Post News Media ព័ត៌មានជាតិ ចេញ​ពីផឹកស៊ី ...

ចេញ​ពីផឹកស៊ី ​ត្រូវ​ក្រុម​ជន​ទំនើង​ព្រួត​កាប់​រង​របួសធ្ងន់​

ចែកចាយបន្ត

ស្វាយរៀង: យុវជនម្នាក់ ដើរចេញពីកន្លែងផឹកស៊ី ឡើងជិះម៉ូតូបម្រុងចេញទៅផ្ទះ ស្រាប់តែមានក្រុមជនទំនើងមានគ្នាប្រមាណ៧ទៅ៨នាក់ មកកាប់យ៉ាងសាហាវ ដោយមិនដឹងមូលហេតុ បណ្តាលឲ្យត្រូវក្បាលមួយកាំបិត និងប្រអប់ដៃឆ្វេង២កាំបិតរងរបួសធ្ងន់ធ្ងរ។

ករណីកាប់ប្រហារពីក្រុមជនដៃដល់នេះ បានកើតឡើងកាលពីវេលាម៉ោង១យប់ រំលងអធ្រាត្រ ឈានចូលថ្ងៃទី១១ ខែតុលា ឆ្នាំ២០១៦ នៅចំណុចខាងមុខកាស៊ីណូថាយថេន ក្រុងបាវិត ស្ថិតនៅភូមិបាវិតកណ្តាល សង្កាត់បាវិត ក្រុងបាវិត។

នគរបាលប៉ុស្ដិ៍រដ្ឋបាលសង្កាត់បាវិត បានឲ្យដឹងថា ជនរងគ្រោះឈ្មោះ សួន សុភ័គ្រ ភេទប្រុស អាយុ២២ឆ្នាំ មានទីលំនៅក្នុងភូមិស្វាយ ឃុំរមាំងថ្កោល ស្រុកស្វាយទាប ជាបុគ្គលិកកាស៊ីណូក្រុងបាវិត។ សមត្ថកិច្ចបានបន្តទៀតថា ជនរងគ្រោះ ធ្វើការវេនថ្ងៃ ហើយពេលយប់បានទៅផឹកស៊ីនៅក្នុងហាងមួយខាងមុខកាស៊ីណូ ជាមួយមិត្តភក្តិម្នាក់ទៀត លុះដល់ពេលកើតហេតុបានដើរចេញមកយកម៉ូតូរួច ឡើងលើម៉ូតូរៀបបញ្ឆេះ ស្រាប់តែមានក្រុមជនទំនើង៧ទៅ៨នាក់មកព័ទ្ធកាប់ប្រហារតែម្តងមិនដឹងថា គេមានគំនុំ ឬយ៉ាងណានោះទេ។

បន្ទាប់ពីកើតហេតុ សមត្ថកិច្ចក៏ចុះទៅដល់កន្លែងកើតហេតុ ដើម្បីអន្តរាគមន៍ ក៏ប៉ុន្តែក្រុមជនពាលទាំងនោះ បានដឹងខ្លួនមុនក៏នាំគ្នារត់គេចខ្លួនបាត់អស់។ សមត្ថកិច្ចក៏បានហៅរថយន្តសាមុយដឹកជនរងគ្រោះបញ្ជូនមកមន្ទីរពេទ្យខេត្តដើម្បីសង្គ្រោះ។ បច្ចុប្បន្នសមត្ថកិច្ច កំពុងស្រាវជ្រាវរកមុខសញ្ញាជនដៃដល់យកមកផ្តន្ទាទោសតាមច្បាប់៕

photo_2016-10-11_17-28-40

photo_2016-10-11_17-28-37