Post News Media ព័ត៌មានជាតិ សេចក្តីថ្លែងក...

សេចក្តីថ្លែងការណ៍រួមរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន

ចែកចាយបន្ត

ភ្នំពេញ: ព្រះរាជាណាចក្រកម្ពុជា និងសាធារណរដ្ឋប្រជានិតចិន បានចេញសេចក្តីថ្លែងការណ៍រួមមួយ ក្នុងនោះគឺ
១. តបតាមការអញ្ជើញរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ប្រធានាធិបតី ស៊ី ជីនពីង នៃសាធារណរដ្ឋប្រជាមានិតចិន បានបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា ពីថ្ងៃទី១៣ ដល់ ១៤ ខែ តុលា ឆ្នាំ ២០១៦។
ក្នុងឱកាសទស្សនកិច្ច ប្រធានាធិបតី ស៊ី ជីនពីង បានចូលក្រាបបង្គំគាល់ព្រះករុណា នរោត្តម សីហមុនី ព្រះមហាក្សត្រកម្ពុជា និងជួបជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា ដាច់ដោយឡែកពីគ្នា ។ ភាគីទាំងពីរបានផ្លាស់ប្តូរទស្សន:គ្នាយ៉ាងលម្អិតលើការធ្វើឲ្យកាន់តែស៊ីជម្រៅថែមទៀតនូវកិច្ចសហប្រតិបត្តិការនៃភាពជាដៃគូយុទ្ធសាស្រ្តគ្រប់ជ្រុងជ្រោយកម្ពុជា-ចិន ស្ថិតក្នុងកាល:ទេស:ថ្មី និងលើបញ្ហាដែលជាផលប្រយោជន៍ទៅវិញទៅមកក្នុងក្របខណ្ឌតំបន់ និងអន្តរជាតិ ក្នុងបរិយាកាសមិត្តភាព និងស្និទ្ធស្នាល និងបានឈានទៅរកការព្រមព្រៀងជាឯកច្ឆ័ន្ទយ៉ាងច្រើន ។

២. ភាគីទាំងពីរបានសំដែងនូវការពេញចិត្តចំពោះសមិទ្ធិផលនៃការអភិវឌ្ឍសង្គម និងសេដ្ឋកិច្ចរបស់ប្រទេសទាំងពីររៀងៗខ្លួន។ ភាគីចិនសូមជូនពរដោយស្មោះស្ម័គ្រជូនចំពោះប្រជាជនកម្ពុជា សូមសម្រេចបាននូវវឌ្ឍនភាពយ៉ាងធំធេងក្នុងការថែរក្សាស្ថេរភាពក្នុងប្រទេស ជំរុញការអភិវឌ្ឍសេដ្ឋកិច្ច ធ្វើឲ្យប្រសើរឡើងជីវភាពរស់នៅរបស់ប្រជាជន និងលើកកម្ពស់តួនាទីរបស់កម្ពុជាក្នុងឆាកអន្តរជាតិ ។ ភាគីកម្ពុជា សូមជូនពរដោយស្មោះស្ម័គ្រជូនចំពោះប្រជាជនចិន សូមសម្រេចបានគោលដៅពីរសតវត្ស អាចកសាងបាននូវសង្គមដែលរីកចម្រើនគ្រប់ជ្រុងជ្រោយសម្រាប់ទាំងអស់គ្នា កសាងប្រទេសសង្គមនិយមទំនើបដែលរីកចម្រើន ប្រជាធិបតេយ្យ មានអារ្យធម៌ខ្ពង់ខ្ពស់ និងសុខុដុមរមនា ព្រមទាំងសម្រេចបាននូវសុបិន្តរបស់ប្រទេសចិន ក្នុងការធ្វើឲ្យប្រជាជាតិចិនរីកចម្រើនរុងរឿងឡើងវិញ។

