Post News Media ព័ត៌មានជាតិ កម្ពុជា ថៃ សន...

កម្ពុជា ថៃ សន្យាជំរុញទំហំពាណិជ្ជកម្មឲ្យកាន់តែច្រើនថែមទៀត

ចែកចាយបន្ត

ភ្នំពេញ: ប្រមុខរាជរដ្ឋាភិបាលនៃប្រទេសទាំងពីរកម្ពុជា-ថៃ បានសន្យាគ្នាថា នឹងខិតខំជំរុញទំហំពាណិជ្ជកម្មនៃប្រទេសទាំងពីរ ឲ្យកាន់តែមានទំហំធំឡើងថែមទៀត តាមរយ:ការតភ្ជាប់រវាងប្រជាជននិងប្រជាជន ការតភ្ជាប់ហេដ្ឋារចនាសម្ព័ន្ធ និងការបើកច្រកព្រំដែននៃប្រទេសទាំងពីរឲ្យកាន់តែទូលំទូលាយថែមទៀត សំដៅបង្កើនស្ថេរភាពនៃការអភិវឌ្ឍសម្រាប់ប្រទេសទាំងពីរ។

ក្នុងជំនួបដែលធ្វើឡើងនារសៀលថ្ងៃទី៩តុលានៅទីក្រុងបាងកក ជាទីដែលសម្តេចតេជោនាយករដ្ឋមន្ត្រី អញ្ជើញចូលរួមកិច្ចប្រជុំកំពូលស្តីពីកិច្ចសន្ទនា នៃកិច្ចសហប្រតិបត្តិការអាស៊ីលើកទី២ លោកឧត្តមសេនីយ៍ ប្រាយុទ្ធ ច័ន្ទអូចា នាយករដ្ឋមន្ត្រីថៃ មានប្រសាសន៍ថា លោកពិតជាមានការរីករាយដោយបានជួបពិភាក្សាសាជាថ្មីម្តងទៀត ជាមួយសម្តេចតេជោនាយករដ្ឋមន្ត្រី ថ្វីត្បិតរូបលោក និងសម្តេចតេជោ ធ្លាប់បានជួបគ្នាជាច្រើនលើកច្រើនសារ ក្នុងក្របខណ្ឌអន្តរជាតិ។ លោកនាយករដ្ឋមន្ត្រីមានប្រសាសន៍ចាត់ទុកថា សម្តេចគឺជាមិត្តដ៏ល្អរបស់ប្រទេសនិងប្រជាជនថៃ ហើយបានចាត់ទុកថាវត្តមានរបស់ សម្តេចតេជោនាយករដ្ឋមន្ត្រី ក្នុងកិច្ចប្រជុំកំពូលស្តីពីកិច្ចសន្ទនា នៃកិច្ចសហប្រតិបត្តិការអាស៊ីលើកទី២នេះ គឺពិតជាមានសារ:សំខាន់បំផុត។

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍អបអរ សាទរចំពោះជោគជ័យ នៃការធ្វើប្រជាមតិរបស់ប្រទេសថៃ ដែលបានធ្វើឡើងនាកន្លងមក។ សម្តេចតេជោនាយករដ្ឋ មន្ត្រីមានប្រសាសន៍សង្កត់ធ្ងន់ថា សម្រាប់ប្រទេសយើងទាំងពីរបញ្ហានៃការសម្រេចចិត្តរបស់ប្រជាជន គឺពិតជាមានសារ:សំខាន់ណាស់ ព្រោះថាការធ្វើប្រជាមតិនិងការបោះឆ្នោត គឺផ្តើមចេញពីឆន្ទ:ពិតប្រាកដរបស់ប្រជាពលរដ្ឋ ដោយគ្មាននណាទៅបំភិតបំភ័យ ឬការបង្វិតបង្ខំនោះឡើយ។

ក្នុងជំនួបពិភាក្សាដ៏មានសារ:សំខាន់នោះដែរសម្តេចតេជោ នាយករដ្ឋមន្ត្រី និងសមភាគីថៃ ឧត្តមសេនីយ៍ ប្រាយុទ្ធ ច័ន្ទអូចា បានធ្វើការពិភាក្សាគ្នាយ៉ាងយកចិត្តទុកដាក់ ទៅលើការពង្រឹងនិងពង្រីកការតភ្ជាប់រវាងប្រជាជននិងប្រជាជន នៅតាមតំបន់ព្រំដែននៃប្រទេសទាំងពីរ។ មេដឹកនាំទាំងពីរបានចាត់ទុកថា នឹងខិតខំបើកច្រកព្រំដែនអន្តរជាតិថ្មីនៃប្រទេសទាំងពីរ ឲ្យបានចេញជារូបរាងពិតប្រាកដ ដោយមិនរងចាំការបោះបង្គោលព្រំដែន ឬធ្វើឲ្យប៉ះពាល់ដល់ខ្សែបន្ទាប់ព្រំដែន ហើយការបិទឬបើកច្រកព្រំដែនមិនត្រូវធ្វើឡើងដោយឯកតោភាគី ពោលគឺការធ្វើអ្វីមួយត្រូវរាយការណ៍ជូនប្រមុខរាជរដ្ឋាភិបាល នៃប្រទេសទាំងពីរជាមុន។

