Post News Media ព័ត៌មានជាតិ កម្លាំងនគរបាល...

កម្លាំងនគរបាលប៉ុស្តិ៍ផ្សារដើមថ្កូវ ឃាត់ខ្លួនប្រុសស្រី២នាក់ ពាក់ព័ន្ធនឹងថ្នាំញៀន

ចែកចាយបន្ត

ភ្នំពេញ: សមត្ថកិច្ចនគរបាលប៉ុស្តិ៍ផ្សារដើមថ្កូវ បានឃាត់ខ្លួនស្ត្រី​ម្នាក់ ជាអ្នក​ជួញ​ដូរគ្រឿងញៀន និងយុវជនម្នាក់ ជាអ្នកប្រើប្រាស់គ្រឿងញៀនកាលពីវេលាម៉ោង១២និង៥០នាទីថ្ងៃ៧ ខែតុលា ឆ្នាំ២០១៦នេះ ស្ថិតនៅខាងក្រោយក្រុមហ៊ុនឃ្យូប៊ី ត្រង់ចំណុចផ្ទះគ្មានលេខ ក្រុម៣២ភូមិ៥ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។

មន្ត្រីនគរបាលប៉ុស្តិ៍រដ្ឋបាលសង្កាត់ផ្សារដើមថ្កូវបានឲ្យដឹងថា ជនសង្ស័យ ទី១ឈ្មោះ ផាន់ ដាវី ភេទស្រី អាយុ៣៥ឆ្នាំ ជាអ្នកជួញដូរថ្នាំញៀន ស្នាក់នៅផ្ទះជួលផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន។ ជនសង្ស័យ ទី២ ឈ្មោះ ឃឿន សេងហួរ ភេទប្រុស អាយុ១៧ឆ្នាំ ជាអ្នកប្រើប្រាស់គ្រឿងញៀន ស្នាក់នៅផ្ទះលេខ២២៧B2 ផ្លូវនរោត្តម សង្កាត់ទន្លេបាសាក់ ខណ្ឌចំការមន។

ក្រោយពីធ្វើការឃាត់ខ្លួនជនសង្ស័យទាំង២ខាងលើ កម្លាំងនគរបាលដកហូតបានថ្នាំញៀន១កញ្ចប់ (ម៉ាទឹកកក) និងលុយដុល្លារចំនួន៧ដុល្លារ លុយខ្មែរ៨ម៉ឺន២ពាន់៧រយរៀល។

មន្ត្រីនគរបាលប៉ុស្តិ៍បានឲ្យដឹងថា មុនពេលកើតហេតុកម្លាំងបានចុះដើរល្បាតក្នុងភូមិសាស្ត្ររបស់ខ្លួន ហើយក៏បានប្រទះឃើញជនសង្ស័យកំពុងឈរ សមត្ថកិច្ចសង្ស័យ ក៏ធ្វើការត្រួតពិនិត្យរកឃើញម្សៅក្រាមពណ៌សតូចនៅក្នុងហោប៉ៅខោរបស់ជនសង្ស័យឈ្មោះ យឿន សេងហួរ ដែលទើបតែទិញពីស្ត្រីឈ្មោះ ផាន់ ដាវី ក្នុងតម្លៃ៥ដុល្លារ។

ក្រោយមកសមត្ថកិច្ចឈានដល់ការឃាត់ខ្លួនជនសង្ស័យឈ្មោះ ផាន់ដាវី តែម្តង។ នៅចំពោះមុខសមត្ថកិច្ចជនសង្ស័យបានសារភាពថា ខ្លួនទើបតែលក់បានមួយអាទិត្យតែប៉ុណ្ណោះ គ្រាន់ទិញទឹកដោះគោឲ្យកូន ក៏ប៉ុន្តែនៅពេលនេះត្រូវសមត្ថកិច្ចចាប់ខ្លួនតែម្តង។

បច្ចុប្បន្នជនសង្ស័យទាំង២នាក់ខាងលើ ត្រូវបានសមត្ថកិច្ចនគរបាលនាំខ្លួនយកប៉ុស្តិ៍ ដើម្បីធ្វើការសាកសួរ និងកសាងសំណុំរឿងបញ្ជូនខ្លួនទៅកាន់អធិការដ្ឋាននគរបាលខណ្ឌចំការមនចាត់ការបន្ដតាមនិតិវិធីច្បាប់៕

photo_2016-10-08_10-59-21

photo_2016-10-08_10-59-18