Post News Media ព័ត៌មានជាតិ កម្មករបុរី ជី...

កម្មករបុរី ជីប ម៉ុង លែន ៣នាក់ ត្រូវសមត្ថកិច្ចឃាត់ខ្លួន

ចែកចាយបន្ត

ភ្នំពេញ: ជនសង្ស័យ៣នាក់ ដែលសមត្ថកិច្ចអះអាងថា ជាកម្មករធ្វើសំណង់ក្នុងបុរី ជីប ម៉ុង លែន ត្រូវកម្លាំងគណ:បញ្ជាការឯកភាពខណ្ឌសែនសុខធ្វើការឃាត់ខ្លួន ខណ:កម្លាំងដាក់គោលដៅត្រួតពិនិត្យអាវុធជាតិផ្ទុះ កាលពីវេលាម៉ោង៧និង៣០នាទីយប់ថ្ងៃទី១៧ ខែតុលា ឆ្នាំ២០១៦ នៅចំណុចផ្លូវ១៩៨៦ ភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ រួមនឹងថ្នាំញៀនចំនួន២កញ្ចប់។

ការដាក់គោលដៅត្រួតពិនិត្យអាវុធជាតិផ្ទុះខាងលើនេះ ដឹកនាំដោយលោក ហោ វាសនា អភិបាលរងខណ្ឌសែនសុខ លោក សារឹម វុទ្ធី អធិការរងនគរបាលខណ្ឌ និងមន្ត្រីក្រោមឱវាទជាច្រើនរូបទៀត។

សមត្ថកិច្ចបានឲ្យដឹងថា ជនសង្ស័យទាំង៣នាក់ខាងលើ ទី១.ឈ្មោះ ស៊ន សិត ភេទប្រុស អាយុ២១ឆ្នាំ ជាកម្មករសំណង់ ទី២.ឈ្មោះ ប៉ើក អឺក ភេទប្រុស អាយុ២២ឆ្នាំ ជាកម្មករសំណង់ និងទី៣.ឈ្មោះ ស៊ុន មករា ភេទប្រុស អាយុ១៨ឆ្នាំ ជាកម្មករសំណង់ អ្នកទាំង៣ស្នាក់នៅក្នុងបុរី ជីប ម៉ុង លែន ភូមិបាយាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

លោក ហោ វាសនា  អភិបាលរងខណ្ឌបានមានប្រសាសន៍ថា ដោយមានបទបញ្ជាពីលោក ប៉ឹល កុសល អភិបាលខណ្ឌ បានឲ្យលោកបង្កើតគណ:បញ្ជាការឯកភាពដឹកនាំដាក់គោលដៅត្រួតពិនិត្យអាវុធជាតិផ្ទុះនៅចំណុចខាងលើ ដើម្បីទប់ស្កាត់រាល់បទល្មើសផ្សេងៗ ខណ:នោះក៏មានជនសង្ស័យទាំង៣នាក់ បានធ្វើដំណើរឆ្លងកាត់ ជិះម៉ូតូ១គ្រឿង ម៉ាកវីវ៉ា ពណ៌ខ្មៅ ពាក់ស្លាកលេខភ្នំពេញ 1BH-8183 ដោយមានការសង្ស័យ ក៏ឃាត់ត្រួតពិនិត្យ ឆែកឆេរឃើញថ្នាំញៀនប្រភេទក្រាមថ្លាសចំនួន២កញ្ចប់ ទើបសមត្ថកិច្ចឃាត់ខ្លួន ដើម្បីធ្វើការសាកសួរ។

នៅចំពោះមុខសមត្ថកិច្ចជនសង្ស័យបានសារភាពថា ថ្នាំញៀននេះពិតជារបស់ខ្លួនមែន ហើយទិញសម្រាប់ទុកប្រើប្រាស់ខ្លួនឯងប៉ុណ្ណោះ។

បច្ចុប្បន្នជនសង្ស័យទាំង៣នាក់ រួមនឹងថ្នាំញៀនខាងលើ សមត្ថកិច្ចកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីចាត់ការបន្តតាមនីតិវិធីច្បាប់៕

photo_2016-10-18_17-16-28

photo_2016-10-18_17-16-06

photo_2016-10-18_17-16-13