សំណុំរឿងកាប់ឈ...

សំណុំរឿងកាប់ឈើធ្នង់ជាង២០ដើម នៅកំពង់លែង ស្ថិតក្នុងកណ្តាប់ដៃតុលាការ

0
ចែកចាយបន្ត

កំពង់ឆ្នាំងៈ នាយខណ្ឌរដ្ឋបាលព្រៃឈើខេត្តកំពង់ឆ្នាំង លោក ថោង វ៉ាន់វីរ៉ាវុទ្ធី បានបញ្ជាក់ប្រាប់អ្នកសារព័ត៌មាននៅព្រឹកថ្ងៃទី១៦ ខែវិច្ឆិកា ឆ្នាំ២០១៦នេះឲ្យដឹងថា សំណុំរឿងពាក់ព័ន្ធជនសង្ស័យ ជៀប តឿង លួចកាប់យកដើមធ្នង់អស់២៣ដើមនៅក្នុងដែនសហគមន៍ពោធិ៍ជ្រកជម្រកឬទ្ធិសែន ស្ថិតក្នុងស្រុកកំពង់លែង នឹងត្រូវបញ្ជូនទៅសាលាដំបូងខេត្តហើយនាថ្ងៃនេះ ដើម្បីចំណាត់ការតាមផ្លូវច្បាប់ ក្រោយពីធ្វើការស្រាវជ្រាវអស់ពេលជិត២ខែមកហើយ និងការយឺតយ៉ាវមិនបញ្ជូនសំណុំរឿងនេះ ក្រោយពេលស្រាវជ្រាវរកឃើញភស្តុតាងហើយនោះ ធ្វើឲ្យពលរដ្ឋនៅក្នុងស្រុកកំពង់លែងសង្ស័យថា ខណ្ឌរដ្ឋបាលព្រៃឈើកំពង់ឆ្នាំងមានភាពមិនប្រក្រតីនៅក្នុងសំណុំរឿងនេះ។

លោក ថោង វ៉ាន់វីរ៉ាវុទ្ធី បានបន្តទៀថា ការយឺតយ៉ាវមិនទាន់បញ្ជូនសំណុំរឿងជនសង្ស័យ ជៀប តឿង លួចកាប់ដើមធ្នង់២៣ដើមទៅតុលាការ ដោយសារតែសមត្ថកិច្ចជំនាញមិនទាន់កសាងសំណុំរឿងរួច ហើយជនសង្ស័យខាងលើនៅមានរឿងមួយករណីទៀតកាលពី៣ខែមុនមិនទាន់ចំណាត់ការនៅឡើយ តែថាខណ្ឌរដ្ឋបាលព្រៃឈើមិនបណ្តោយឲ្យជនសង្ស័យម្នាក់នេះ រួចខ្លួនពីសំណាញ់ច្បាប់នោះឡើយ ហើយនៅថ្ងៃនេះ ខណ្ឌរដ្ឋបាលព្រៃឈើកំពង់ឆ្នាំង នឹងបញ្ជូនសំណុំរឿងនេះទៅសាលាដំបូងខេត្តហើយ។

គួររំឭកថា នៅក្នុងអំឡុងពិធីបុណ្យកាន់បិណ្ឌឆ្នាំ២០១៦កន្លងទៅនេះ ដើមធ្នង់ធំៗនៅក្នុងដែនសហគមន៍ពោធិ៍ជ្រកជម្រកឬទ្ធីសែន ស្ថិតនៅក្នុងឃុំពោធិ៍ ស្រុកកំពង់លែងចំនួន២៣ដើម ត្រូវបានគេលួចកាប់ និងពុះជ្រៀកដោយរណាយន្តយកចេញដោយស្ងាត់ស្ងៀម មិនមានអ្នកណាដឹងឡើយ រាប់ទាំងអាជ្ញាធរមូលដ្ឋានផងដែរ។ ប៉ុន្តែក្នុងពេលក្រុមអ្នកសារព័ត៌មានចុះទៅស្រាវជ្រាវដល់ទីតាំងខាងលើ ប្រជាពលរដ្ឋជាច្រើននាក់បានប្រាប់ថា ឈ្មោះ ជៀប តឿង ជាម្ចាស់សិប្បកម្មឈើមួយកន្លែងនៅក្នុងភូមិកង្កែប ឃុំច្រណូក ស្រុកកំពង់លែង ជាអ្នកចូលកាប់យកដើមធ្នង់ទាំងនោះ នឹងមានការពាក់ព័ន្ធជាមួយមន្ត្រីមានបុណ្យស័ក្កម្នាក់ទៀត នៅក្នុងសាលាស្រុកកំពង់លែងផងដែរ ដែលកន្លងមកមន្ត្រីរូបនោះធ្លាប់មានសកម្មភាពមិនប្រក្រតីជាមួយបទល្មើសកាប់ និងដឹកឈើប្រណីតប្រភេទធ្នង់ចេញទៅខេត្តកំពង់ធំផងដែរ។

ប្រភពទាំងនោះបានបន្តថា នៅក្នុងសិប្បកម្មឈ្មោះ ជៀប តឿង វិញគេបានឃើញគំនរឈើធ្នង់ថ្មីៗជាច្រើនដុំដែលជ្រៀករួច និងកំណាត់ឈើធ្នង់គររាប់សិបដុំទៀតដាក់ខាងក្រៅសិប្បកម្ម ដែលពលរដ្ឋនៅក្បែរៗនោះថាជាឈើដែលគេលួចកាប់ចេញពីដែនអភិរក្សសហគមន៍ពោធិ៍ជ្រកជម្រកឬទ្ធីសែន។ ក្នុងនោះដែរ ប្រជាពលរដ្ឋនៅក្នុងស្រុកកំពង់លែង បានសំណូមពរដល់លោកអភិបាលខេត្តកំពង់ឆ្នាំង ជួយជំរុញឲ្យខណ្ឌរដ្ឋបាលព្រៃឈើកំពង់ឆ្នាំង ពន្លឿនបញ្ជូនសំណុំរឿងនេះទៅសាលាដំបូងខេត្តផង ដើម្បីចំណាត់ការតាមផ្លូវច្បាប់ និងវែកមុខអ្នកនៅពីក្រោយខ្នងព្រមទាំងបក្ខពួក ជៀប តឿង កុំឲ្យពួកគេមានឱកាសបំផ្លាញឈើប្រណីតធម្មជាតិបែបនេះទៀត៕

ព្រៃឈើ

ព្រៃឈើ

ព្រៃឈើ

ព្រៃឈើ

ព្រៃឈើ

ចែកចាយបន្ត