៣. ភាគីទាំងពីរបានឯកភាពគ្នាថា មិត្តភាពជាប្រពៃណីកម្ពុជា-ចិន ដែលត្រូវបានបង្កើតរួមគ្នា និងថែរក្សាដោយប្រុងប្រយត្នដោយព្រះករុណា ព្រះវររាជបិតា ព្រះបរមរតនកោដ្ឋ នរោត្តម សីហនុ និងថ្នាក់ដឹកនាំចិនជំនាន់មុន រួមមានលោកប្រធាន ម៉ៅ សេទុង នាយករដ្ឋមន្ត្រី ជូ អេនឡាយ ព្រមទាំងថ្នាក់ដឹកនាំសំខាន់ៗផ្សេងទៀត កាន់តែរឹងមាំក្នុងរយ:ពេលកន្លងទៅ ហើយគួរតែត្រូវបន្តថែរក្សា និងជំរុញទៅវិញទៅមកបន្ថែមទៀត។ ក្នុងពេលដែលសភាពការណ៍តំបន់ និងអន្តរជាតិមានការប្រែប្រួលយ៉ាងខ្លាំង និងស្មុគស្មាញ ភាគីទាំងពីរនឹងបន្តពង្រឹងការប្រាស្រ័យទាក់ទងគ្នា ធ្វើឲ្យកាន់តែស៊ីជម្រៅនូវកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមក បន្តពង្រីកកិច្ចសហប្រតិបត្តិការនៃភាពជាដៃគូយុទ្ធសាស្រ្តគ្រប់ជ្រុងជ្រោយ ផ្តល់ផលប្រយោជន៍កាន់តែប្រសើរឡើងដល់ប្រជាជននៃប្រទេសទាំងពីរ និងចូលរួមចំណែកជាវិជ្ជមានដល់ការលើកកម្ពស់សន្តិភាព សេ្ថរភាព និងវិបុលភាពក្នុងតំបន់ និងអន្តរជាតិ ។

៤. ភាគីទាំងពីរបានឯកភាពគ្នារក្សាទម្លាប់ល្អក្នុងការផ្លាស់ប្តូរទស្សនកិច្ចជាន់ខ្ពស់ ។ ថ្នាក់ដឹកនាំនៃប្រទេសទាំងពីរនឹងបន្តប្រាស្រ័យទាក់ទងគ្នា តាមរយ:មធ្យោបាយផ្សេងៗ ដើម្បីផ្លាស់ប្តូរទស្សន:គ្នាលើបញ្ហានៃទំនាក់ទំនងទ្វេភាគី ព្រមទាំងសភាពការណ៍តំបន់ និងអន្តរជាតិ ឲ្យបានទាន់ពេលវេលា ដើម្បីនាំការអភិវឌ្ឍទំនាក់ទំនងកម្ពុជា-ចិន ឆ្ពោះទៅរកសករាជថ្មី ។ ភាគីទាំងពីរបានឯកភាពគ្នាបង្កើនការផ្លាស់ប្តូរ និងកិច្ចសហប្រតិបត្តិការរវាងរដ្ឋាភិបាល សភា គណបក្ស និងរដ្ឋបាលថ្មាក់មូលដ្ឋាន ធ្វើការប្រាស្រ័យទាក់ទងឲ្យកាន់តែស៊ីជម្រៅថែមទៀតលើបទពិសោធន៍អភិបាលកិច្ច ព្រមទាំងបង្កើនទំនាក់ទំនង និងការសម្របសម្រួលគ្នាឲ្យបានច្រើនកម្រិត ។ ភាគីទាំងពីរបានឯកភាពគ្នាប្រើប្រាស់ឲ្យបានល្អនូវយន្តការគណ:កម្មាធិការសម្របសម្រួលអន្តររដ្ឋាភិបាលរវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋប្រជាមានិតចិន ព្រមទាំងសម្របសម្រួល និងជំរុញកិច្ចសហប្រតិបត្តិការជាក់ស្តែងលើវិស័យទាំងអស់ឲ្យបានគ្រប់ជ្រុងជ្រោយ ។

