Post News Media ព័ត៌មានជាតិ នាយឧត្តមសេនីយ...

នាយឧត្តមសេនីយ៏ ឆៃ ស៊ីណារិទ្ធ : ស្មាតហ្វូនមួយគ្រឿងអាចជាសម្ភារ:សម្រាប់ជនល្មើសប្រព្រឹត្តបទល្មើស

ចែកចាយបន្ត

ភ្នំពេញ: នាព្រឹកថ្ងៃទី៧ ខែតុលា ឆ្នាំ២០១៦នេះ នាយឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាល​ជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានអញ្ជើញជាអធិបតីភាពក្នុង​ពិធីបើកវគ្គបណ្តុះបណ្តាលស្តីពីការឃុបឃិតប្រព្រឹត្តបទល្មើសបច្ចេកវិទ្យា នៅនាយកដ្ឋានកណ្តាលនគរបាលយុត្តិធម៌។

នាយឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាជាតិ បានមានប្រសាសន៍ថា បច្ចុប្បន្នប្រព័ន្ធបច្ចេកវិទ្យា និងប្រព័ន្ធទូរគម​នាគមន៍​កំពុងមានលក្ខណ:កាន់តែទំនើបរីកចម្រើនពីមួយថ្ងៃទៅមួយថ្ងៃ ដូច្នេះហើយធ្វើឲ្យជនល្មើសងាយស្រួលក្នុងការ​ប្រព្រឹត្តបទ​ល្មើស ដោយគ្រាន់តែមានស្មាតហ្វូនមួយគ្រឿងក្នុងដៃ។ កត្តាទាំងនេះទាមទារឲ្យមន្ត្រីអនុវត្តច្បាប់ត្រូវមានជំនាញច្បាស់​លាស់​ក្នុង​ការ​ស្រាវ​ជ្រាវស៊ើបអង្កេតដើម្បីចាប់ជនល្មើសយកមកផ្តន្ទាទោស។

លោកឧត្តមសេនីយ៍ បានមានប្រសាសន៍ទៀតថា តាមរយ:ការប្រើប្រាស់ប្រព័ន្ធទូរស័ព្ធ ប្រព័ន្ធបច្ចេកវិទ្យាទូរគមនាគមន៍ ជនល្មើស​អាចធ្វើការ​គំរាមកំហែងបំភិតបំភ័យសន្តិសុខផ្លូវចិត្តជនរងគ្រោះ ដូច្នេះហើយទាមទារឲ្យមានការគ្រប់គ្រងការចុះបញ្ជី​អត្តសញ្ញាណ​អ្នកប្រើប្រាស់ឲ្យបានល្អ ដើម្បីបម្រើឲ្យកិច្ចការជំនាញក្នុងការស្រាវជ្រាវស៊ើបអង្កេតរកអត្តសញ្ញាណជនល្មើស។

ទន្ទឹមនឹងនោះដែរ នាយឧត្តមសេនីយ៍ អគ្គស្នងការរងនគរបាជាតិ ក៏បានសំណូមពរដល់សិក្ខាកាមទាំងអស់ដែល​បានក្រេបជញ្ជក់​នូវចំណេះដឹងទាំងនេះ ត្រូវបន្តការខិតខំយកចំណេះដឹងរបស់ខ្លួនទៅអនុវត្ត និងខិតខំបន្តការសិក្សាស្រាវជ្រាវបន្ថែមទៀត។ ជាការពិ​ត​ណាស់វគ្គបណ្តុះបណ្តាលនេះ មានរយ:ពេលខ្លីក៏ពិតមែន ប៉ុន្តែសិក្ខាកាមទាំងអស់ត្រូវតែខិតខំ ប្រឹងប្រែងយកចិត្តទុកដាក់ ក្រេប​នូវចំណេះដឹង ចំណេះធ្វើ ក៏ដូចជាការលើកឧទាហរណ៍ជាក់ស្តែង ក្នុងការបង្ហាញអំពីវិធីសាស្ត្រស្វែងរក និងកំណត់អត្តសញ្ញាណ​ជនសង្ស័យប្រព្រឹត្តបទល្មើសពាក់ព័ន្ធនិងបទល្មើសបច្ចេកវិទ្យា។

សូមបញ្ជាក់ថា វគ្គបណ្តុះបណ្តាលស្តីពីការឃុបឃិតប្រព្រឹត្តបទល្មើសបច្ចេកវិទ្យា មានរយ:ពេលមួយថ្ងៃ ដោយមានការចូលរួមពី​សិក្ខាកាមជាមមន្ត្រីនគរបាលចំនួន ៤០នាក់ មកពីនាយកដ្ឋានប្រឆាំងបទល្មើសបច្ចេកវិទ្យា នៃអគ្គស្នងការដ្ឋាននគរបាលជាតិ ៕

អគ្គស្នងការ.ន.គ

អគ្គស្នងការ.ន.គ

អគ្គស្នងការ.ន.គ