Post News Media ព័ត៌មានជាតិ កម្ពុជា-ថៃ ប្...

កម្ពុជា-ថៃ ប្ដេជ្ញាជំរុញបន្ថែមទំហំពាណិជ្ជកម្ម និងកិច្ចសហប្រតិបត្តិការប្រសើរឡើង សម្រាប់ប្រជាជន នៃប្រទេសទាំងពីរ

ចែកចាយបន្ត

ភ្នំពេញ: ប្រមុខរាជរដ្ឋាភិបាលកម្ពុជា-ថៃ បានសន្យាគ្នាថា នឹងខិតខំជំរុញបន្ថែមទំហំពាណិជ្ជកម្មនៃប្រទេសទាំងពីរ ឲ្យកាន់តែមានទំហំធំឡើងថែមទៀត តាមរយ:ការតភ្ជាប់រវាងប្រជាជន និងប្រជាជន ការតភ្ជាប់ហេដ្ឋារចនាសម្ព័ន្ធ និងការបើកច្រកព្រំដែននៃប្រទេសទាំងពីរ ឲ្យកាន់តែទូលំទូលាយថែមទៀត សំដៅបង្កើនស្ថេរភាពនៃការអភិវឌ្ឍសម្រាប់ប្រទេសទាំងពីរ។

ក្នុងជំនួបនារសៀលថ្ងៃទី៩ ខែតុលា ឆ្នាំ២០១៦ នៅទីក្រុងបាងកក ជាទីដែលសម្តេចតេជោ ហ៊ុន សែន នាយករដ្ឋមន្ត្រី អញ្ជើញចូលរួមកិច្ចប្រជុំកំពូល ស្តីពីកិច្ចសន្ទនា នៃកិច្ចសហប្រតិបត្តិការអាស៊ីលើកទី២ លោកឧត្តមសេនីយ៍ ប្រាយុទ្ធ ច័ន្ទអូចា នាយករដ្ឋមន្ត្រីថៃ បានថ្លែងថា លោកពិតជារីករាយដោយបានជួបពិភាក្សាសាជាថ្មីម្តងទៀត ជាមួយសម្តេចតេជោ ថ្វីត្បិតលោក និងសម្តេច ធ្លាប់បានជួបគ្នាជាច្រើនលើកច្រើនសារ ក្នុងក្របខណ្ឌអន្តរជាតិក៏ដោយ។ លោក ប្រាយុទ្ធ ក៏បានចាត់ទុកថា សម្តេច គឺជាមិត្តដ៏ល្អរបស់ប្រទេស និងប្រជាជនថៃ ហើយបានចាត់ទុកថា វត្តមានរបស់សម្តេចក្នុងកិច្ចប្រជុំកំពូលស្តីពីកិច្ចសន្ទនា នៃកិច្ចសហប្រតិបត្តិការអាស៊ីលើកទី២នេះ គឺពិតជាមានសារ:សំខាន់បំផុត។

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានសាទរចំពោះជោគជ័យ នៃការធ្វើប្រជាមតិរបស់ប្រទេសថៃ ដែលបានធ្វើឡើងនាកន្លងមក  សម្តេចបានសង្កត់ធ្ងន់ថា សម្រាប់ប្រទេសយើងទាំងពីរ បញ្ហានៃការសម្រេចចិត្តរបស់ប្រជាជន គឺពិតជាមានសារ:សំខាន់ណាស់ ព្រោះថា ការធ្វើប្រជាមតិ និងការបោះឆ្នោត គឺផ្តើមចេញពីឆន្ទ:ពិតប្រាកដរបស់ប្រជាពលរដ្ឋ ដោយគ្មាននរណាទៅបំភិតបំភ័យ ឬការបង្វិតបង្ខំនោះឡើយ។

សម្តេចតេជោ ហ៊ុន សែន និងសមភាគីថៃ លោកឧត្តមសេនីយ៍ ប្រាយុទ្ធ ច័ន្ទអូចា បានធ្វើការពិភាក្សាគ្នាយ៉ាងយកចិត្តទុកដាក់ ទៅលើការពង្រឹង និងពង្រីកការតភ្ជាប់រវាងប្រជាជន និងប្រជាជន នៅតាមតំបន់ព្រំដែននៃប្រទេសទាំងពីរ។ មេដឹកនាំទាំងពីរ បានចាត់ទុកថា នឹងខិតខំបើកច្រកព្រំដែនអន្តរជាតិថ្មីនៃប្រទេសទាំងពីរ ឲ្យបានចេញជារូបរាងពិតប្រាកដ ដោយមិនរង់ចាំការបោះបង្គោលព្រំដែន ឬធ្វើឲ្យប៉ះពាល់ដល់ខ្សែបន្ទាប់ព្រំដែន ហើយការបិទ ឬបើកច្រកព្រំដែន មិនត្រូវធ្វើឡើងដោយឯកតោភាគី ពោល គឺការធ្វើអ្វីមួយត្រូវរាយការណ៍ជូនប្រមុខរាជរដ្ឋាភិបាល នៃប្រទេសទាំងពីរជាមុន។

