Post News Media ព័ត៌មានជាតិ លោកទេសរដ្ឋមន្...

លោកទេសរដ្ឋមន្ត្រី ប្រាក់ សុខុន ទទួលជួបប្រតិភូ សមាគមនាវាយុវជនអាស៊ីអាគ្នេយ៍កម្ពុជា

ចែកចាយបន្ត

ភ្នំពេញ: នៅវេលាម៉ោង១០ព្រឹក ថ្ងៃទី១៩ ខែតុលា ឆ្នាំ២០១៦ លោក ទេសរដ្ឋមន្ត្រី ប្រាក់ សុខុន បានទទួលជួបប្រតិភូសមាគមនាវាយុវជនអាស៊ីអាគ្នេយ៍កម្ពុជា ចំនួន៣២រូប នៅទីស្តីការក្រសួង។

លោកការជួបពិភាក្សានោះដែរ បង្ហាញឲ្យឃើញថា កម្ពុជា និងអាស៊ាន ជាសមាជិកអាស៊ាន ហើយកម្ពុជាទទួលបាននូវកាលានុវត្តភាពជាច្រើន រួមមាន ការលើកកម្ពស់កិត្យានុភាពរបស់កម្ពុជានៅក្នុងតំបន់ និងនៅលើឆាកអន្តរជាតិ ការគាំទ្រទៅវិញទៅមកក្នុងអង្គការអន្តរជាតិនានាការធ្វើសមាហរណកម្ម តំបន់ដែលមានប្រជាជនជាង៦២២លាននាក់ ការអភិវឌ្ឍន៍ធនធានមនុស្សតាមរយ:គំនិតផ្តួចផ្តើម សមាហរណកម្មអាស៊ាន និងការទទួលបានជំនួយ និងការគាំទ្រជាច្រើនពីប្រទេសជាសមាជិកអាស៊ាន និងប្រទេសជាដៃគូសន្ទនារបស់អាស៊ានទាំង១០ និងប្រទេសជាដៃគូដទៃទៀត។ ដើម្បីបង្កើនការយល់ដឹងបន្ថែម អគ្គនាយកដ្ឋានអាស៊ានបានចែកជូននូវ Brochure អំពីសហគមន៍អាស៊ាន។

សហគមន៍អាស៊ាន ដែលត្រូវបានបង្កើតឡើងនៅថ្ងៃទី ៣១ ខែធ្នូ ឆ្នាំ២០១៥ នេះ មានគោលដៅសំខាន់ៗរួមមាន រក្សាសន្តិភាពនិងស្ថិរភាពក្នុងតំបន់ លើកកម្ពស់វិបុលភាពរួមរបស់អាស៊ាន យកចិត្តទុកដាក់ចំពោះប្រជាជន និងយកប្រជាជនជាស្នូល បង្កើនការចូលរួមកាន់តែសកម្មរបស់អាស៊ាននៅក្នុងអង្គការតំបន់ និងអង្គការអន្តរជាតិ និងពង្រឹងតួនាទីស្នូលរបស់អាស៊ាននៅក្នុងនិម្មាបនកម្មតំបន់ (Regional Architecture)។

សហគមន៍អាស៊ានមានសសរស្តម្ភចំនួន ៣ គឺសហគមន៍នយោបាយ-សន្តិសុខអាស៊ាន សហគមន៍សេដ្ឋកិច្ចអាស៊ាន និងសហគមន៍សង្គម-វប្បធម៌អាស៊ាន។ ជាមួយគ្នានេះ «អាស៊ានឆ្នាំ២០២៥ វឌ្ឍនភាពរួមគ្នាឆ្ពោះទៅមុខ» ដែលបានអនុម័តដោយប្រមុខរដ្ឋ/រដ្ឋាភិបាលអាស៊ាន កាលពីខែធ្នូ ឆ្នាំ២០១៥ បានដាក់ចេញនូវចក្ខុវិស័យសហគមន៍អាស៊ានឆ្នាំ២០២៥, ផែនការលម្អិតសហគមន៍នយោបាយ-សន្តិសុខអាស៊ាន២០២៥, និងផែនការលម្អិតសហគមន៍សេដ្ឋកិច្ចអាស៊ាន ២០២៥, និងផែនការលម្អិតសហគមន៍សង្គម-វប្បធម៌អាស៊ាន ២០២៥។ ក្នុងកិច្ចប្រជុំកំពូលអាស៊ានលើកទី២៨ នៅទីក្រុងវៀងចន្ទន៍ ប្រទេសឡាវ កាលពីខែវិច្ឆិកាកន្លងទៅនេះ ប្រមុខរដ្ឋ/រដ្ឋាភិបាលអាស៊ានបានអនុម័តផែនការការងារទីIII នៃគំនិតផ្តួចផ្តើមសមាហរកម្មអាស៊ាន និងផែនការមេស្តីពីការតភ្ជាប់អាស៊ាន ២០២៥។

