Post News Media ព័ត៌មានជាតិ ឆក់ខ្សែកពីលោក...

ឆក់ខ្សែកពីលោកយាយអាយុ៨៤ឆ្នាំ គេចខ្លួនមិនរួច ត្រូវប្រជាពលរដ្ឋក្របួចជាប់

ចែកចាយបន្ត

ភ្នំពេញ: ជនសង្ស័យម្នាក់ ត្រូវប្រជាពលរដ្ឋដេញចាប់ក្របួចជាប់ រួចប្រគល់ជូនមេប៉ុស្តិ៍ស្រះចក បន្ទាប់ពីធ្វើសកម្មភាពឆក់ខ្សែកផ្លាកទីនទម្ងន់៥ជីពីលោកយាយអាយុ៨៤ឆ្នាំ។ ហេតុការណ៍នេះ បានកើតឡើងកាលពីម៉ោង៨និង៥០នាទីព្រឹកថ្ងៃទី១៨ ខែវិច្ឆិកា ឆ្នាំ២០១៦ នៅចំណុចយាន្តដ្ឋានអេអេស៊ី ផ្លូវជាតិលេខ៥ ភូមិ១៦ សង្កាត់ស្រះចក ខណ្ឌដូនពេញ រាជធានីភ្នំពេញ។

ជនសង្ស័យមានឈ្មោះ ថា ទឹម ភេទប្រុស អាយុ២៥ឆ្នាំ ជនជាតិខ្មែរ មុខរបរមិនពិតប្រាកដ ស្នាក់ម្តុំរ៉ារថភ្លើងទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ អង្គុយលើម៉ូតូវីវ៉ា ពណ៌ខ្មៅ គ្មានស្លាកលេខ។ រីឯលោកយាយរងគ្រោះមានឈ្មោះ ស្រី ណម ភេទស្រី អាយុ៨៤ឆ្នាំ មុខរបរនិងស្នាក់នៅផ្ទះកើតហេតុខាងលើ។

លោកយាយរងគ្រោះបានឲ្យដឹងថា ជនសង្ស័យអង្គុយលើម៉ូតូនៅក្បែរផ្ទះយាន្តដ្ឋានខាងលើ ហើយលោកយាយបានឈរមើលគេឯង ស្រាប់តែភ្លេចខ្លួនបន្តិច ក៏ត្រូវជនសង្ស័យធ្វើសកម្មភាពឆក់ខ្សែកហើយរត់គេចខ្លួន។ ប៉ុន្តែត្រូវបានប្រជាពលរដ្ឋឃើញហេតុការណ៍ក៏នាំគ្នាដេញចាប់បានភ្លាមៗតែម្តង ប៉ុន្តែបានបាត់ខ្សែករបស់លោកយាយដែរដោយមិនដឹងថា ខ្សែកនោះនៅលើជនសង្ស័យឬក៏ជ្រុះកន្លែងណាទេ ។

លោកយាយបានបន្តថា គាត់មានការសោកស្តាយខ្សែកមួយខ្សែយ៉ាងខ្លាំង ព្រោះវាជាវត្ថុអនុស្សាវរីយ៍របស់ក្រុមគ្រួសារ។

ជនសង្ស័យ ត្រូវបាននាំយកមកដល់ប៉ុស្តិ៍នរគបាលរដ្ឋបាលសង្កាត់ស្រះចក បានធ្វើការឆែកឆេរមិនបានឃើញខ្សែកនៅលើខ្លួនជនសង្ស័យឡើយ គឺរកឃើញប្រដាប់កាច់កម៉ូតូនៅក្នុងកែបម៉ូតូវីវ៉ា ពណ៌ខ្មៅគ្មាស្លាកលេខ។

បច្ចុប្បន្នជនសង្ស័យរួមនឹងវត្ថុតាង ត្រូវបានឃុំខ្លួនបណ្តោះអាសន្ននៅអធិការដ្ឋាននរគបាលខណ្ឌដូនពេញ ដើម្បីកសាងសំណុំរឿងចាត់ការទៅតាមនីតិវិធី៕

photo_2016-11-18_09-59-55

photo_2016-11-18_09-59-51

photo_2016-11-18_09-59-53