ជាមួយគ្នានេះមេដឹកនាំទាំងពីរក៏បានឯកភាព ឲ្យគណ:កម្មការព្រំដែននៃប្រទេសទាំងពីរកម្ពុជា ថៃ បន្តការពិភាក្សាជាបន្តទៅទៀត បន្ទាប់ពីការអាក់ខានជួបពិភាក្សាគ្នាជាង២ឆ្នាំមកនោះ។ មេដឹកនាំទាំងពីរក៏បានសំដែងនូវការរីករាយចំពោះ ការតភ្ជាប់ផ្លូវរថភ្លើងនៃប្រទេសទាំងពីរ ដែលគ្រោងនិងប្រារព្វពិធីសម្ពោធនៅបំណាច់ឆ្នាំ២០១៦នេះ។ ជាមួយគ្នានេះមេដឹកនាំនៃប្រទេសទាំងពីរ ក៏បានធ្វើការពិភាក្សាគ្នាយ៉ាងយកចិត្តទុកដាក់ ទៅលើបញ្ហាកម្លាំងពលករកម្ពុជាចំនួនជាង២សែន៤ម៉ឺននាក់ ដែលកំពុងបំពេញការងារទាំងស្របច្បាប់ និងមិនស្របច្បាប់នៅប្រទេសថៃ ដែលក្នុងនោះភាគីកម្ពុជាស្នើឲ្យភាគីថៃសហការជាមួយកម្ពុជា ក្នុងការផ្តល់លិខិតឆ្លងដែនដល់ពលករទាំងអស់នោះ ដើម្បីឲ្យពួកគេធ្វើការដោយស្របច្បាប់ក្នុងប្រទេសថៃ។ មេដឹកនាំនៃប្រទេសទាំងពីរក៏បានពិភាក្សាគ្នាយ៉ាងយកចិត្តទុកដាក់ ទៅលើតំបន់ត្រួតស៊ីគ្នាក្នុងដែនសមុទ្រ និងការកសាងនូវ ថាមពលវារីអគ្គិសនីនៅស្ទឹងមេទឹកក្នុងខេត្តកោះកុង ដែលជាគម្រោងដ៏មានអត្ថប្រយោជន៍របស់ប្រជាពលរដ្ឋ នៃប្រទេសទាំងពីរ។

មេដឹកនាំនៃប្រទេសទាំងពីរ ក៏បានសំដែងនូវការរីករាយចំពោះទំហំពាណិជ្ជកម្ម និងវិនិយោគនៃប្រទេសទាំងពីរកម្ពុជា ថៃ ដែលតួលេខបានបង្ហាញថា កាលពីឆ្នាំ២០១៤ការនាំចូលពីប្រទេសថៃមកកាន់ប្រទេសកម្ពុជា មានទំហំ៤ពាន់២៥លានដុល្លា ការនាំចេញពីកម្ពុជាទៅកាន់ប្រទេសថៃ មានទំហំ៥៨៩លានដុល្លា។ ឆ្នាំ២០១៦ការនាំចូលពីប្រទេសថៃមកកាន់ប្រទេសកម្ពុជា មានទំហំ៤ពាន់៦៨៩លានដុល្លា ឯការនាំចេញពីកម្ពុជាទៅកាន់ប្រទេសថៃ មានទំហំ៦៣៩លានដុល្លា។ មេដឹកនាំទាំងពីរបានចាតទុកថា នេះជាទំហំពាណិជ្ជកម្មជាប់ចំណាត់ថ្នាក់ទី១ បើប្រៀបធៀបទៅនឹងបណ្តាប្រទេសក្នុងតំបន់ ប៉ុន្តែទោះបីជាយ៉ាងណាក៏ដោយមេដឹកនាំទាំងពីរចាត់ទុកថា ប្រទេសទាំងពីរនៅមានសក្តានុពលជាច្រើនទៀត ដែលយើងគួរតែជំរុញកំណើននៃទំហំពាណិជ្ជកម្ម ឲ្យកើនដល់១៥ពាន់លានដុល្លានៅពេលដ៏ខ្លីខាងមុខ។ នៅក្នុងជំនួបពិភាក្សាគ្នានោះដែរ មេដឹកនាំនៃប្រទេសទាំងពីរកម្ពុជា ថៃ បានពិភាក្សាគ្នាផងដែរ ក្នុងបើកកិច្ចប្រជុំគណ: រដ្ឋមន្ត្រី ចម្រុះនៃប្រទេសទាំងពីរកម្ពុជា ថៃ ដែលគ្រោងនឹងប្រារព្វធ្វើឡើងក្នុងប្រទេស កម្ពុជានៅឆ្នាំ២០១៧ខាងមុខ។ មេដឹក នាំនៃប្រទេសទាំងពីរកម្ពុជា ថៃ ក៏បានធ្វើការពិភាក្សាគ្នាយ៉ាងយកចិត្តទុកដាក់ ទៅលើទំនាក់ទំនងទ្វេភាគី ពហុភាគី បញ្ហាតំបន់និងអន្តរជាតិ ដែលមានការយកចិត្តទុកដាក់ដូចគ្នា៕

photo_2016-10-09_19-47-27

photo_2016-10-09_19-47-30

photo_2016-10-09_19-47-33

photo_2016-10-09_19-47-35