បច្ចុប្បន្ន ៦០ភាគរយ នៃប្រជាជនអាស៊ាន ស្ថិតក្រោមអាយុ ៣៥ឆ្នាំ។ តួនាទីរបស់យុវជនមានសារសំខាន់ណាស់ក្នុងដំណើរការកសាងសហគមន៍អាស៊ាន។ ហេតុនេះហើយ ការងាររបស់ក្រុមយុវជន ត្រូវបានយកចិត្តទុកដាក់ខ្ពស់ពីសំណាក់ប្រមុខរដ្ឋ/រដ្ឋាភិបាលអាស៊ាន ជាពិសេស ក្នុងការបណ្តុះបណ្តាលជំនាញដឹកនាំដល់យុវជន ការផ្តល់ឱកាសឲ្យពួកគេចូលរួមក្នុងការដឹកនាំផ្នែកនយោបាយ សេដ្ឋកិច្ច និងមានការទទួលខុសត្រូវលើបញ្ហាសង្គម។ សហគមន៍អាស៊ានបានផ្តល់ទាំងកាលានុវត្តភាព និងទាំងបញ្ហាប្រឈម ដូច្នេះយុវជនកម្ពុជាត្រូវយកចិត្តទុកដាក់ និងចាប់យកនូវកាលានុវត្តភាពទាំងនោះ ដើម្បីចូលរួមចំណែកក្នុងដំណើរកសាងសង្គមជាតិ ក៏ដូចជា ការកសាងសហគមន៍អាស៊ានឲ្យបានសកម្ម និងកាន់តែបានល្អប្រសើរ ដោយហេតុថា យុវជន គឺជាកម្លាំងស្នូលក្នុងការអភិវឌ្ឍន៍ប្រទេសជាតិលើគ្រប់វិស័យ។

ដើម្បីពង្រឹងតួនាទីរបស់យុវជនអាស៊ាន ក្រសួងការបរទេសនិងសហប្រតិបត្តិការអន្តរជាតិបានលើកគំនិតផ្តួចផ្តើមរៀបចំវេទិកាយុវជនសំខាន់ៗ ដើម្បីផ្តល់ឱកាសឲ្យយុវជនកម្ពុជា យុវជនអាស៊ាន និងយុវជននៃប្រទេសដៃគូសន្ទនាអាស៊ានបានជួបពិភាក្សា និងផ្លាស់ប្តូរទស្សន: ព្រមទាំងលើកកម្ពស់ការយល់ដឹងពីគ្នាទៅវិញទៅមក ដូចជា សិក្ខាសាលាអាស៊ាន-សាធារណរដ្ឋកូរ៉េ ស្តីពីការចូលរួមរបស់យុវជន (ឆ្នាំ២០១៤) វេទិកាសហគ្រិនវ័យក្មេងអាស៊ាន-ជប៉ុន (ឆ្នាំ២០១៥) វេទិកាថ្នាក់ដឹកនាំយុវជនអាស៊ាន-ជប៉ុន (ឆ្នាំ២០១៥) ការផ្លាស់ប្តូរទស្សនកិច្ចយុវជនអាស៊ាន-ចិន (លើកទី១ នៅខែមីនា ឆ្នាំ២០១៥ និងលើកទី២ នៅខែកក្កដា ឆ្នាំ២០១៦) និងដើម្បីចូលរួមប្រារព្ធខួបអនុស្សាវរីយ៍ ២០ឆ្នាំ នៃទំនាក់ទំនងអាស៊ាន-រុស្ស៊ី និងខួបអនុស្សាវរីយ៍លើកទី ៦០ នៃទំនាក់ទំនងការទូតរវាងកម្ពុជា-រុស្ស៊ី នៅថ្ងៃទី ២៥-២៧ ខែតុលា ឆ្នាំ២០១៦ ខាងមុខនេះ ក្រសួងការបរទេស និងសហប្រតិបត្តិការអន្តរជាតិ សហការជាមួយក្រសួងអប់រំ យុវជន និងកីឡា និងសហភាពសហព័ន្ធយុវជនកម្ពុជា នឹងរៀបចំកិច្ចប្រជុំកំពូលយុវជនអាស៊ាន-រុស្ស៊ីលើកទី ៤ នៅខេត្តសៀមរាប ដោយមានការចូលរួមពីយុវជន អាស៊ាន និងយុវជនរុស្ស៊ី ព្រមទាំងថ្នាក់ដឹកនាំកម្ពុជា បណ្តាប្រទេសអាស៊ានដទៃទៀត និង រុស្ស៊ី សរុបប្រមាណ ១៣០នាក់ ផងដែរ៕

លោកទេសរដ្ឋមន្ត្រី ប្រាក់ សុខុន

លោកទេសរដ្ឋមន្ត្រី ប្រាក់ សុខុន

លោកទេសរដ្ឋមន្ត្រី ប្រាក់ សុខុន

លោកទេសរដ្ឋមន្ត្រី ប្រាក់ សុខុន

លោកទេសរដ្ឋមន្ត្រី ប្រាក់ សុខុន