុះ ចុះបង្ក្រាបក្នុងភូមិសាស្ត្រស្រុកកំពង់លែង ។

កិច្ចប្រតិបត្តិការបង្ក្រាបបទល្មើសនេសាទ នេះដែរ បានធ្វើឡើងកាលពីថ្ងៃទី០៦ ខែតុលា ឆ្នាំ២០១៦ ដែលមានការដឹកនាំ​កម្លាំង​ដោយ លោក ម៉ប់ សាម៉ុន នាយរងខណ្ឌរដ្ឋជលផលកំពង់ឆ្នាំង លោក ផៅ ស្រៀង អភិបាលរងស្រុកកំពង់លែង ដោយមានមន្ត្រី​កងរាជអាវុធហត្ថស្រុក រួមនឹងនគរបាលស្រុក សរុប ១៧រូប និងប្រើប្រាស់កាណូតបាឡាស្មាច់ ៧គ្រឿង ។

ជាលទ្ធផលក្នុងការបង្ក្រាបនេះ សមត្ថកិច្ចរឹបអូសបាន របាំងសាច់អួន១៤កន្លែង ដែលមានប្រវែង១៤៥០ម៉ែត្រ បង្គោល៤៥០ដើម លបលូសាច់អួន២៦មាត់ និងចាក់លែងត្រី ៦០គីឡូក្រាមចូលទន្លេវិញ ។ ចំណែក ព័ត៌មានដែលថា មានរបាំង ស្បៃមុងនោះ គឺ​គ្មានទេ ដោយមន្ត្រីជលផល បញ្ជាក់ថា របាំងស្បៃមុង គឺគេដាក់ពេលទឹកទន្លេ ឡើង ពីដំបូង ។ ចំណែកទឹកជ្រៅកម្ពស់​ជាង៤​ទៅ​៥​ម៉ែត្របែបនេះ មិនមានបទល្មើសប្រភេទនេះឡើយ។

ក្នុងនោះមន្ដ្រីជលផល ក៏បានអប់រំណែនាំឲ្យប្រជាពលរដ្ឋ ធ្វើរបាំងលបក្នុងលក្ខណ:មួយខ្លី អាចទទួលយកបាន តែបើរបាំងស្បៃ​មុង យើងមិនយោគយល់នោះទេ ។ ជាចុងក្រោយ លោកសំណូមពរឲ្យប្រជាពលរដ្ឋទាំងអស់ សូមធ្វើការនេសាទគោរព​ទៅតាម​ច្បាប់ហើយត្រូវអនុវត្តទៅតាមប្រកាស លេខ ៤៥៨ ដែលក្រសួងកសិកម្មបានកំណត់ ឧបករណ៍នេសាទ ទៅតាមលក្ខណ:គ្រួសារ៕

បង្ក្រាបបទល្មើសនេសាទ

បង្ក្រាបបទល្មើសនេសាទ

បង្ក្រាបបទល្មើសនេសាទ

បង្ក្រាបបទល្មើសនេសាទ