Post News Media ព័ត៌មានជាតិ រថយន្តនាយកដ្ឋ...

រថយន្តនាយកដ្ឋានអន្តោប្រវេសន៍បុកត្រាក់ទ័រក្រឡាប់ធ្លាក់ពីលើផ្លូវ បណ្តាលឲ្យស្ត្រីម្នាក់របួសធ្ងន់

ចែកចាយបន្ត

ពោធិ៍សាត់: គ្រោះថ្នាក់ចរាចរណ៍មួយបង្កឡើង ដោយរថយន្តរបស់នាយកដ្ឋានអន្តោប្រវេសន៍ បានបើកទៅបុកជាមួយនឹងត្រាក់ទ័រដែលកំពុងបើកបរស្របទិសគ្នានៅខាងមុខយ៉ាងពេញទំហឹង បណ្តាលឲ្យក្រឡាប់ត្រាក់ទ័រធ្លាក់ពីលើផ្លូវស្ត្រីម្នាក់រងរបួសធ្ងន់ ។ ហេតុការណ៍នេះបានកើតឡើងកាលពីវេលាម៉ោង ៦និង២០នាទីយប់ថ្ងៃទី ១៤ ខែតុលា ឆ្នាំ២០១៦ ស្ថិតនៅចំណុចផ្លូវជាតិលេខ៥ ចន្លោះគីឡូម៉ែត្រលេខ ១៤៤-១៤៥ ក្នុងភូមិត្រពាំងរំដេញ ឃុំក្បាលត្រាច ស្រុកក្រគរ ខេត្តពោធិ៍សាត់។

សមត្ថកិច្ចបានឲ្យដឹងថាស្ត្រីរងគ្រោះដែលរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍ខាងលើនេះ មានឈ្មោះ រស់ គឹមស៊ី រងរបួសធ្ងន់ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យខេត្តពោធិ៍សាត់ ត្រូវជាប្រពន្ធរបស់អ្នកបើកត្រាក់ទ័រឈ្មោះ រស់ ចំរើន ដោយមានកូនស្រីឈ្មោះ សុខ ស៊ាវម៉ី អាយុ៤ឆ្នាំរួមដំណើរជាមួយ អ្នកទាំង៣នាក់ ស្នាក់នៅក្នុងភូមិស្តុកខ្លា ឃុំរំលិច ស្រុកបាកាន ខេត្តពោធិ៍សាត់។ ចំណែករថយន្តបង្ករបើកបរដោយឈ្មោះ នូវ ប្រុស ភេទប្រុស អាយុ២៧ឆ្នាំ ធ្វើកានៅនាយកដ្ឋានអន្តោប្រវេសន៍ក្រសួងមហាផ្ទៃ រួមដំណើរជាមួយនិងមនុស្ស២នាក់ទៀតរួមមានឈ្មោះ អ៊ុង ចាន់ធួក ភេទប្រុស អាយុ៤៧ឆ្នាំ ភេទប្រុស ស្នាក់នៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ និងឈ្មោះ ប៊ុន សុគន្ធនី អាយុ៤៨ឆ្នាំ ភេទប្រុស ស្នាក់នៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

យោងតាមរបាយការណ៍សមត្ថកិច្ចបានឲ្យដឹងទៀតថា មុនពេលកើតហេតុ គេបានឃើញរថយន្តរបស់អគ្គនាយកដ្ឋានអន្តោប្រវេសន៍ម៉ាក ឡិចស៊ីស RX-400 ពណ៌ស ពាក់ស្លាកលេខ នគរបាល 2-6368 បើកបរដោយបុរសម្នាក់រួមដំណើរជាមួយនិងមនុស្ស២នាក់ទៀតក្នុងរថយន្ត បើករថយន្តក្នុងទិសដៅពីកើតទៅលិចស្របទិសគ្នា លុះដល់ចំណុចកើតហេតុខាងលើបាន អ្នកបើករថយន្តបង្ក បានស្រវាំងភ្នែកជាមួយនឹងភ្លើងរថយន្តធំដែលបើកបញ្ច្រាសទិសគ្នា មើលមិនឃើញ ក៏រេចង្កូតទៅបុក
គូទត្រាក់ទ័រ ម៉ាកគូបូតា ពណ៌ក្រហម ដែលកំពុងបើកបរដោយបុរសម្នាក់ រួមដំណើរជាមួយនិងប្រពន្ធកូន នៅខាងមុខ ចំពីក្រោយយ៉ាងពេញទំហឹងបណ្តាលឲ្យត្រាក់ទ័រធ្លាក់ទៅចិញ្ចើមថ្នល់ខាងជើង ធ្វើឲ្យស្ត្រីជាប្រពន្ធរបស់អ្នកបើកត្រាក់ទ័របែកក្បាលរងរបួសធ្ងន់ ចំណែកកូននិងប្តីរងរបួសស្រាល។ ចំណែករថយន្តរងការខូចខាតផ្នែកខាងមុខចំហៀងខាងឆ្វេងយ៉ាងដំណំ ។

បន្ទាប់ពីហេតុការណ៍នេះបានកើតឡើង សមត្ថកិច្ចនគរបាលជំនាញបានចុះមកធ្វើការពិនិត្យនិងវាស់វែង ដោយបានអន្តរាគមន៍ហៅរថយន្តសាមុយ មកដឹកជនរងគ្រោះដែលរងរបួសធ្ងន់ យកទៅសង្គ្រោះបន្ទាន់នៅមន្ទីរពេទ្យបង្អែកខេត្តពោធិ៍សាត់ ។ ចំណែករថយន្តនិងអ្នកបើកបរ រួមនឹងត្រាក់ទ័រ ត្រូវបានសមត្ថកិច្ចនាំយកមករក្សាទុកនៅអធិការដ្ឋាននគរបាលស្រុកក្រគរ ដើម្បីរង់ចាំធ្វើការដោះស្រាយគ្នាតាមផ្លូវច្បាប់៕

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