Post News Media ព័ត៌មានជាតិ បុរសម្នាក់ត្រ...

បុរសម្នាក់ត្រូវម្ចាស់ទូរស័ព្ទ វាយស្ទើរស្លាប់ ក្រោយតាមទាន់នៅកន្លែងបញ្ចាំ

ចែកចាយបន្ត

បន្ទាយមានជ័យ: បុរសម្នាក់ត្រូវបានគេព្រួតវាយស្ទើរស្លាប់ និងចាប់បញ្ជូនឲ្យអាវុធហត្ថ ខណ:ចេញមុខជំនួសចោរយកទូរស័ព្ទដៃដែលលួចបានយកទៅបញ្ចាំបង្កជាការភ្ញាក់ផ្អើល។ ហេតុការណ៍នេះកើតឡើងនៅចំនុចតូបបញ្ចាំមួយកន្លែងនៃផ្សារដើមពុទ្រា ក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីវេលាម៉ោង១២ថ្ងៃត្រង់ ថ្ងៃទី៨ខែតុលាឆ្នាំ២០១៦នេះ។

លោកវរ:សេនីយ៍ត្រី ជាដា មេបញ្ជាការមូលដ្ឋានអាវុធហត្ថក្រុងប៉ោយប៉ែតបានឲ្យដឹងថា ជនសង្ស័យមានឈ្មោះទេព វិចិត្ត ប្រុសអាយុ៣២ឆ្នាំ រស់នៅក្នុងបន្ទប់ជួលភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ លោកបញ្ជាក់ថាបើតាមការបំភ្លឺរបស់ជនសង្ស័យបាននិយាយថា មុនពេលកើតហេតុនោះខ្លួនបានអង្គុយមើលគេលេងបៀរក្នុងកាស៊ីណូ ហ្គោដិន ស្រាប់តែពេលនោះមានក្មេងម្នាក់បានមកប្រាប់ខ្លួនថាមានឈ្មោះធឿនចង់ជួបបង។

ក្រោយពីខ្លួនបានទៅជួបឈ្មោះធឿន រួចមកឈ្មោះធឿនដែលធ្លាប់ស្គាល់គ្នានោះបានឲ្យយកទូរស័ព្ទ១គ្រឿងម៉ាកអាយហ្វូនទៅបញ្ចាំគេក្នុងតំលៃ១.០០០បាត ហើយខ្លួនបានទទួលលុយពីឈ្មោះធឿនបាន១០០បាតពេលដែលខ្លួនបានទូរស័ព្ទហើយ ក៏ដើររកកន្លែងបញ្ចាំលុះដើរទៅដល់ផ្សារដើមពុទ្រា ក៏ម្ចាស់ទូរស័ព្ទតាមទាន់វាយនិងចាប់ឲ្យអាវុធហត្ថតែម្តង។ ជនសង្ស័យត្រូវបានអាវុធហត្ថក្រុងប៉ោយប៉ែតបញ្ជូនមកទីបញ្ជាការកងរាជអាវុធហត្ថខេត្តដើម្បីសាកសួរបន្ត។

នៅមុខសមត្ថកិច្ចអាវុធហត្ថជនសង្ស័យបានឆ្លើយសារភាពថា ខ្លួនមិនមែនជាចោរលួចទូរស័ព្ទទេ ហើយទូរស័ព្ទពិតជារបស់ឈ្មោះធឿនដែលទើបតែលួចបានពីគេពិតមែន។ បច្ចុប្បន្នជនសង្ស័យកំពុងស្ថិតក្រោមការសួរនាំរបស់សមត្ថកិច្ចដើម្បីកសាងសំនុំរឿងបញ្ជូនទៅតុលាការខេត្ត និងបន្តស្វែងរកចាប់ខ្លួនជនដៃដល់់មកផ្តន្ទាទោសទៅតាមផ្លូវច្បាប់៕

photo_2016-10-08_18-49-55

photo_2016-10-08_18-49-57