Post News Media ព័ត៌មានជាតិ តុលាការផ្តន្ទ...

តុលាការផ្តន្ទាទោសលោក អ៊ុំ សំអាន ដាក់ពន្ធនាគារ២ឆ្នាំកន្លះ និងពិន័យ៤លានរៀល

ចែកចាយបន្ត

ភ្នំពេញ: ដូចការគ្រោងទុក នៅរសៀលថ្ងៃទី១០ ខែតុលា ឆ្នាំ២០១៦នេះលោក ហេង សុខណា ចៅក្រមជំនុំជម្រះសាលាដំបូងក្រុងភ្នំពេញ បានប្រកាសសាលក្រមសម្រេចផ្តន្ទាទោស លោក អ៊ុំ សំអាន តំណាងរាស្ត្រគណបក្សសង្គ្រោះជាតិ មណ្ឌលសៀមរាប ដាក់ពន្ធនាគារកំណត់រយ:ពេល២ឆ្នាំ៦ខែ និងពិន័យជាប្រាក់ចំនួន៤លានរៀលចូលជាថវិការដ្ឋក្រោមបទចោទប្រកាន់ពីបទ ញុះញង់ឲ្យប្រព្រឹត្តបទឧក្រិដ្ឋជាអាទិ៍ បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឲ្យមានការរើសអើង ពាក់ព័ន្ធផែនទីសន្ធិសញ្ញាព្រំដែនកម្ពុជាវៀតណាម ប្រព្រឹត្តនៅរាជធានីភ្នំពេញ ព្រះជាណាចក្រកម្ពុជា នៅអំឡុងឆ្នាំ២០១៥ រហូតដល់ថ្ងៃទី១០ ខែមេសា ឆ្នាំ២០១៦។

លោក ហេង សុខណា បានបញ្ជាក់នៅក្នុងសវនាការថា តុលាការបានធ្វើយ៉ាងត្រឹមត្រូវយោងតាមមាត្រា ៤៩៥ និងមាត្រា ៤៩៦នៃក្រមព្រហ្មទណ្ឌ។

លោកបន្តថា បើទោះជនជាប់ចោទនៅមានអភ័យឯកសិទ្ធិក៏ពិតមែន ប៉ុន្តែតុលាការអាចដំណើរការនីតិវិធីបានដោយសារបទល្មើសនោះជាបទល្មើសជាក់ស្តែង យោងតាមមាត្រា ៨៦នៃក្រមព្រហ្មទណ្ឌ និងតុលាការបានទទួលលិខិតលេខ ១៣៣ ពីរដ្ឋសភាជាតិ ដោយមានសម្លេងគាំទ្រ ៦៨សម្លេង ដោយបានអនុញ្ញាតឲ្យតុលាការបន្តនីតិវិធី ចាប់ខ្លួន និងឃុំខ្លួនជនជាប់ចោទបាន។

ចៅក្រមរូបនេះបានបញ្ជាក់ថា យោងតាមសាលដីការបស់សាលាឧទ្ធរណ៍ចុះថ្ងៃទី៣០ ខែឧសភា ឆ្នាំ២០១៦ ក៏បានច្រានចោលបណ្តឹងសុំមោឃភាពរបស់ក្រុមមេធាវីជនជាប់ចោទផងដែរ ដោយសភាស៊ើបសួរសាលាឧទ្ធរណ៍ចាត់ទុកថា នីតិវិធីរបស់តុលាការសាលាដំបូងរាជធានីភ្នំពេញជារឿងត្រឹមត្រូវ។

សូមបញ្ជាក់ថា លោក ហេង សុខណា ចៅក្រមជំនុំជម្រះសាលាដំបូងក្រុងភ្នំពេញ បានបើកសវនាការជំនុំជម្រះទោសលោក អ៊ុំ សំអាន កាលពីព្រឹកថ្ងៃទី៥ ខែកញ្ញា ឆ្នាំ២០១៦ដោយមេធាវីការពារសិទ្ធិជនជាប់ចោទ រួមមានលោក ហែម សុជាតិ លោក ជួង ជូងី និងលោក សំ សុគង់ បានដើរចេញពីបន្ទប់សវនាការ ក្រោមហេតុផលថា លោក អ៊ុំ សំអាន មានអភ័យឯកសិទ្ធិសភា ហើយបណ្ដឹងសុំមោឃភាពនីតិវិធីនៅដំណើរការនៅតុលាការកំពូលនៅឡើយ និងពួកគេយល់ថា ការបង្ហោះសំឡេង និយាយពីបញ្ហាព្រំដែនពុំមែនជាបទល្មើសនោះទេ៕