Post News Media ព័ត៌មានជាតិ Update: ស្គាល...

Update: ស្គាល់អត្តសញ្ញាណបុរស ដែលគេវាយសម្លាប់បោះចូលប្រឡាយ គឺជាករណីប្លន់យករថយន្ត និងមាស

ចែកចាយបន្ត

ភ្នំពេញ: បុរសម្នាក់ ដែលត្រូវជនមិនស្គាល់មុខវាយសម្លាប់ រួចចងដៃចងជើងសាកសពបត់មកចង្កេះ ហើយចងដុំថ្មទម្លាក់ចូលក្នុងទឹកប្រឡាយ កប់ក្រោមសំរាម ហើយបង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទីព្រឹកថ្ងៃទី១៤ ខែតុលា ឆ្នាំ២០១៦ នៅចំណុចក្នុងប្រឡាយទឹក ស្ថិតនៅតាមបណ្ដោយផ្លូវលំ ខាងក្រោយសួនឧស្សាហ៍កម្ម កាណាឌីយ៉ា ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

មកដល់នឹងពេលនេះ សាកសពត្រូវបានស្គាល់អត្តសញ្ញាណហើយ គឺមានឈ្មោះ កៅ ផា អាយុ៤៨ឆ្នាំ មុខរបរបើកបររថយន្តឈ្នួល មានទីលំនៅក្នុងភូមិត្រពាំងរី ឃុំកំពង់អំពិល ស្រុករំដួល ខេត្តស្វាយរៀង។

សមត្ថកិច្ចបានឲ្យដឹងថា បុរសរងគ្រោះមានប្រពន្ធ២នាក់ ហើយការស្គាល់អត្តសញ្ញាណរងគ្រោះនោះ គឺបន្ទាប់ពីប្រពន្ធគាត់ទាំងពីរនាក់ រួមនឹងកូនបាត់ប្ដី និងឪពុកយូរថ្ងៃ មិនឃើញត្រឡប់ទៅផ្ទះ ហើយសង្យ័យថា ស្លាប់ និងបានឃើញសារព័ត៌មានចុះផ្សាយថា ប្រទះឃើញសាកសព ទើបនាំគ្នាទៅកាន់ប៉ុស្ដិ៍ចោមចៅ នាវេលាល្ងាចថ្ងៃទី១៥ ក៏បានស្គាល់ថា ជាប្ដីនិងឪពុករបស់ខ្លួន។

ប្រភពព័ត៌មានពីប្រពន្ធបានប្រាប់សមត្ថកិច្ចថា កន្លងមកប្ដីពួកគាត់ បើកបររថយន្តឈ្នួល ដឹកអ្នកដំណើរពីស្វាយរៀង ចូលទៅខេត្តកំពង់ចាម និងភ្នំពេញ។

សមត្ថកិច្ចបញ្ជាក់ថា ប្រពន្ធដើមមានឈ្មោះ សៅ សំអឿន អាយុ៤៦ឆ្នាំ ហើយមានកូនចំនួន៤នាក់ ក្នុងនោះកូនប្រុសចំនួន៣នាក់ និងស្រីម្នាក់។ ចំណែកប្រពន្ធចុងឈ្មោះ ចាប សាម៉េត អាយុ៣៣ឆ្នាំ មុខរបរកម្មការិនីរោងចក្រកាត់ដេរ មានស្រុកកំណើត នៅក្នុងភូមិតាហង់ ឃុំអណ្តូងពោធិ៍ ស្រុករមាសហែក ខេត្តស្វាយរៀង។ សម្ភារ:ដែលបាត់បង់ មានរថយន្តម៉ាកសាំយ៉ុង១គ្រឿងពណ៌ស ពាក់ស្លាកលេខ ភ្នំពេញ 2AB-4728 និងចិញ្ចៀនមាសមួយវង់ទម្ងន់៥ជីផងដែរ។

ប្រភពពីប្រពន្ធបានឲ្យដឹងថា ប្ដីរបស់ពួកគាត់ ត្រូវបានបុរសម្នាក់ឈ្មោះសូ ផា ហៅ អ៊ូក អាយុ៣០ឆ្នាំ មុខរបរបើកបររថយន្តឈ្នួល មានទីលំនៅក្នុងភូមិជាមួយគ្នា បានជួលរថយន្តប្ដីគាត់ជិះ ដោយប្រាប់ថា ទៅកាន់ខេត្តសៀមរាប ទាំងទៅ ទាំងមកក្នុងតម្លៃ២៥០ដុល្លារ។ បន្ទាប់ពីនិយាយត្រូវរ៉ូវគ្នាហើយ ក៏បានចាកចេញពីផ្ទះ កាលពីវេលាម៉ោង៤ទៀបភ្លឺថ្ងៃទី១២ ខែតុលា ឆ្នាំ២០១៦ ខណ:នោះរូបគាត់ ដែលជាប្រពន្ធដើម បានទំនាក់ទំនងសួរនាំប្ដីតាមទូរសព្ទ ជាញឹកញាប់ដែរ រហូតដល់វេលាល្ងាចថ្ងៃដដែល ស្រាប់តែខលលែងចូលរហូតដល់ពេលមានការភ្ញាក់ផ្អើលថា ប្រទះឃើញសាកសព ទើបពួកគាត់បានស្គាល់ថា ជាប្ដី តាមរយ:ខ្សែក្រវាត់ និងសម្លៀកបំពាក់របស់គាត់ ដែលប្រើប្រាស់រាល់ថ្ងៃ៕

photo_2016-10-17_11-36-17

photo_2016-10-17_11-36-16

photo_2016-10-17_11-36-18