Post News Media ព័ត៌មានជាតិ ទំនាស់ពាក្យសម...

ទំនាស់ពាក្យសម្ដី ផ្ទុះហិង្សា អ្នកចាញ់ដេកពេទ្យ អ្នកឈ្នះជាប់ខ្នោះ

ចែកចាយបន្ត

ភ្នំពេញ: ជនសង្ស័យម្នាក់ ត្រូវបានសមត្ថកិច្ចឃាត់ខ្លួនបានពីបទប្រើហិង្សាទៅលើជនរងគ្រោះ បណ្តាលឱ្យបែកក្បាលរងរបួសធ្ងន់ ត្រូវបានក្រុមគ្រួសារបញ្ជូនទៅមន្ទីរពេទ្យសង្គ្រោះបន្ទាន់ ។ ហេតុការណ៍នេះ បានកើតឡើងកាលពីវេលាម៉ោង១និង៣០នាទីរសៀល ថ្ងៃទី១១ ខែតុលា ឆ្នាំ២០១៦ នៅត្រង់ចំណុចមុខផ្ទះគ្មានលេខ ផ្លូវលំ ភូមិធំត្បូង សង្កាត់ពញាពន់ ខណ្ឌព្រែកព្នៅ រាជធានីភ្នំពេញ។

ប្រភពពីសមត្ថកិច្ចបានប្រាប់ឲ្យដឹងថា ជនសង្ស័យមានឈ្មោះ ប៉ាន់ ឃីម ភេទប្រុស អាយុ ៣៣ឆ្នាំ មុខរបរកសិករ។ ចំណែកជនរងគ្រោះមានឈ្មោះ យន់ សុផាត ភេទប្រុស អាយុ ៣៦ឆ្នាំ មុខរបរសន្តិសុខ បច្ចុប្បន្នអ្នកទាំង២នាក់ មានទីលំនៅក្នុងភូមិធំត្បូង សង្កាត់ពញាពន់ ខណ្ឌព្រែកព្នៅ។

សមត្ថកិច្ចបានបន្តថា នៅមុនពេលកើតហេតុជនសង្ស័យបានអង្គុយផឹកស្រាសអស់១លីត្រ ជាមួយមិត្តភក្តិដែលរស់នៅក្នុងភូមិជាមួយគ្នា ខណ:ពេលដែលកំពុងតែអង្គុយ ស្រាប់តែឃើញជនរងគ្រោះបានដើរចូលទៅកន្លែងផឹកស៊ីនោះដែរ ដោយនៅក្នុងស្ថានភាពស្រវឹង ហើយជនសង្ស័យក៏បានងើបដើរចេញទៅដេកនៅលើអង្រីងក្បែរនោះ។ ក្រោយមកជនរងគ្រោះក៏បានយកកន្ត្រៃនៅលើគ្រែផឹកស៊ីនោះ គោលបំណងទៅកាត់ខ្សែអង្រឹង ដោយឃើញដូចនោះ ជនសង្ស័យបានស្រែជេរទៅជនរងគ្រោះ ភ្លាមៗនោះ ជនរងគ្រោះបានយកកន្ត្រៃដែលខ្លួនកាន់ក្នុងដៃនោះ គប់ទៅលើជនសង្ស័យចំដើមទ្រូង និងបបូរមាត់។ ក្រោយមកជនសង្ស័យក៏ខឹង ហើយក៏បានស្ទុះពីអង្រីងទៅវាយចំមុខជនរងគ្រោះមួយដៃ ហើយក៏ត្រូវបានប្រជាពលរដ្ឋដែលនៅក្បែរកន្លែងកើតហេតុនោះ ចូលទៅបំបែកពួកគេចេញពីគ្នា។ ស្រាប់តែមួយស្ទុះក្រោយមក ជនរងគ្រោះបានដើរមកវិញម្តងទៀត ហើយក៏ជួបជាមួយនឹងជនសង្ស័យដែលកំពុងឈរនៅមុខផ្ទះ ដែលជាកន្លែងកើតហេតុ ក៏កើតមានទំនាស់ពាក្យសម្តីជាមួយគ្នាម្តងទៀត ហើយជនរងគ្រោះបានដកអាយកូម ពីចង្កេះស្ទុះចូលទៅរកវាយជនសង្ស័យ ភ្លាមៗនោះ ជនសង្ស័យក៏បានយកដំបងឫស្ស៊ីដែលនៅក្បែររបងវាយទៅលើជនរងគ្រោះបណ្តាលឲ្យបែកក្បាលរងរបួសធ្ងន់ ហើយត្រូវក្រុមគ្រួសារដឹកយកទៅមន្ទីរពេទ្យឯកជនដេរអស់ចំនួន១៩ថ្នេរ។

ក្រោយពីកើតហេតុ សមត្ថកិច្ចខណ្ឌព្រែកព្នៅបានចុះទៅដល់កន្លែងកើតហេតុ និងបានឃាត់ខ្លួនជនសង្ស័យយកមកប៉ុស្តិ៍ ដើម្បីធ្វើការសាកសួរ។ បច្ចុប្បន្នជនសង្ស័យ រួមនឹងវត្ថុតាង ត្រូវសមត្ថកិច្ចបញ្ជូនទៅឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌព្រែកព្នៅ ដើម្បីកសាងសំណុំរឿង បញ្ជូនទៅកាន់តុលាការ ចាត់ការបន្តតាមនីតិវិធីច្បាប់៕

photo_2016-10-12_11-45-29