Post News Media ព័ត៌មានជាតិ គណ:កម្មការ​ ន...

គណ:កម្មការ​ និង​ព្រះសង្ឃ​​វត្តភ្នំ​បា​រៀង ​ស្ទើរ​ដាច់​ចង្ហាន់​​ជា​អន្លើៗ​ហើយ​ សូម​ពុទ្ធបរិស័ទ​ ជួយ​ឧបត្ថម្ភ

ចែកចាយបន្ត

កំពង់ធំ: គណ:កម្មការ និងព្រះសង្ឃ ដែលគង់វត្តអារិយវង្ស ហៅវត្តភ្នំរៀង ស្ថិតនៅលើកំពូលភ្នំរៀង ក្នុងភូមិបាក់ស្រី ឃុំគោល ស្រុកប្រាសាទសំបូរ ខេត្តកំពង់ធំ បានអំពាវនាវ និងបិណ្ឌបាត សុំពុទ្ធបរិស័ទ ជិតឆ្ងាយមេត្តាជួយឧបត្ថម្ភវត្តបារៀងនេះផង ព្រោះមានការខ្វះខាតជាខ្លាំង មិនត្រឹមតែការកសាងវត្តនោះទេ សូម្បីតែចង្ហាន់ព្រះសង្ឃ និងយាយជី តាជី២ទៅ៣នាក់ នៅវត្តនេះ ស្ទើរដាច់ជាអន្លើរៗទៅហើយ។

ព្រះតេជគុណ រស់ ភារុណ ជាព្រះសង្ឃដែលគង់នៅវត្តនេះ បានមានសង្ឃដីការថា ថ្វីតែវត្ត ដែលត្រូវព្រះសង្ឃគង់នៅ ដើម្បីបដិបត្តិធម៌ និងរក្សាព្រះពុទ្ធសាសនា និងប្រពៃណី ប៉ុន្តែព្រះសង្ឃ និងយាយជី តាជី គង់នៅបានក៏វាអាស្រ័យទៅលើមានចង្ហាន់ដែរ បើដាច់ចង្ហាន់នោះ មិនដឹងគង់ បានដូចម្ដេចនោះទេ ហើយចង្ហាន់វាពឹងទៅលើពុទ្ធបរិស័ទ ហេតុនេះ សូមពុទ្ធបរិស័ទជិតឆ្ងាយ មេត្តាជួយ កសាង និងឧបត្ថម្ភ នូវការកង្វះខាត ដល់វត្តអរិយវង្សនេះផង។

គណ:កម្មការ វត្តអរិយវង្ស លោកតា ស៊ុយ ឈួន អាយុ៧៦ឆ្នាំ បានប្រសាសន៍ថា វត្តនេះ គឺពុទ្ធ បរិស័ទ ចំណុះវត្តតិច និងក្រខ្សត់ ហើយម្យ៉ាងទៀត នៅឆ្ងាយពីភូមិ ប្រជាពលរដ្ឋ ហើយនៅលើ កំពូលភ្នំ ដែលពុទ្ធបរិស័ទពិបាកក្នុងការធ្វើដំណើរ  ដែលជាហេតុធ្វើឲ្យវត្តអរិយវង្ស ហៅវត្តភ្នំរៀងនេះ មានការខ្វះខាតច្រើន ទាំងការកសាង និងអាហារ ចង្ហាន់ របស់ព្រះសង្ឃ។

លោកតា គណ:កម្មការរូបនេះ បានសុំឲ្យព្រះពុទ្ធបរិស័ទ និងសម្បុរសជន ជួយកសាងវត្ត អរិយវង្ស ហៅវត្តភ្នំរៀងនេះ ដើម្បីរក្សាសាសនាព្រះពុទ្ធយើង។ ចំណែកចង្ហាន់ បើបងប្អូនពុទ្ធបរិស័ទ និងសប្បុរសជន  មានលទ្ធភាព និងជួយឧបត្ថម្ភ អាចជួយនូវចង្ហាន់ដែលអាចរក្សាទុកបាន ដូចជា បច្ច័យ  អង្ករ ត្រីងៀត ត្រីប្រឡាក់ ឫ គ្រឿងឧបភោគ បរិភោគ ជាកំប៉ុងក្ដី ព្រោះចង្ហាន់បែបនេះ រក្សាទុកបានយូរ។

លោកតាគណ:កម្មការរូបនេះ បានបន្តថា វត្ដនេះ មានតែកុដិ  ព្រះសង្ឃគង់ និងតាជី យាជី ២ទៅ៣នាក់ ស្នាក់នៅ និងទីវត្តព្រះវិហារ តែប៉ុណ្ណោះ ហើយអាចមានពុទ្ធបរិស័ទច្រើនជាងនេះ បើថ្ងៃសីល និងថ្ងៃបុណ្យទាន ហើយក៏ជាវត្តមួយ  ដែលមានអប្បិយ ជំនឿថា ខ្លាំងពូកែសក្ដិសិទ្ធិ ផងដែរ តាំងពីសម័យ បុរាណមក គឺមានព្រៃឈើក្រាស់ និងត្រជាក់ ហើយកាលនោះ ព្រះសង្ឃធុដុង្គ,អ្នកសច្ចំ ឬ ឥសី ក្ដី គេឡើងមកតាំងសីល ឫសមាធិ នៅទីនេះ ក្រោយមកក៏កើតជាកន្លែងគោរពសក្ការ: និងក្លាយ វត្ត រហូតមកទល់បច្ចុប្បន្ន។

ប្រជាពលរដ្ឋ បាននិយាយថា នៅលើភ្នំបារៀងនេះ មានបារមី ខ្លាំងពូកែណាស់ បច្ចុប្បន្ន ព្រះ សង្ឃ ឬតាជី យាយជីនេះ គឺនៅ និងគង់នៅបាន ទាល់តែមាននិស្ស័យផងដែរ ហើយគោរពប្រតិបត្តិ តាមជំនឿនៅលើភ្នំនេះ បើមិនអីចឹងទេ គឺនៅ និងគង់នៅមិនយូរទេ គឺមានតាជី យាជី និងព្រះសង្ឃ ច្រើនណាស់ ដែលមិនអាចទប់ទល់ នឹងបារមីនៅលើភ្នំនេះ ធ្វើបាប ហើយក៏ដាក់មេប្រូចឥតងាកក្រោយ ហើយវត្តនេះ មានចម្ងាយជាង៥០គ,ម ពីទីរួមខេត្តកំពង់ធំ (ក្រុងស្ទឹងសែន) ស្ថិតនៅក្នុងភូមិខាងលើ៕

pagoda-1

pagoda-2

pagoda-3

pagoda-4