Post News Media ព័ត៌មានជាតិ សាកលវិទ្យាល័យ...

សាកលវិទ្យាល័យ គ័ងស៊ី បញ្ជូននិស្សិតជំនាញភាសាអង់គ្លេសចុះកម្មសិក្សានៅវិទ្យាល័យព្រះស៊ីសុវត្ថិ

ចែកចាយបន្ត

ភ្នំពេញ: ដោយមានកិច្ចសហប្រតិបត្តិការល្អជាមួយប្រទេសកម្ពុជាស្ទើរគ្រប់វិស័យនោះ នៅព្រឹកថ្ងៃទី១១ ខែតុលា ឆ្នាំ២០១៦នេះ សាកលវិទ្យាល័យ គ័ងស៊ី (Guangxi Teacher Education University) នៃសាធារណរដ្ឋប្រជាមានិតចិន បានរៀបចំពិធីបើកថ្នាក់កម្មសិក្សា ភាសាអង់គ្លេស នៅវិទ្យាល័យព្រះស៊ីសុវត្ថិ ដើម្បីផ្តល់ឱកាសឲ្យនិស្សិតចំនួន ២០រូបបានបង្រៀនភាសាអង់គ្លេសដល់សិស្សានុសិស្សនៃវិទ្យាល័យមួយនេះ ក្នុងគោលបំណងរឹតចំណងកិច្ចសហប្រតិបត្តិការលើវិស័យអប់រំបន្ថែមទៀត។

លោកស្រី ម៉ក់ ដានី នាយិការរងវិទ្យាល័យព្រះស៊ីសុវត្ថិ បានថ្លែងថា កម្មវិធីចុះកម្មសិក្សានេះមានរយ:ពេល ២៣ថ្ងៃដោយគិតចាប់ពីថ្ងៃទី១១ ខែតុលា ដល់ថ្ងៃទី៣ ខែវិច្ឆកា ឆ្នាំ២០១៦។ លោកស្រីបន្ថែមថា សិស្សដែលត្រូវចូលរួមសិក្សាក្នុងកម្មវិធីកម្មសិក្សានេះមានថ្នាក់ទី៧ ដល់ថ្នាក់ទី១១ ដែលបែងចែកជា ៦ថ្នាក់។ នាយិការរងរូបនេះក៏បានបញ្ជាក់អំពីគម្រោងរបស់វិទ្យាល័យ និងសាកលវិទ្យាល័យ គ័ងស៊ី ក្នុងចុះកិច្ចព្រមព្រៀងគ្នាដើម្បីផ្តល់ឲ្យដល់សិស្ស-និស្សិត ក្នុងការធ្វើទស្សនកិច្ចសិក្សាពីគ្នាទៅវិញទៅមក ផងដែរ។

លោកស្រី លីន សៅលី (Lin Shaoli) តំណាងសាកលវិទ្យាល័យ គ័ងស៊ី (Guangxi Teacher Education University) បានបញ្ជាក់ថា សាកលវិទ្យាល័យនេះបានបង្កើតឡើងតាំងពីឆ្នាំ១៩៥៣មកម្ល៉េះ ដោយផ្តល់ការអប់រំលើមុខជំនាញជាច្រើនភាសា រួមមាន ភាសាថៃ ឥណ្ឌូនេស៊ី អង់គ្លេស និងមានបង្រៀនពីវប្បធម៌នៃប្រទេសមួយចំនួនផងដែរ។ ឆ្លៀតក្នុងឱកាសនោះលោកស្រី បានថ្លែងអំណរគុណដល់ក្រសួងអប់រំ យុវជន និងកីឡា របស់ប្រទេសកម្ពុជា និងជាពិសេសលោក កែវ ធឿន អតីតអគ្គកុងស៊ុលកម្ពុជាប្រចាំទីក្រុង ណានីង ខេត្តគ័ងស៊ី នៃសាធារណរដ្ឋប្រជាមានិតចិន
ដែលបានផ្តល់ឱកាស និងជួយសម្របសម្រួលដល់និស្សិតរបស់ខ្លួនបានមកធ្វើកម្មសិក្សានៅវិទ្យាល័យព្រះស៊ីសុវត្ថិ នាពេលនេះ។ លោកស្រីក៏បាន សំដែងការសេចក្តីរីករាយ និងសេចក្តីសង្ឃឹមក្នុងការរក្សាបាននូវជំហកិច្ចសហប្រតិបត្តិការល្អ រវាងសាកលវិទ្យាល័យ និងក្រសួងអប់រំ យុវជន និងកីឡា ប្រទេសកម្ពុជា ដើម្បីកិច្ចការពង្រឹកគុណភាពអប់រំនៃប្រទេសទាំងពីរនាពេលអនាគតផងដែរ៕