Post News Media ព័ត៌មានជាតិ ថៅកែបិទទ្វាររ...

ថៅកែបិទទ្វាររោងចក្រមិនបើកប្រាក់ខែ កម្មករលើកគ្នាមកតវ៉ា សុំអន្តរាគមន៍ពីតុលាការ​

ចែកចាយបន្ត

ភ្នំពេញ: យ៉ាងហោចណាស់មានកម្មករកម្មការិនីរោងចក្រ ខូស៊ីក ហ្គាមែន ខូអិលធីឌី ប្រមាណជាជាង៣០នាក់ បានមកប្រមូលផ្ដុំគ្នានៅមុខសាលាដំបូងរាជធានីភ្នំពេញ នៅព្រឹកថ្ងៃទី១៣ ខែតុលា ឆ្នាំ២០១៦នេះ។ ការលើកគ្នាមកលើកបដាតវ៉ាបែបនេះ គឺក្នុងគោលបំណង ស្នើសុំឱ្យប្រធានសាលាដំបូងរាជធានីភ្នំពេញ លោក តាំង ស៊ុនឡាយ ជួយពួកគាត់ក្នុងការអន្តរាគមន៍ និងចេញដីការក្សាការពារឲ្យបានឆាប់រហ័ស បន្ទាប់ពីពួកគាត់ត្រូវបានថៅកែរោងចក្រខាងលើឆបោក មិនព្រមបើកប្រាក់ខែជូនពួកគាត់ ថែមទាំងបិទទ្វាររោងចក្ររត់ចោលកម្មករ ដោយមិនទាន់មានដំណោះស្រាយសមស្របអ្វីឡើយ។

លោក សេន សីហា ជាតំណាងកម្មករកម្មការិនីបានថ្លែងទៅកាន់ក្រុមអ្នកសារព័ត៌មានថា នៅព្រឹកនេះ លោកបានដឹកនាំកម្មករកម្មការិនីមកស្នើសុំឱ្យតុលាការជួយចេញដីការក្សាការពារ តបតាមពាក្យស្នើសុំ ដែលពួកគាត់បានដាក់មកតុលាការតាំងពីថ្ងៃទី២៣ ខែតុលា ឆ្នាំ២០១៦មកម្ល៉េះ។ លោកបន្តថា កម្មករដែលរងគ្រោះគឺមានចំនួន៤២៥នាក់ ដោយសហជីពរបស់រោងចក្រខាងលើ ធ្លាប់បានបើប្រាក់ខែជូនពួកគាត់មួយចំនួនដែរ ក៏ប៉ុន្តែការបើប្រាក់ខែនោះគឺ ពុំទាន់មានភាពសមស្របតាមច្បាប់ការងារនៅឡើយ ដូច្នេះពួកគាត់មិនអាចទទួលយកបានទេ។ លោកបានបញ្ជាក់ថា រោងចក្រ ខូស៊ីកហ្គាមែន ខូអិលធីឌី បានបិទទ្វារកាលពីថ្ងៃទី០៨ ខែកញ្ញា ឆ្នាំ២០១៦ ដោយមិនបានបញ្ជាក់មូលហេតុជូនកម្មករកម្មការិនី និងបានដឹកម៉ាស៊ីនដេរ រួមជាមួយ ទ្រព្យសម្បត្តិផ្សេងៗ ចេញពីរោងចក្រដោយគ្មានដំណោះស្រាយជូនកម្មករកម្មការិនីបន្ថែមទៀតឡើយ។

សូមជម្រាបថា ពាក្យសុំដីការឹបអូសបណ្ដោះអាសន្ន របស់ក្រុមកម្មករកម្មការិនី មានកម្មវត្ថុ ស្នើសុំឱ្យតុលាការ ចេញដីកា រឹបអូសបណ្ដោះអាសន្ននូវអគារ ចលនទ្រព្យ និងអចលនទ្រព្យ ដែលជាទ្រព្យសម្បត្តិទាំងអស់របស់ រោងចក្រ ខូស៊ីកហ្គាមែន ខូអិលធីឌី ស្ថិតក្នុងភូមិចុងខ្សាច់ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ដើម្បីលក់ឡៃឡុង សងសំណង ដល់កម្មករនិយោជិត ប្រសិនបើថៅកែរោងចក្រនៅតែមិនមានដំណោះស្រាយ បើកប្រាក់ខែជូនពួកគាត់៕