៥. ភាគីទាំងពីរបានឯកភាពគ្នាបន្តបង្កើនការផ្លាស់ប្តូរ និងកិច្ចសហប្រតិបត្តិការលើកិច្ចការបរទេស ការពារជាតិ ព្រមទាំងការអនុវត្តច្បាប់ និងការពង្រឹងសន្តិសុខ។ ភាគីទាំងពីរបានឯកភាពគ្នាអនុវត្តពិធីសារស្តីពីកិច្ចសហប្រតិបត្តិការរវាងក្រសួងការបរទេសទាំងពីរ និងកិច្ចព្រមព្រៀងស្តីពីការបង្កើនកិច្ចសហប្រតិបត្តិការក្នុងស្ថានភាពថ្មី ដែលចុះហត្ថលេខាក្នុងឱកាសទស្សនកិច្ចនេះ ព្រមទាំងពង្រឹងការប្រាស្រ័យទាក់ទង និងការសម្របសម្រួលគ្រប់កម្រិត។ ភាគីទាំងពីរនឹងរក្សាទំនាក់ទំនងគ្រប់កម្រិតរវាងកងទ័ពនៃប្រទេសទាំងពីរ ធ្វើឲ្យកាន់តែស៊ីជម្រៅនូវកិច្ចសហប្រតិបត្តិការលើវិស័យបណ្តុះបណ្តាល កងទ័ព និងមន្ត្រីយោធា ការធ្វើសមយុទ្ធយោធា និងសម្ភារ:ឡូជីស្ទីក ជាដើម ព្រមទាំងបង្កើនកិច្ចសហប្រតិបត្តិការលើកិច្ចការសន្តិសុខពហុភាគី។ ភាគីទាំងពីរនឹងធ្វើការរួមគ្នាដើម្បីប្រយុទ្ធប្រឆាំងឧក្រិដ្ឋកម្មឆ្លងដែន ការជួញដូរមនុស្ស ការចាប់ជំរិតតាមប្រព័ន្ធទូរគមនាគមន៍ ភេរវកម្ម ការជួញដូរថ្នាំញៀន និងបង្កើនកិច្ចសហប្រតិបត្តិការលើការកសាងសមត្ថភាពផែ្នកអនុវត្តច្បាប់ ព្រមទាំងការផ្លាស់ប្តូរការឧបត្ថម្ភគ្នាលើផ្នែកស៊ើបអង្កេតបទល្មើស ធ្វើការរួមគ្នាដើម្បីថែរក្សាសន្តិសុខជាតិក្នុងប្រទេសទាំងពីរ និងស្ថេរភាពតំបន់ ។

៦. ភាគីទាំងពីរបានឯកភាពគ្នាផ្តល់សារ:សំខាន់ និងធ្វើឲ្យកាន់តែស៊ីជម្រៅនូវកិច្ចសហប្រតិបត្តិការកម្ពុជា-ចិន ពីទស្សន:យុទ្ធសាស្រ្ត ព្រមទាំងស្វែងរកបន្ថែមទៀតនូវសក្តានុពល និងបង្កើនកម្រិតនៃកិច្ចសហប្រតិបត្តិការនេះ ។
(1) ភាគីទាំងពីរសូមកោតសរសើរចំពោះការរីកចម្រើនជាវិជ្ជមាននៃកិច្ចសហប្រតិបត្តិការសេដ្ឋកិច្ច និងសង្គម ហើយនឹងពន្លឿនការសម្របសម្រួលប្រកបដោយប្រសិទ្ធភាពចំពោះគំនិតផ្តួចផ្តើមខ្សែក្រវ៉ាត់មួយ ផ្លូវមួយ និងផែនការប្រាំឆ្នាំលើកទី១៣របស់ចិន ជាមួយយុទ្ធសាស្រ្តចតុកោណ និងគោលនយោបាយអភិវឌ្ឍវិស័យឧស្សាហកម្ម ឆ្នាំ២០១៥-២០២៥ រៀបចំ និងអនុវត្តផែនការគោលសម្រាប់ការរួមគ្នាជំរុញកិច្ចសហប្រតិបត្តិការស្តីពីគំនិតផ្តួចផ្តើមខ្សែក្រវ៉ាត់មួយ ផ្លូវមួយ ព្រមទាំងអនុវត្តបញ្ជីគម្រោងអាទិភាពនៃកិច្ចសហប្រតិបត្តិការសមត្ថភាពផលិត និងវិនិយោគ ។
(2) ភាគីទាំងពីរនឹងពង្រឹងផែនការទាំងមូល និងលើកម្ពស់បន្ថែមទៀតនូវទំហំ និងកម្រិតនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគី ។ ភាគីទាំងពីរនឹងមានវិធានការពង្រីកទំហំពាណិជ្ជកម្មទ្វេភាគី ដើម្បីឈានទៅសម្រេចបានទំហំពាណិជ្ជកម្មប្រចាំឆ្នាំចំនួន ៥.០០០ លានដុល្លារអាមេរិក នៅឆ្នាំ២០១៧។ (3) ភាគីចិននឹងលើកទឹកចិត្តសហគ្រាសចិនដែលមានសមត្ថភាព និងល្បីល្បាញ ឲ្យបង្កើនកិច្ចសហប្រតិបត្តិការជាមួយភាគីកម្ពុជា លើវិស័យសំខាន់ៗដូចជា ហេដ្ឋារចនាសម្ព័ន្ធ ថាមពល គមនាគមន៍ កសិកម្ម ឧស្សាហកម្ម និងទេសចរណ៍ ព្រមទាំងបន្តអនុវត្តតំបន់សេដ្ឋកិច្ចពិសេសខេត្តព្រះសីហនុ និងគម្រោងផ្សេងៗទៀត។

