Post News Media ព័ត៌មានជាតិ បោកលុយជាង២ម៉ឺ...

បោកលុយជាង២ម៉ឺនដុល្លារ គេចខ្លួនបាន១ឆ្នាំ ត្រឡប់មកវិញជាប់ខ្នោះ

ចែកចាយបន្ត

ភ្នំពេញ: បុរសម្នាក់អះអាងថា ខ្លួនជាមេធាវី និងជាអង្គរក្សបានប្រើល្បិចឆបោកលុយពីប្រជាពលរដ្ឋជាបន្តបន្ទាប់ រួចគេចខ្លួនបាត់១ឆ្នាំ ត្រឡប់មកវិញ ត្រូវជនរងគ្រោះប្រទះឃើញចាប់ឃាត់ខ្លួនប្រគល់ឲ្យសមត្ថកិច្ចប៉ុស្តិ៍ទួលសង្កែ កាលពីវេលាម៉ោង១០និង២០នាទីព្រឹកថ្ងៃទី១៨ ខែវិច្ឆិកា ឆ្នាំ២០១៦ នៅចំណុចក្បែរប៉ុស្តិ៍នគរបាលទួលសង្កែ តាមបណ្តោយផ្លូវជាតិលេខ៥ ក្រុម១៤ ភូមិផ្សារតូច សង្កាត់ទួលសង្កែ ខណ្ឌឫស្សីកេវ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យឈ្មោះ ប៊ុន យ៉ុង ភេទប្រុស អាយុជាង ៤០ឆ្នាំ មុខរបរ និងទីលំនៅ មិនពិតប្រាកដ ដោយជិះរថយន្តមួយគ្រឿង ម៉ាក កូរ៉ូឡា ពណ៌ស្ក ពាក់ស្លាកលេខ ភ្នំពេញ 2F-5293។ ចំណែកជនរងគ្រោះដែលត្រូវជនសង្ស័យឆបោកប្រាក់អស់ជិត ១ម៉ឺនដុល្លារ ដោយរត់ការថ្លៃបង់ពន្ធរថយន្តឲ្យនោះមានឈ្មោះ រត់ សុផាត ភេទប្រុស អាយុ ៤២ឆ្នាំ មុខរបរ ទិញលក់រថយន្ត (គក់ជេររថយន្ត) ដែលមានទីលំនៅក្នុងសង្កាត់ស្រះចក ខណ្ឌដូនពេញ និងជនរងគ្រោះ ២នាក់ផ្សេងទៀតដែលមិនបានស្គាល់នោះ ត្រូវជនសង្ស័យឆបោកទឹកប្រាក់សរុបចំនួន ៥៨៥០ដុល្លារអាមេរិកផងដែរ។

បើតាមប្រភពព័ត៌មានបានឲ្យដឹងថា នៅមុនពេលកើតហេតុ ជនរងគ្រោះបានឃើញជនសង្ស័យ រួចក៏ឃាត់ខ្លួនប្រគល់ឲ្យសមត្ថកិច្ចដោយចោទថា ខ្លួនគេ(ជនសង្ស័យ) បានឆបោកយកប្រាក់អស់ជិត១ម៉ឺនដុល្លារអាមេរិក រួចក៏គេចខ្លួនបាត់ជាង១ឆ្នាំ ដោយបានប្រាប់ថា រត់ការថ្លៃបង់ពន្ធរថយន្ត។ លុះមកដល់ព្រឹកថ្ងៃទី១៨ ខែវិច្ឆិកា ឆ្នាំ២០១៦ ជនរងគ្រោះ ក៏បានប្រទះឃើញជនសង្ស័យជិះរថយន្តមួយគ្រឿងមកម្តុំប៉ុស្តិ៍ទួលសង្កែ ហើយក៏ឃាត់ខ្លួនប្រគល់ឲ្យសមត្ថកិច្ចតែម្តង។

ក្រោយពីធ្វើការសួរនាំរួចមក ទើបដឹងថា ករណីនេះ ជនរងគ្រោះបានដាក់ពាក្យបណ្តឹងនៅខណ្ឌជ្រោយចង្វារ ហើយសមត្ថកិច្ចប៉ុស្តិ៍ទួលសង្កែ ក៏បានបញ្ជូនជនសង្ស័យទៅឲ្យសមត្ថកិច្ចខណ្ឌជ្រោយចង្វារ ចាត់ការបន្ត។

បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្តោះអាសន្ននៅអធិការដ្ឋាននគរបាលខណ្ឌជ្រោយចង្វារ ដើម្បីកសាងសំណុំរឿង បញ្ជូនទៅកាន់តុលាការចាត់ការតាមនិតិវិធីច្បាប់៕

photo_2016-11-18_16-42-42

photo_2016-11-18_16-42-36

photo_2016-11-18_16-42-37

photo_2016-11-18_16-42-38

photo_2016-11-18_16-42-40