Post News Media ព័ត៌មានជាតិ ក្រសួងទេសចរណ៍...

ក្រសួងទេសចរណ៍ចុះ MOU ជាមួយក្រុមហ៊ុនចិន ពង្រីកជើងហោះហើរ និងបណ្ដុះបណ្ដាលធនធានមនុស្ស

ចែកចាយបន្ត

ភ្នំពេញ: ក្រសួងទេសចរណ៍ កាលពីថ្ងៃទី១៥ ខែតុលា ឆ្នាំ២០១៦កន្លងទៅនេះចុះអនុស្សារណ:នៃការយោគយល់គ្នាស្ដីពី កិច្ចសហប្រតិបត្តិការយុទ្ធសាស្ត្រ នៃការអភិវឌ្ឍន៍វិស័យទេសចរណ៍កម្ពុជា ជាមួយក្រុមហ៊ុន Shanghai Spring International ផ្ដោតលើការពង្រីកជើងហោះហើរត្រង់ និងបណ្ដុះបណ្ដាលធនធានមនុស្ស ដើម្បីជំរុញការអភិវឌ្ឍន៍វិស័យទេសចរណ៍នៅកម្ពុជា និងរួមចំណែកអនុវត្តផែនការទាក់ទាញទេសចរចិនយ៉ាងតិច ២លាននាក់ នៅឆ្នាំ២០២០។

ការចុះ MoU ស្ដីពី កិច្ចសហប្រតិបត្តិការយុទ្ធសាស្រ្តនៃការអភិវឌ្ឍន៍ទេសចរណ៍នេះ ធ្វើឡើងក្រោមវត្តមានលោកបណ្ឌិតសុភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណ:រដ្ឋមន្ត្រី និងចុះហត្ថលេខាដោយលោក ថោង ខុន រដ្ឋមន្ត្រីក្រសួងទេសចរណ៍ និងលោក WANG Zhenghua ប្រធានក្រុមប្រឹក្សានាយក នៃក្រុមហ៊ុន Shanghai Spring International Travel Service (Group) Co.,Ltd. ព្រមទាំងមានការចូលរួមពី លោក Xiong Bo ឯកអគ្គរដ្ឋទូតចិនប្រចាំកម្ពុជា ថ្នាក់ដឹកនាំក្រសួងស្ថាប័នពាក់ព័ន្ធជាច្រើននាក់ នាទីស្ដីការគណ:រដ្ឋន្រ្តី។

លោក ថោង ខុន បានឲ្យដឹងថា «អនុស្សារណ:យោគយល់គ្នានេះ ផ្តោតសំខាន់លើការកសាងនូវ កិច្ចសហប្រតិបត្តិការ និងភាពជាដៃគូជាយុទ្ធសាស្រ្តរវាងក្រសួងទេសចរណ៍ និងក្រុមហ៊ុន Shanghai Spring International លើផែនការមួយចំនួន រួមមាន: ការជំរុញការហោះហើរពីតំបន់ផ្សេងៗ នៃប្រទេសចិនមកកម្ពុជាបន្ថែមទៀត, ការបណ្តុះបណ្តាលមគ្គុទ្ទេសក៍ទេសចរណ៍, ការផ្សព្វផ្សាយទេសចរណ៍កម្ពុជា ក៏ដូចជាការអភិវឌ្ឍន៍ផលិតផលទេសចរណ៍ នៅតាមតំបន់គោលដៅសំខាន់ៗរបស់កម្ពុជា»។

លោក ថោង ខុន បានបន្តថា អនុស្សារណ:យោគយល់គ្នានេះ នឹងក្លាយជាឧបករណ៍មួយ ក្នុងការជំរុញកិច្ចសហប្រតិបត្តិការរវាងកម្ពុជា និងប្រទេសចិន ឲ្យកាន់តែជិតស្និទ្ធ ជាពិសេសជាមួយអ្នកវិនិយោគចិន ក្នុងវិស័យទេសចរណ៍ ក្នុងការចូលរួមទាក់ទាញភ្ញៀវទេសចរចិន និងទេសចរប្រទេសទី៣ ឱ្យមកទស្សនាកម្ពុជា ក៏ដូចជាចូលរួមជំរុញឲ្យមានជើងហោះហើរត្រង់ ពីទីផ្សារចិនមកកម្ពុជា កាន់តែច្រើនថែមទៀត ដើម្បីសម្រេចបានចក្ខុវិស័យ «កម្ពុជានឹងទទួលទេសចរជនជាតិចិនយ៉ាងតិច២លាននាក់ ក្នុងចំណោមភ្ញៀវទេសចរអន្តរជាតិ ៧លាននាក់ នៅឆ្នាំ២០២០»។

លោក WANG Zhenghua បានបញ្ជាក់ថា ក្នុងនាមលោក ជាប្រធានក្រុមប្រឹក្សានាយកក្រុមហ៊ុន Shanghai Spring International លោកនឹងខិតខំប្រឹងប្រែងបំពេញការងារ ប្រើប្រាស់ធនធានមនុស្ស ដើមទុន និងជំនាញរបស់ខ្លួន ជួយដល់រាជរដ្ឋាភិបាលកម្ពុជា ក៏ដូចជាក្រសួងទេសចរណ៍ និងស្ថាប័នពាក់ព័ន្ធ ដើម្បីរួមចំណែកអភិវឌ្ឍវិស័យទេសចរណ៍កម្ពុជា ឲ្យកាន់តែរីកចម្រើនទៅមុខ ប្រកបដោយនិរន្តរភាព។