(4) ភាគីចិនត្រៀមខ្លួនរួចជាស្រេចក្នុងការបន្តផ្តល់ជំនួយតាមសមត្ថភាពរបស់ខ្លួន ដល់កម្ពុជា ដើម្បីអភិវឌ្ឍសេដ្ឋកិច្ច និងលើកកម្ពស់ជីវភាពប្រជាជន និងគាំទ្រការអភិវឌ្ឍហេដ្ឋារចនាសម្ព័ន្ធនៅកម្ពុជា រួមមានវិស័យដឹកជញ្ជូន ថាមពល ទូរគមនាគមន៍ កសិកម្ម និងការគ្រប់គ្រងប្រព័ន្ធទឹក។ ភាគីកម្ពុជា សូមថ្លែងអំណរគុណចំពោះការគាំទ្រផ្នែកហិរញ្ញវត្ថុ និងការវិនិយោគដែលមានប្រសិទ្ធភាពរបស់ភាគីចិន។

៧. ភាគីទាំងពីរបានឯកភាពគ្នាពង្រីកបន្ថែមទៀតនូវការផ្លាស់ប្តូរ និងកិច្ចសហប្រតិបត្តិការលើវិស័យកសិកម្ម សមុទ្រ វិទ្យាសាស្ត្រ និងបច្ចេកវិទ្យា អប់រំ វប្បធម៌ សុខាភិបាល ទេសចរណ៍ និងទំនាក់ទំនងប្រជាជន និងប្រជាជន ។ ភាគីទាំងពីរនឹងខិតខំធានាឲ្យកិច្ចប្រជុំលើកទី២ នៃគណ:កម្មាធិការដឹកនាំ ស្តីពីកិច្ចសហប្រតិបត្តិការកសិកម្មឲ្យទទួលបានជោគជ័យ។ ភាគីទាំងពីរបានឯកភាពគ្នាបង្កើនកិច្ចសហប្រតិបត្តិការសមុទ្រ។ ភាគីចិននឹងផ្តល់អាហារូបករណ៍របស់រដ្ឋាភិបាលជាច្រើនទៀតដល់កម្ពុជា និងបណ្តុះបណ្តាលបច្ចេកទេសដល់អ្នកមានទេពកោសល្យវ័យក្មេងកម្ពុជា។ ភាគីកម្ពុជានឹងបន្តជួយសម្រួលការគ្រប់គ្រងមជ្ឈមណ្ឌលវប្បធម៌ចិន និងវិទ្យាស្ថានខុងជឺ ឲ្យកាន់តែមានប្រសិទ្ធភាព ។ ភាគីចិននឹងលើកទឹកចិត្តប្រជាជនចិនឲ្យមកទេសចរណ៍នៅកម្ពុជាឲ្យកាន់តែច្រើន។ ភាគីទាំងពីរនឹងបង្កើនទំនាក់ទំនងមិត្តភាពរវាងយុវជន ដើម្បីរៀបចំអ្នកបន្តវេនសម្រាប់មិត្តភាពកម្ពុជា-ចិន ព្រមទាំងពង្រឹងមូលដ្ឋានគាំទ្រជាសាធារណ:ចំពោះទំនាក់ទំនងមិត្តភាពទ្វេភាគី ដើម្បីឲ្យប្រទេសទាំងពីរក្លាយជាអ្នកជិតខាងល្អ មិត្តល្អ បងប្អូនល្អ និងដៃគូល្អ ជារៀងរហូត ។

