Post News Media ព័ត៌មានជាតិ ដាក់លេខរឺយែថយ...

ដាក់លេខរឺយែថយ បែរជាច្រឡំដាក់លេខស្ទុះបុកសមាជិកគ្រួសារ៣នាក់ ស្លាប់និងរបួស

ចែកចាយបន្ត

បន្ទាយមានជ័យ: សមត្ថកិច្ចស្រុកមង្គលបូរី បានប្រាប់អង្គភាព Post News ឲ្យដឹងថានៅល្ងាចថ្ងៃទី១៣ ខែតុលា ឆ្នាំ២០១៦ ម្សិលមិញនេះមានករណីភ្ញាក់ផ្អើលនិងរន្ធត់មួយបានកើតឡើងបន្ទាប់ពីមានសមាជិកគ្រួសារមួយបានស្លាប់ភ្លាមៗចំនួនពីរនាក់និងរបួសធ្ងន់ម្នាក់ ខណ:រថយន្តឆ្លាមមួយគ្រឿងបើកបរដោយសមាជិកគ្រួសារបើកបុកពេញទំហឹង។ ហេតុការណ៍នេះកើតឡើងនៅក្នុងគ្រួសារមួយរស់នៅក្នុងភូមិហ្លួង ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ។

យោងតាមសម្តីរបស់សមាជិកគ្រួសាររងគ្រោះបាននិយាយថា នៅមុនពេលកើតហេតុគឺរថយន្តចតនៅមុខផ្ទះ ទើសទ្វារបិទមិនបានក៏ប្រាប់ឲ្យឈ្មោះ សែម សុផា ភេទប្រុស អាយុ៣៤ឆ្នាំ ត្រូវជាកូនប្រសារឡើងបើកថយដើម្បីបិទទ្វារ។តែមិនដឹងជាហេតុអីស្រាប់តែរថយន្តនោះមិនថយក្រោយបែរជាបើកទៅមុខយ៉ាងលឿនបុកសមាជិកគ្រួសារខ្លួនដែលឈរនៅពីមុខពេញទំហឹងបណ្តាលឲ្យស្លាប់ភ្លាមៗចំនួនពីរនាក់និងរបួសធ្ងន់ម្នាក់នៅនឹងកន្លែង ។ ក្រោយបង្ករកូនប្រសាររូបនោះក៏បានបើករថយន្តគេចខ្លួនបាត់ស្រមោល។

លោក រស់ សំបូរ មេបញ្ជាការមូលដ្ឋានអាវុធហត្ថស្រុកមង្គលបូរីបានប្រាប់អង្គភាព Post News ឲ្យដឹងថា អ្នកស្លាប់ក្នុងហេតុការណ៍គ្រោះថ្នាក់ចរាចរណ៍ខាងលើនេះទី១មានឈ្មោះ វីស្រីល័ក្ខ ភេទស្រី អាយុ២៥ឆ្នាំ។ ទី២ឈ្មោះ ក្រិម ប៊ុន ភេទប្រុសអាយុ១៦ឆ្នាំ ត្រូវជាប្អូនថ្លៃ និងទី៣ឈ្មោះ ចែម សាមេន ភេទស្រី ត្រូវជាម្តាយក្មេក រងរបួសធ្ងន់។

បន្ទាប់ពីបានធ្វើកោសល្យបច្ច័យសមត្ថកិច្ចសន្និដ្ឋានថាគ្រោះថ្នាក់នេះគឺបង្ករឡើងពីការធ្វេសប្រហែសរបស់អ្នកបើកបរ គឺមានការភន្ត័ច្រឡំក្នុងការដាក់លេខដោយដាក់លេខទៅមុខស្មានតែដាក់លេខរឺយែទើបបង្កឲ្យមានសោកនាដកម្មដូច្នេះ។

បច្ចុប្បន្នសពត្រូវបានក្រុមគ្រួសារកំពុងប្រារព្ធពីធីបុណ្យតាមប្រពៃណីនៅគេហដ្ឋានរបស់ជនរងគ្រោះ៕

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