Post News Media ព័ត៌មានជាតិ សមត្ថកិច្ចកំព...

សមត្ថកិច្ចកំពុងតាមចាប់ខ្លួន សោម ឯក និងទណ្ឌិតម្នាក់ទៀតដែលបានលួចរត់ពីពន្ធនាគារ PJ

ចែកចាយបន្ត

ភ្នំពេញ: យោងតាមការបញ្ជាក់របស់លោក ពេជ្រ យ៉ុន ប្រធានពន្ធនាគាររាជធានីភ្នំពេញ បានថ្លែងប្រាប់តាមបណ្តាញទំនាក់ទំនងសង្គម Telegram ថា លោកស្រី សឺ វណ្ណនី ព្រះរាជអាជ្ញារងអមសាលាដំបូងរាជធានីភ្នំពេញ បានចេញដីកាតាមបង្គាប់ឲ្យចាប់ខ្លួន ចុះថ្ងៃទី១០ ខែតុលា ឆ្នាំ២០១៦ បង្គាប់ឲ្យសមត្ថកិច្ចតាមស្វែងរកចាប់ខ្លួន ទណ្ឌិតឈ្មោះ សោម ឯក ហៅ ជា គឹមហ៊ួន ដែលបានលួចរត់គេចខ្លួនពីមន្ទីរពេទ្យខ្មែរ-សូវៀត កាលពីម៉ោង១១ យប់ ថ្ងៃទី៨ ខែតុលា ឆ្នាំ២០១៦ ខណ:ដែលទណ្ឌិតរូបនេះកំពុងសម្រាកព្យាបាលជំងឺ។ លោក ពេជ្រ យ៉ុន បានបន្តថា ទណ្ឌិតឈ្មោះ សោម ឯក ហៅ ជា គឹមហ៊ួន បានដាក់ថ្នាំសណ្ដំ មន្ត្រីពន្ធនាគារដែលយាមកាម រួចក៏គេចខ្លួនបាត់ស្រមោល។

សូមបញ្ជាក់ថា ទណ្ឌិតឈ្មោះ សោម ឯក ហៅ ជា គឹមហ៊ួន ជាយោធា បម្រើការងារនៅក្នុងក្រសួងការពារជាតិនៅអំឡុងឆ្នាំ១៩៧៩ ដល់ឆ្នាំ២០០៣។ ទណ្ឌិតឈ្មោះ សោម ឯក កាលពីឆ្នាំ២០១១ ត្រូវបានតុលាការក្រុងភ្នំពេញ ផ្តន្ទាទោសដាក់ពន្ធនាគារកំណត់ចំនួន៤៦ឆ្នាំ ពីបទបង្កើតចលនាកងទ័ពក្បាលខ្លាដោយខុសច្បាប់ និងពីបទ បំផ្ទុះគ្រាប់ធ្វើភារវកម្មនៅមុខក្រសួងការពារជាតិ កាលពីថ្ងៃទី៧ ខែមករា ឆ្នាំ២០០៩។

លោក ពេជ្រ យ៉ុន បានបន្ថែមថា បច្ចុប្បន្នសមត្ថកិច្ចក៏កំពុងតាមចាប់ខ្លួន ជនជាប់ឃុំម្នាក់ឈ្មោះ អ៊ុក សុភី ភេទប្រុស ជាប់ចោទពីបទ ឃាតកម្ម (រង់ចាំសវនាការនៅសាលាឧទ្ធរណ៍) ដែលបានរត់គេចខ្លួនពីពន្ធនាគាររាជធានីភ្នំពេញដោយសុវត្ថិភាពកាលពីព្រឹកថ្ងៃទី៤ ខែកក្កដា ឆ្នាំ២០១៦កន្លង ខណ:រូបគេត្រូវបានអនុញ្ញាតឲ្យទៅធ្វើការនៅក្នុងផ្ទះបាយ ចំពេលដែលមន្ត្រីពន្ធនាគារកំពុងតែប្រជុំជួរទើបរូបគេបានយកកាំជណ្តើរឡើងតាមរបងខាងក្រោយរត់គេចខ្លួនតែម្តង៕

លួចរត់ពីគុក

លួចរត់ពីគុក

លួចរត់ពីគុក

លួចរត់ពីគុក