Post News Media ព័ត៌មានជាតិ រថយន្តសាំយ៉ុង...

រថយន្តសាំយ៉ុងលួចដឹកឈើប្រណិតទៅវៀតណាម ជាប់អន្ទាក់ប៉ូលិស

ចែកចាយបន្ត

រតនគីរី: រថយន្តសាំយ៉ុង១គ្រឿង លួចដឹកឈើប្រណិតខុសច្បាប់យកទៅលក់នៅប្រទេសវៀតណាម ត្រូវបានកម្លាំងនគរបាលប្រឆាំងបទល្មើសសេដ្ឋកិច្ចខេត្តបង្ក្រាបបាន កាលពីវេលាម៉ោង១០និង៣០នាទីព្រឹក ថ្ងៃទី១៧ ខែតុលា ឆ្នាំ២០១៦ នៅលើកំណាត់ផ្លូវជាតិលេខ៧៨ ស្ថិតនៅភូមិសោមត្រក ឃុំសោមធំ ស្រុកអូរយ៉ាដាវ ខេត្តរតនគីរី។

លោកវរសេនីយ៍ឯក នូវ ដារ៉ា នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តបានប្រាប់ឲ្យដឹងថា ដែលឈានដល់ការបង្ក្រាបរថយន្តសាំយ៉ុងលួចដឹកឈើប្រណិតខាងលើនេះ​ បានដោយសារមានការរាយការណ៍ពីកម្លាំងសម្ងាត់ថារថយន្តខាងលើលួចដឹកឈើប្រណិតខុសច្បាប់ទៅប្រទេសវៀតណាម លោកក៏បានដឹកនាំកម្លាំងចុះបង្ក្រាបភ្លាមៗដោយមានបទបញ្ជាពីលោកស្នងការ ស្នងការរងឲ្យធ្វើការបង្ក្រាបយ៉ាងដាច់ខាតរាល់ការធ្វើចរាចរដឹកឈើខុសច្បាប់នេះ។

លោកវរសេនីយ៍ឯក នូវ ដារ៉ា បានបន្តទៀតថា រថយន្តលួចដឹកឈើប្រណិតខុសច្បាប់ខាងលើនេះ ម៉ាកសាំយ៉ុងពណ៌ស ពាក់ស្លាកលេខភ្នំពេញ2A.8470 ផ្ទុកឈើប្រណិតប្រភេទធ្នង់មានចំនួន៣១ដុំ បានធ្វើចរាចរដឹកឈើខុសច្បាប់នៅចំណុចភូមិ-ឃុំខាងលើក៏ត្រូវកម្លាំងលោកធ្វើការបង្ក្រាបតែម្តង ហើយអ្នកបើកបររថយន្តឃើញសភាពមិនស្រួលក៏ចុះបើកទ្វាររត់គេចខ្លួនបាត់ស្រមោល។

បច្ចុប្បន្ន រថយន្តនិងឈើត្រូវបានប្រគល់ទៅឲ្យខណ្ឌរដ្ឋបាលព្រៃឈើចាត់ការបន្ត អ្នកជំនាញបានធ្វើការរាប់ និងវាស់វែងទៅឃើញថាចំនួនឈើពិតប្រាកដមានចំនួន៣១ដុំ ប្រភេទឈើធ្នង់ស្មើនឹង៣១៩ម៉ែត្រគូប ចំណែកម្ចាស់រថយន្តសមត្ថកិច្ចជំនាញកំពុងធ្វើការស្រាវជ្រាវទៅតាមនីតិវិធីដើម្បីឲ្យចូលខ្លួនមកដោះស្រាយទៅតាមផ្លូវច្បាប់ ៕

ដឹកឈើប្រណិត

ដឹកឈើប្រណិត

ដឹកឈើប្រណិត

ដឹកឈើប្រណិត