មិនតែប៉ុណ្ណោះ លោក WANG Zhenghua បានបន្ថែមថា «កិច្ចសហប្រតិបត្តិការទាំងនេះ ក៏ជាការរួមចំណែកធ្វើឲ្យទំនាក់ទំនងយុទ្ធសាស្រ្តគ្រប់ជ្រុងជ្រោយ រវាងរដ្ឋាភិបាលប្រទេសចិន និងរាជរដ្ឋាភិបាលកម្ពុជា ក៏ដូចជាមិត្តភាពប្រទេសទាំងពីរ កាន់តែមានភាពស៊ីជម្រៅក្នុងដំណាក់កាលថ្មីនេះ»។

ជាមួយគ្នានេះដែរ លោកឧបនាយករដ្ឋមន្ត្រី សុខ អាន ក៏បានជំរុញឲ្យភាគីទាំងពីរ ខិតខំធ្វើយ៉ាងណាអនុវត្តអនុស្សារណ:នៃការយោគយល់គ្នានេះ ប្រកបដោយការទទួលខុសត្រូវខ្ពស់ ពិសេសត្រូវរួមគ្នាសម្រេចឲ្យបានផែនការទាក់ទាញភ្ញៀវទេសចរចិន ឲ្យបានយ៉ាងតិច ២លាននាក់ នៅឆ្នាំ២០២០។

លោកឧបនាយករដ្ឋមន្ត្រី ក៏បានបញ្ជាក់ថា «កម្ពុជាមានសក្តានុពល លើវិស័យទេសចរណ៍វប្បធម៌ ផ្អែកលើបេតិកភណ្ឌ តែកម្ពុជាក៏មានសក្តានុពល លើវិស័យទេសចរណ៍ធម្មជាតិដែរ ដែលគេហៅថា អេកូ-ទេសចរណ៍ ដែលក្រសួងទេសចរណ៍ ក្រោមការដឹកនាំរបស់រាជរដ្ឋាភិបាលកម្ពុជា បាននិងកំពុងខិតខំធ្វើការអភិវឌ្ឍជាបន្តបន្ទាប់ ដូចជាតំបន់ឆ្នេរសមុទ្រ តំបន់ព្រៃកោងកាង ទឹកទន្លេសាបជាដើម»។

លោកបណ្ឌិតសុភាចារ្យ សុខ អាន បានជំរុញឲ្យក្រុមហ៊ុន Shanghai Spring International ខិតខំបណ្ដុះបណ្ដាលមគ្គុទ្ទេសក៍ទេសចរណ៍កម្ពុជា, ត្រូវបង្កើតផលិតផលទេសចរណ៍ឲ្យបានច្រើន ពិសេសដោយសារក្រុមហ៊ុនមានយន្តហោះផ្ទាល់ខ្លួនរួចជាស្រេច ត្រូវពង្រីកជើងហោះហើរត្រង់ពីតំបន់នានា ក្នុងប្រទេសចិន មកកាន់កម្ពុជាបន្ថែមទៀត ដើម្បីនាំយកទេសចរជនជាតិចិន និងទេសចរប្រទេសទី៣ មកទស្សនាកម្ពុជាឲ្យកាន់តែច្រើនថែមទៀត។

សូមជម្រាបថា ក្រុមហ៊ុន Shanghai Spring International ជាក្រុមហ៊ុនផ្តល់សេវាធ្វើដំណើរ មានទីតាំងក្នុងទីក្រុងសៀងហៃ និងបានសហការអាជីវកម្មជាមួយក្រុមហ៊ុនធំៗចំនួន ៥០០ នៅលើពិភពលោក ហើយក៏ជាក្រុមហ៊ុនទីភ្នាក់ងារទេសចរណ៍ចិនទី១ ដែលបានបង្កើត និងដាក់ឲ្យដំណើរការក្រុមហ៊ុនអាកាសចរឯករាជ្យដំបូងគេ នៅប្រទេសចិន។

សម្រាប់ទីផ្សារកម្ពុជា ក្រុមហ៊ុន Shanghai Spring International បានចាប់ផ្តើមដំណើរការជាក្រុមហ៊ុនអាកាសចរ និងបានបើកជើងហោះហើរដំបូង សៀងហៃ-សៀមរាប-សៀងហៃ ចាប់ពីឆ្នាំ២០១៣មក ហើយថ្មីៗនេះ ក្រុមហ៊ុនអាកាសចរ Spring Airline ក៏បានពង្រីកជើងហោះហើរពីទីក្រុង សិនចិន-សៀមរាប-សិនចិន និង ក្វាងចូវ-ភ្នំពេញ-ក្វាងចូវ។ សម្រាប់ពេលអនាគត ក្រុមហ៊ុននេះមានបំណងពង្រីកអាជីវកម្មលើសេវាកម្មទេសចរណ៍ និងចូលរួមអភិវឌ្ឍផលិតផលទេសចរណ៍នានា នៅកម្ពុជាបន្ថែមទៀត។

ដោយឡែក សមិទ្ធផលនៃការចុះអនុស្សារណ:យោគយល់គ្នា នាថ្ងៃនេះ គឺជាជំហានថ្មីដ៏សំខាន់មួយទៀត ក្នុងការរួមចំណែក ជំរុញអភិវឌ្ឍវិស័យទេសចរណ៍នៅកម្ពុជា ពិសេសរួមចំណែកអនុវត្តផែនការយុទ្ធសាស្រ្តទាក់ទាញទេសចរចិន និងសៀវភៅសស្តីពីការត្រៀមទទួលទេសចរចិន (White paper on China Ready)៕

ក្រសួងទេសចរណ៍

ក្រសួងទេសចរណ៍

ក្រសួងទេសចរណ៍

ក្រសួងទេសចរណ៍