ជាមួយគ្នានេះ មេដឹកនាំទាំងពីរក៏បានឯកភាពឲ្យគណ:កម្មការព្រំដែននៃប្រទេសទាំងពីរកម្ពុជា-ថៃ បន្តការពិភាក្សាជាបន្តទៅទៀត បន្ទាប់ពីការអាក់ខានជួបពិភាក្សាគ្នាជាង២ឆ្នាំមកនោះ។ មេដឹកនាំទាំងពីរ ក៏បានសម្ដែងនូវការរីករាយចំពោះការតភ្ជាប់ផ្លូវរថភ្លើងនៃប្រទេសទាំងពីរ ដែលគ្រោងនឹងប្រារព្វពិធីសម្ពោធនៅបំណាច់ឆ្នាំ២០១៦នេះ។ ជាមួយគ្នានេះ មេដឹកនាំនៃប្រទេសទាំងពីរ ក៏បានធ្វើការពិភាក្សាគ្នាយ៉ាងយកចិត្តទុកដាក់ ទៅលើបញ្ហាកម្លាំងពលករកម្ពុជា ចំនួនជាង២សែន៤ម៉ឺននាក់ ដែលកំពុងបំពេញការងារទាំងស្របច្បាប់ និងមិនស្របច្បាប់នៅប្រទេសថៃ ដែលក្នុងនោះភាគីកម្ពុជា ស្នើឲ្យភាគីថៃ សហការជាមួយកម្ពុជា ក្នុងការផ្តល់លិខិតឆ្លងដែនដល់ពលករទាំងអស់នោះ ដើម្បីឲ្យពួកគេធ្វើការដោយស្របច្បាប់ក្នុងប្រទេសថៃ។

មេដឹកនាំនៃប្រទេសទាំងពីរ ក៏បានពិភាក្សាគ្នាយ៉ាងយកចិត្តទុកដាក់ ទៅលើតំបន់ត្រួតស៊ីគ្នាក្នុងដែនសមុទ្រ និងការកសាងនូវថាមពលវារីអគ្គិសនី នៅស្ទឹងមេទឹកក្នុងខេត្តកោះកុង ដែលជាគម្រោងដ៏មានអត្ថប្រយោជន៍របស់ប្រជាពលរដ្ឋ នៃប្រទេសទាំងពីរ។ មេដឹកនាំនៃប្រទេសទាំងពីរ ក៏បានសម្ដែងនូវការរីករាយចំពោះទំហំពាណិជ្ជកម្ម និងវិនិយោគនៃប្រទេសទាំងពីរកម្ពុជា-ថៃ ដែលតួលេខបានបង្ហាញថា កាលពីឆ្នាំ២០១៤ ការនាំចូលពីប្រទេសថៃ មកកាន់ប្រទេសកម្ពុជា មានទំហំ៤០២៥លានដុល្លារ ការនាំចេញពីកម្ពុជា ទៅកាន់ប្រទេសថៃ មានទំហំ៥៨៩លានដុល្លារ។ ឆ្នាំ២០១៦ ការនាំចូលពីប្រទេសថៃ មកកាន់ប្រទេសកម្ពុជា មានទំហំ៤០៦៨៩លានដុល្លារ ឯការនាំចេញពីកម្ពុជា ទៅកាន់ប្រទេសថៃ មានទំហំ៦៣៩លានដុល្លារ។ មេដឹកនាំទាំងពីរ បានចាត់ទុកថា នេះជាទំហំពាណិជ្ជកម្មជាប់ចំណាត់ថ្នាក់ទី១ បើប្រៀបធៀបទៅនឹងបណ្តាប្រទេសក្នុងតំបន់ ប៉ុន្តែទោះបីជាយ៉ាងណាក៏ដោយ មេដឹកនាំទាំងពីរចាត់ទុកថា ប្រទេសទាំងពីរនៅមានសក្តានុពលជាច្រើនទៀត ដែលយើងគួរតែជំរុញកំណើននៃទំហំពាណិជ្ជកម្ម ឲ្យកើនដល់១៥ពាន់លានដុល្លារនៅពេលដ៏ខ្លីខាងមុខ។

នៅក្នុងជំនួបពិភាក្សាគ្នានោះដែរ មេដឹកនាំនៃប្រទេសទាំងពីរកម្ពុជា-ថៃ បានពិភាក្សាគ្នាផងដែរ ក្នុងបើកកិច្ចប្រជុំគណ:រដ្ឋមន្ត្រីចម្រុះ នៃប្រទេសទាំងពីរ ដែលគ្រោងនឹងប្រារព្វធ្វើឡើងក្នុងប្រទេសកម្ពុជា នៅឆ្នាំ២០១៧ខាងមុខ។ មេដឹកនាំនៃប្រទេសទាំងពីរកម្ពុជា-ថៃ ក៏បានធ្វើការពិភាក្សាគ្នាយ៉ាងយកចិត្តទុកដាក់ ទៅលើទំនាក់ទំនងទ្វេភាគី ពហុភាគី បញ្ហាតំបន់ និងអន្តរជាតិ ដែលមានការយកចិត្តទុកដាក់ដូចគ្នា៕

photo_2016-10-10_11-54-51

photo_2016-10-10_11-54-53

photo_2016-10-10_11-54-54

photo_2016-10-10_11-54-56