Post News Media ព័ត៌មានជាតិ យាយជី តាជីរត់...

យាយជី តាជីរត់ជាន់ជើងគ្នាខណ:កំពុងហូបបាយផ្ទុះចង្ក្រានហ្គាស៍

ចែកចាយបន្ត

ប៉ៃលិន: មានការ​ភ្ញាក់ផ្អើល​មួយ ​បាន​កើតឡើង​កាលពី​វេលា​ម៉ោង​១២​និង​១០​នាទីថ្ងៃត្រង់ ទី​១៧ ខែតុលា ​ឆ្នាំ​២០១៦ ខណ:​ពេល​តាជី​ យាយជី និង​ពុទ្ធ​បរិស័ទ ជាច្រើន​នាក់ ​កំពុង​ហូប​អាហារ​រួម​គ្នានៅវត្ត ស្រាប់​តែ​​ផ្ទុះ​ចង្ក្រានហ្គាស៍ ​​លាន់​សូរដូចរន្ទះ​ ​​ផ្អើល​តាជីយាយ​ជី​ ភ័យស្លន់ស្លោ​ ​និងមនុស្ស​៣នាក់​រងរបួស។
ហេតុ​ការ​ណ៍​ នេះ ​បានកើត​ឡើង​នៅ​សាលាឆាន់​ក្នុង​វត្ត​ពោធិ​មា​រាម ហៅ​វត្ត​ប៉ា​ហ៊ី ​ស្ថិតក្នុង​ភូមិ​ប៉ា​ហ៊ី​ត្បូង សង្កាត់​ប៉ៃលិ​ន ​ក្រុងប៉ៃលិន ​ខេត្ត​ប៉ៃលិន ។

តាម​ប្រភពព័ត៌មាន ​ពី​កន្លែងកើតហេតុ ​បាន​ឲ្យ​ដឹងថា​ មុនពេល​កើតហេតុក្រោយពេល​ដែល​ព្រះសង្ឃ​បាន​និមន្ត​ឆាន់​ចង្ហាន់​រួចរាល់ ហើយ​ពុទ្ធ​បរិ​ស័​ទ​ និង​តាជី​យាយជី ​បាន​លើក​យក​អាហារ​ដែល​សេសសល់​ពី​ព្រះសង្ឃ ​យក​មក​ទទួល​ទាន​រួម​នោះ ​ព្រមទាំង​រៀបចំ​ ដោយ​ដាក់​ចង្ក្រាន​ហ្គាស៍​នៅ​ចំ​កណ្តាល ហើយ​រៀប​ ចាន​នៅ​ជុំវិញ ​ដោយ​មាន​តាជី​យាយជី ​និង​ពុទ្ធ​បរិ​ស័​ទ​ អង្គុយ​ហូប​ក្បែរ ​ បាន​មួយសន្ទុះ ស្រាប់តែ​កំប៉ុង​ហ្គាស៍ ​ដែល​ដាក់​ដើម្បី​បង្កាត់ភ្លើង ​បាន​ផ្ទុះ​លាន់​ដូច​រ​ន្ទះ ផ្អើល​តាជី ​យាយជី និង​ពុទ្ធបរិស័ទ​​ ភ័យ​ស្លន់ស្លោ។

ប្រភពព័ត៌មាន បាន​បន្តទៀតថា​ ក្រោយពី​ហេតុ​ការផ្ទុះ​ចង្ក្រាន​ហ្គាស៍ ​គេ​សង្កេតឃើញ​ បុរស​២ នាក់ និង​ក្មេង​ស្រី​ម្នាក់​ រងរបួស​ស្រាល ​ដែល​បុរស​ទាំងពីរ​នាក់​នោះ ​ត្រូវ​បាន​គេ​ថា​ជា​ អតីត​លោក​ចៅ​សង្កាត់​ប៉ៃលិន​ និង​តាជី​ម្នាក់ ​​ត្រូវ​អំបែង​ចាន ​និង​ទឹក​សម្ល ​ដែល​កំពុង​ក្តៅ ​ព្រមទាំង​ការ​ខ្ទាត​អំបែង​កំប៉ុង​ហ្គាស៍​និង​ចង្ក្រាន​ហ្គាស៍​ផងដែរ ។

សូមបញ្ជាក់ថា​ ​ករណីនេះ​ គឺជា​ការធ្វេសប្រហែស​មួយ​ ព្រោះ​កំប៉ុង​ហ្គាស៍​ដែល​យក​មកប្រើ​ យើង​មិន​ដឹងថា​មានការ​លេច ធ្លុះធ្លាយ ​ ហើយ​ប្រសិនបើ​យើង​ប្រើ​យូរ ​មាន​កំដៅ​ក្តៅ​ខ្លាំង​ក៏​វា​អាច​បណ្តាល​ឲ្យ​ផ្ទុះ​ផងដែរ​ ដូច្នោះសូម​ឲ្យ​មានការ​ប្រុងប្រយ័ត្ន​ទាំងអស់គ្នា​ សំណាង​ហើយ​ដែល​មិនមាន​បញ្ហា​ដល់​អាយុជីវិត៕

ផ្ទុះចង្ក្រានហ្គាស៍

14658435_689184381247619_1886657620_n

ផ្ទុះចង្ក្រានហ្គាស៍

ផ្ទុះចង្ក្រានហ្គាស៍

ផ្ទុះចង្ក្រានហ្គាស៍

ផ្ទុះចង្ក្រានហ្គាស៍

ផ្ទុះចង្ក្រានហ្គាស៍