៨. ភាគីទាំងពីរយល់ឃើញថា បញ្ហាសមុទ្រចិនខាងត្បូងមិនមែនជាបញ្ហារវាងចិន និងអាស៊ាននោះទេ។ បញ្ហានេះគួរតែត្រូវដោះស្រាយតាមរយ:ការពិគ្រោះយោបល់ជាលក្ខណ:មិត្តភាព និងការចរចាដោយសន្តិវិធី ដែលធ្វើឡើងដោយរដ្ឋអធិបតេយ្យដែលពាក់ព័ន្ធផ្ទាល់ ។ ចិន និងអាស៊ានគួរតែបន្តអនុវត្តឲ្យបានពេញលេញ និងមានប្រសិទ្ធភាពនូវសេចក្តីថ្លែងការណ៍ស្តីពីការប្រតិបត្តិរបស់ភាគីនៅសមុទ្រចិនខាងត្បូង (DOC) និងជំរុញឲ្យ«ក្រមប្រតិបត្តិនៅសមុទ្រចិនខាងត្បូង» សម្រេចឲ្យបានឆាប់ ដោយឈរលើគោលការណ៍កុងសង់ស៊ីសទៅវិញទៅមក តាមរយ:ការពិគ្រោះយោបល់។ ចិន និងអាស៊ានគួរតែជំរុញកិច្ចសហប្រតិបត្តិការជាក់ស្តែងឲ្យកាន់តែសកម្ម និងរួមគ្នាថែរក្សាសន្តិភាព និងស្ថេរភាពនៅសមុទ្រចិនខាងត្បូង ដើម្បីធ្វើឲ្យតំបន់នេះ ជាតំបន់សមុទ្រដែលមានសន្តិភាព មិត្តភាព និងកិច្ចសហប្រតិបត្តិការ។

៩. ភាគីចិនបានបញ្ជាក់សារជាថ្មីនូវការគាំទ្រយ៉ាងម៉ឺងម៉ាត់ ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដើម្បីការពារអធិបតេយ្យភាព ឯករាជ្យភាព និងរក្សាស្ថេរភាពនយោបាយរបស់កម្ពុជា។ ភាគីកម្ពុជាបានបញ្ជាក់សារជាថ្មីនូវការប្តេជ្ញារបស់ខ្លួនចំពោះគោលនយោបាយចិនតែមួយ ទទួលស្គាល់រដ្ឋាភិបាលនៃសាធារណរដ្ឋប្រជាមានិតចិន ជារដ្ឋាភិបាលចិនស្របច្បាប់តែមួយគត់ ហើយតៃវ៉ាន់ជាផ្នែកមួយដែលមិនអាចកាត់ផ្តាច់បានរបស់ចិន ប្រឆាំងការប្រកាសឯករាជ្យរបស់តៃវ៉ាន់ទោះក្នុងទម្រង់ណាក៏ដោយ ព្រមទាំងការបន្តគាំទ្រការអភិវឌ្ឍដោយសន្តិភាព និងបុព្វហេតុដ៏ធំធេងក្នុងការបង្រួបបង្រួមប្រទេសចិនដោយសន្តិវិធី។ ភាគីចិនសូមវាយតម្លៃខ្ពស់ចំពោះការយោគយល់ និងការគាំទ្ររបស់ភាគីកម្ពុជា។

១០. ភាគីទាំងពីរបានឯកភាពគ្នាលើកកម្ពស់ការសម្របសម្រួល និងកិច្ចសហប្រតិបត្តិការបន្ថែមទៀតក្នុងវេទិកាពហុភាគី ដូចជាអង្គការសហប្រជាជាតិ កិច្ចប្រជុំអាស៊ី-អឺរ៉ុប កិច្ចសហប្រតិបត្តិការអាស៊ីបូព៌ា និងកិច្ចសហប្រតិបត្តិការមេគង្គ-ឡានឆាង ព្រមទាំងបន្តរក្សាការសម្របសម្រួលដោយជិតស្និទ្ធ ឲ្យបានទាន់ពេលវេលា និងមានប្រសិទ្ធភាពលើបញ្ហាពាក់ព័ន្ធនឹងផលប្រយោជន៍សំខាន់រៀងៗខ្លួន និងធ្វើការគាំទ្រទៅវិញទៅមក។
ភាគីកម្ពុជាសំដែងនូវការអបអរសាទរចំពោះភាគីចិន ដែលបានរៀបចំកិច្ចប្រជុំកំពូល G20 នៅទីក្រុងហាងចូវ ប្រកបដោយជោគជ័យ និងសូមវាយតម្លៃខ្ពស់ចំពោះការចូលរួមចំណែកជាវិជ្ជមានរបស់ចិន ដល់ការរីកចម្រើននៃសេដ្ឋកិច្ចពិភពលោក និងការអភិវឌ្ឍអនុតំបន់។ ភាគីចិនសូមកោតសរសើរកម្ពុជា ដែលបានដើរតួនាទីសំខាន់ក្នុងការជំរុញទំនាក់ទំនងអាស៊ាន-ចិន និងកិច្ចសហប្រតិបត្តិការអាស៊ីបូព៌ា ។

