Post News Media ព័ត៌មានជាតិ រដ្ឋបាលរាជធាន...

រដ្ឋបាលរាជធានី មិនអនុញ្ញាតឲ្យគណបក្សសង្គ្រោះជាតិ ប្រារព្ធខួបនៃកិច្ចព្រមព្រៀងសន្តិភាព ទីក្រុងប៉ារីស នៅទីលានប្រជាធិបតេយ្យទេ

ចែកចាយបន្ត

ភ្នំពេញ: រដ្ឋបាលរាជធានីភ្នំពេញបានសម្រេចរួចហើយ គឺមិនអនុញ្ញាតឲ្យគណបក្សសង្រ្គោះជាតិ (CNRP) យកទីលានប្រជាធិបតេយ្យធ្វើខួបឆ្នាំទី២៥ នៃកិច្ចព្រមព្រៀងសន្តិភាពក្រុងប៉ារីសនៅថ្ងៃទី២៣ តុលាខាងមុខនោះទេ ។ប៉ុន្តែទោះបីជាយ៉ាងណាក្តីរដ្ឋបាលរាជធានីភ្នំពេញ នឹងសុំគោលការណ៍ទៅក្រសួងមហាផ្ទៃបន្តទៀត។

អ្នកនាំពាក្យរដ្ឋបាលសាលារាជធានីភ្នំពេញ លោក ម៉េត មាសភក្តី បានឲ្យដឹងក្រោយកិច្ចប្រជុំជាមួយតំណាងគណបក្សសង្រ្គោះជាតិនៅសាលប្រជុំសាលារាជធានីភ្នំពេញនាព្រឹកថ្ងៃទី១៩ តុលា ២០១៦ នេះថា រដ្ឋបាលរាជធានីភ្នំពេញមិនអនុញ្ញាតឲ្យគណបក្សសង្រ្គោះជាតិយកទីលានប្រជាធិបតេយ្យធ្វើខួបឆ្នាំទី២៥ នៃកិច្ចព្រមព្រៀងសន្តិភាពក្រុងប៉ារីសនៅថ្ងៃទី២៣ តុលាខាងមុខនោះទេ ប៉ុន្តែរដ្ឋបាលរាជធានីអាចអនុញ្ញាតឲ្យគណបក្សសង្រ្គោះជាតិយកទីស្នាក់ការរបស់ខ្លួន ឬទីតាំងសមស្របណាមួយទៀតរៀបចំបានពិធីនេះបាន ។

លោក ម៉េត មាសភក្តី បានបន្តថា ដោយសារគណបក្សសង្រ្គោះជាតិ នៅតែទទូចចង់បានទីលានប្រជាធិបតេយ្យដើម្បីរៀបចំខួបឆ្នាំទី២៥នៃកិច្ចព្រមព្រៀងសន្តិភាពទីក្រុងប៉ារីស (២៣ តុលា ១៩៩១-២៣ តុលា ២០១៦)នោះ សាលារាជធានីភ្នំពេញនឹងដាក់សំណើនេះបន្តទៅក្រសួងមហាផ្ទៃដើម្បីសម្រេចជាក្រោយ ។

គួរបញ្ជាក់ផងដែរថា កាលពីថ្ងៃទី១៨ តុលា ២០១៦ គណបក្សសង្រ្គោះជាតិ (CNRP) ដែលមានលោកតំណាងរាស្រ្ត ហូរ វ៉ាន់ , លោក ម៉ៅ មុនីវណ្ណ និង លោក ឡុង រី បានចុះហត្ថលេខារួមគ្នាលើលិខិតស្នើសុំអនុញ្ញាតពីលោក ប៉ា សុជាតិវង្ស អភិបាលនៃគណ:អភិបាលរាជធានីភ្នំពេញ យកទីតាំងទីលានប្រជាធិបតេយ្យ ដើម្បីរៀបចំខួបឆ្នាំទី២៥នៃកិច្ចព្រមព្រៀងសន្តិភាពទីក្រុងប៉ារីស ដោយមានអ្នកចូលរួមរាប់ពាន់នាក់៕

សាលារាជធានី

សាលារាជធានី

សាលារាជធានី

សាលារាជធានី

សាលារាជធានី