Post News Media ព័ត៌មានជាតិ រថយន្តដឹកឈើល្...

រថយន្តដឹកឈើល្មើសច្បាប់ ចែ ស្រូន ត្រូវមេព្រៃកំពង់ថ្មស្ទាក់ចាប់

ចែកចាយបន្ត

កំពង់ធំ: បទល្មើសព្រៃឈើ ត្រូវបានគេប្រទះឃើញមានការដឹកបញ្ជូនជាហូរហែ ដោយមានការបង្កប់វីធីសាស្រ្ត និងប្រើល្បិចផ្សេងៗ ដើម្បីបំភាន់ភ្នែកសមត្ថកិច្ច ក្រោមរូបភាពដឹកជំនៀរឈើ និងដឹកអុស តែធាតុពិតក្នុងរថយន្តមានការដឹកឈើ ដោយខុសច្បាប់របស់ឈ្មួញ ដាក់តាមដេប៉ូយ៉ាងរំភើយ តែទោះជាយ៉ាងណានោះ ក៏នៅតែមានការសង្ស័យថាហេតុអ្វីបានជាអាចឆ្លងកាត់សង្កាត់មេព្រៃជាច្រើនដំណាក់កាល និងសមត្ថកិច្ចបរិស្ថាន និងកងកម្លាំងជាច្រើនដែលដុះដូចផ្សិតនៅតាមផ្លូវ។

ជាក់ស្តែងរថយន្តរបស់លោកស្រី ហោ គឹមស្រូន និងប្តីឈ្មោះ ថា គឺជាឈ្មួញដឹកឈើខុសច្បាប់យ៉ាងសកម្ម ប្រចាំខេត្តកំពង់ធំ ដែលដឹកចេញពីឃុំទំរីង ស្រុកសណ្តាន់ ខេត្តកំពង់ធំ  ហើយឈើទាំងនោះ ជាប្រភេទលេខ២ ចំណុះ៣ម៉ែត្រ៨៥២ផ្លាន តាមរយ:រថយន្តកូរ៉េ៣តោនកន្លះ ក្បាលសត្រួយចេក ពាក់ស្លាកលេខភ្នំពេញ 3C-6003  ត្រូវបានសមត្ថកិច្ចផ្នែករដ្ឋបាលព្រៃឈើកំពង់ថ្ម ចាប់បាននៅចំណុចស្ពានខ្វែក ឃុំកំពង់ថ្ម ស្រុកសន្ទុក ខេត្តកំពង់ធំនៅយប់ថ្ងៃទី១៧ ខែតុលា ឆ្នាំ២០១៦ និងត្រូវម្ចាស់ចូលខ្លួនដោះស្រាយផាកពិន័យតាមផ្លូវច្បាប់នៅកាលពីព្រឹកថ្ងៃទី១៩ ខែតុលាឆ្នាំ ២០១៦ ក្នុងទឹកប្រាក់ ១២.១៣៣.៨០០រៀល។

តាមប្រភពព័ត៌មានច្បាស់ការបានឲ្យដឹងថា ឈ្មួញឈើដុះស្លែឈ្មោះ ហោ គឹមស្រូន ហៅចែស្រូន គឺជាឈ្មួញឈើខុសច្បាប់ដ៏សកម្ម បានដឹកឈើជារៀងរាល់ថ្ងៃ តាំងពីផ្លូវរាបរហូតដល់ផ្លូវក្លាយជាបាយខុម ពីមួយឆ្នាំទៅមួយឆ្នាំ ដោយមិនខ្លាចញញើតច្បាប់ សម្រាប់ដឹកឈើដាក់ដេប៉ូឈើឈ្មោះ ចែម៉ៅ ជាម្ចាស់ដេប៉ូស្ថិតនៅ ភូមិចុងដូង ឃុំចុងដូង ស្រុកបារាយណ៍ ខេត្តកំពង់ធំ ឈ្មួញនេះត្រូវបានដឹកខួបប្រាំងខួបវស្សា តែពុំដែលឃើញមានការចាប់ ឬទប់ស្កាត់នោះទេ តែការចាប់លើកនេះ គឺដោយសារតែមានការទើសទាល់ពីសំណាក់អ្នកសារព័ត៌មាន ដែលបានរាយការណ៍ពីសកម្មភាពដឹកឈើរបស់ ចែ ហោ គឹមស្រូន ទើបសម្រេចចិត្តចុះចាប់ទាំងបង្ខំចិត្ត។

ចុងក្រោយអ្នកសារព័ត៌មាន យើងបានព្យាយាមធ្វើការទំនាក់ទំនង ជាមួយលោកស្រី ហោ គឹមស្រូន ដែលជា ម្ចាស់រថយន្តដឹកឈើ ដើម្បីសុំការបំភ្លឺពីករណីដែលឈានទៅដល់ការចាប់រថយន្តដឹកឈើ តែលោកស្រីទទួលទូរសព្ទហើយ បែរជាមិននិយាយអ្វី ក្រោយមកក៏បានបិទទូរសព្ទមិនអាចហៅចូលបាន៕

photo_2016-10-19_11-51-53

photo_2016-10-19_11-51-47

photo_2016-10-19_11-51-50

photo_2016-10-19_11-51-51

photo_2016-10-19_11-51-52

photo_2016-10-19_11-51-53-2