១១. ក្នុងឱកាសទស្សនកិច្ចនេះ ភាគីទាំងពីរបានចុះហត្ថលេខាលើឯកសារកិច្ចសហប្រតិបត្តិការចំនួន ៣១ រួម កិច្ចព្រមព្រៀង
អនុស្សារណ:នៃការយោគយល់គ្នាស្តីពីការរៀបចំផែនការគោលសម្រាប់ការរួមគ្នាជំរុញកិច្ចសហប្រតិបត្តិការស្តីពីគំនិតផ្តួចផ្តើមខែ្សក្រវ៉ាត់មួយ ផ្លូវមួយ កិច្ចព្រមព្រៀងស្តីពីការបង្កើនកិច្ចសហប្រតិបត្តិការលើការទប់ស្កាត់ និងប្រឆាំងការជួញដូរមនុស្ស កិច្ចព្រមព្រៀងស្តីពីការចៀសវាងការយកពន្ធត្រួតគ្នាអនុស្សារណ:នៃការយោគយល់គ្នាស្តីពីគម្រោងអាទិភាពនៃសមត្ថភាពផលិត និងកិច្ចសហប្រតិបត្តិការវិនិយោគ អនុស្សារណ:នៃការយោគយល់គ្នាស្តីពីកិច្ចសហប្រតិបត្តិការផ្លាស់ប្តូរព័ត៌មាន និងកិច្ចសហប្រតិបត្តិការលើការពង្រឹងសន្តិសុខក្នុងប្រទេស លិខិតប្តូរសារស្តីពីគម្រោងអាគារវេជ្ជសាស្រ្តមិត្តភាពកម្ពុជា-ចិន អនុស្សារណ:នៃការយោគយល់គ្នាស្តីពីកិច្ចសហប្រតិបត្តិការសមុទ្រ អនុស្សារណ:នៃការយោគយល់គ្នាស្តីពីកិច្ចសហប្រតិបត្តិការសុខាភិបាល កិច្ចព្រមព្រៀងស្តីពីវិទ្យុ និងទូរទស្សន៍។

១២. ភាគីទាំងពីរបានឯកភាពគ្នាថា ទស្សនកិច្ចផ្លូវរដ្ឋរបស់ប្រធានាធិបតី ស៊ី ជីនពីង នៅព្រះរាជាណាចក្រកម្ពុជាបានបញ្ចប់ទៅដោយជោគជ័យ។ នេះជាព្រឹត្តិការណ៍សំខាន់នៃទំនាក់ទំនងទ្វេភាគី និងបានធ្វើឲ្យមិត្តភាពជាប្រពៃណីរវាងកម្ពុជា និងចិន កាន់តែរឹងមាំបន្ថែមទៀត ព្រមទាំងលើកកម្ពស់កិច្ចសហប្រតិបត្តិការនៃភាពជាដៃគូយុទ្ធសាស្ត្រគ្រប់ជ្រុងជ្រោយនៃប្រទេសទាំងពីរទៅកំរិតខ្ពស់ថ្មីមួយទៀត។

ប្រធានាធិបតី ស៊ី ជីនពីង សូមសម្តែងនូវអំណរគុណយ៉ាងស្មោះអស់ពីដួងចិត្តថ្វាយព្រះករុណា ព្រះមហាក្សត្រ នរោត្តម សីហមុនី ជូនរាជរដ្ឋាភិបាលកម្ពុជា និងប្រជាជនកម្ពុជា ចំពោះការទទួលស្វាគមន៍ដ៏ល្អប្រសើរ កក់ក្តៅ និងរាក់ទាក់ប្រកបដោយភាពជិតស្និទ្ធ ហើយក៏សូមយាងព្រះករុណា ព្រះមហាក្សត្រ នរោត្តម សីហមុនី បំពេញព្រះរាជទស្សនកិច្ចនៅប្រទេសចិនម្តងទៀត តាមពេលវេលាសមស្រប ។ ព្រះករុណា ព្រះមហាក្សត្រ នរោត្តម សីហមុនី បានថ្លែងអំណរគុណចំពោះការយាងអញ្ជើញ និងទទួលយកការយាងអញ្ជើញ ជាមួយនឹងព្រះទ័យរីករាយ៕

photo_2016-10-14_18-56-36

photo_2016-10-14_18-56-39

photo_2016-10-14_18-56-41

photo_2016-10-14_18-56-43

photo_2016-10-14_18-56-45

photo_2016-10-14_18-56-46