រថយន្តកុងតឺន័...

រថយន្តកុងតឺន័របស់ផែស្ងួត ហុង ឡេងហួរ កិនមនុស្សស្លាប់ម្នាក់ និងម្នាក់ទៀតរបួសធ្ងន់

ចែកចាយបន្ត

ភ្នំពេញៈ បុរស២នាក់ ជិះម៉ូតូមួយគ្រឿងឌុបគ្នាមកមើលមិត្តភក្តិដែលជួបគ្រោះថ្នាក់ចរាចរណ៍ត្រូវរថយន្តធន់ត្រារបស់បុគ្គលិកធនាគា អេស៊ីលីដា បើកបុកស្លាប់នៅចំណុចមុខហាង តន្ត្រីបុប្ផាជាយជ្រុងថ្មី ក៏ត្រូវបានរថយន្តកុងតឺន័ររបស់ក្រុមហ៊ុន ផែស្ងួត ហុង ឡេងហួរ បុកយ៉ាងពេញទំហឹង កិនបុរសម្នាក់បែកក្បាលស្លាប់ និងម្នាក់ទៀតរងរបួសធ្ងន់បាក់ជើង ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ ចំណែកម៉ូតូត្រូវបានរថយន្តបង្កកិនអូសជាប់នៅខាងក្រោម។ ហេតុការណ៍នេះបានកើតឡើងកាលពីវេលាម៉ោង១១យប់ ថ្ងៃទី២០ ខែវិច្ឆិកា ឆ្នាំ២០១៦ ស្ថិតនៅចំណុចតាមបណ្តោយផ្លូវជាតិលេខ៣ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា នៅមុនពេលកើតហេតុគេបានឃើញជនរងគ្រោះឈ្មោះ គឹម សុភារិទ្ធ ភេទប្រុស អាយុ២១ឆ្នាំ មានទីលំនៅភូមិកំពង់ទួល ឃុំអន្លង់រមៀត ស្រុកកណ្តាលស្ទឹង ខេត្តកណ្តាល ជិះម៉ូតូម៉ាកឌ្រីមសង់ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ កណ្តាល1O-6092 ធ្វើដំណើរតាមបណ្តោយជាតិលេខ៣ ក្នុងទិសដៅពីជើងទៅត្បុង ខណៈមកដល់ចំណុចកើតហេតុក៏បានបត់ឆ្វេង ឆ្លងផ្លូវពេលឆ្លងជិតផុតទៅហើយស្រាប់តែមានរថយន្តម៉ាកធុនត្រា ពណ៌ខ្មៅ ពាក់ស្លាកលេខ ភ្នុំពេញ 2N-7778 បើកបរដោយឈ្មោះ ហម ច័ន្ទតារា ហៅតី ភេទប្រុស អាយុ៣០ឆ្នាំ មុខរបរបុគ្គលិកធនាគារអេស៊ីលីដា ស្នាក់នៅផ្ទះលេខ១៨៩ ភូមិរំចេក សង្កាត់រតនៈ ក្រុងបាត់ដំបង ធ្វើដំណើរបញ្ច្រាសទិសគ្នា ហើយបានបុកចំពីមុខពេញទំហឹង បណ្តាលឲ្យអ្នកជិះម៉ូតូស្លាប់ភ្លាមនៅកន្លែងកើតហេតុ ហើយរថយន្តបង្កបានព្យាយាមបើករត់រហូតដល់មុខផ្សារចោមចៅ តាមបណ្តោយផ្លូវវេងស្រេង ក៏ត្រូវសមត្ថកិច្ចឃាត់បានភ្លាមៗរួមទាំងតែកុងរថយន្តយកទៅប៉ុស្តិ៍ចោមចៅ។ក្រោយមកសមត្ថកិច្ចបានចុះទៅដល់ចំណុចកើតហេតុនិងឆែកឆេរ រកឃើញទូរសព្ទមួយគ្រឿងទើបធ្វើការឆែករកលេខដើម្បីទំនាក់ទំនងទៅកាន់ក្រុមគ្រួសារហើយបានចូលទៅលេខមិត្តភក្តិម្នាក់ឈ្មោះ មិន ចន្តា ភេទប្រុស ដែលធ្វើការជាមួយគ្នា ស្នាក់ភ្នំពេញថ្មី ខណ្ឌសែនសុខ។

សាក្សីដដែលបានបន្តថា បន្ទាប់ពីទូរសព្ទប្រាប់ពីដំណើររឿងសព្វគ្រប់ហើយឈ្មោះ មិន ចន្តា បានជិះម៉ូតូមួយគ្រឿងម៉ាកឌ្រីមសង់ ស៊េរីឆ្នាំ២០១១ ពណ៌ខ្មៅ ពាក់ស្លាកលេខ កំពង់ចាម 1F-9988 ចេញពីខណ្ឌសែនសុខឌុបគ្នាជាមួយនិងឈ្មោះ សុង វិរៈ ភេទប្រុស អាយុ២៧ឆ្នាំ ដើម្បីមកមើលមិត្តភក្តិដែលត្រូវថយន្តធុនត្រាបុកស្លាប់ខាងលើ។ ខណៈមកជិតដល់ចំណុចកើតហេតុទៅហើយ ខ្វះតែចម្ងាយប្រហែល២០០ម៉ែត្រទៀតទៅដល់ស្រាប់តែមានរថយន្តកុងតឺន័រ របស់ផែស្ងួត ហុង ឡេងហួរ បើកមកពីក្រោយ ហើយបត់ស្តាំបណ្តាលឲ្យកៀរនិងកិនម៉ូតូជនរងគ្រោះបណ្តាលឲ្យឈ្មោះ មិន ចន្តា ដួលខ្ទាតទៅលើដងផ្លូវត្រូវរថយន្តបង្កកិនបែកក្បាលស្លាប់ភ្លាមនៅកន្លែងកើតហេតុ ចំណែកឈ្មោះ សុង វិរៈ រងរបួសបាក់ជើងម្ខាង។

សាក្សីដដែលបានបន្តទៀតថា បន្ទាប់ពីកិនម៉ូតូជនរងគ្រោះរួចហើយនោះ រថយន្តបង្កបានបើកគេចខ្លួនរហូតទៅដល់ផែស្ងួត ដែលនៅជិតទីនោះចម្ងាយប្រហែល៣០០ម៉ែត្រ ចូលក្នុងផែ ហើយចតរថយន្តទុកចោលចំណែកតៃកុងចុះគេចខ្លួនបាត់។

ក្រោយមកទើបកម្លាំងសមត្ថកិច្ចបានចុះមកដល់ចំណុចកើតហេតុនិងទំនាក់ទំនងហៅជំនាញមកស្ទួច រថយន្តរួមទាំងម៉ូតូយកទៅរក្សាទុកនៅការិយាល័យចរាចរណ៍ជើងគោករាជធានីរង់ចាំដោះស្រាយពេលក្រោយ ចំណែកសពជនរងគ្រោះត្រូវបានសមត្ថកិច្ចប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍

គ្រោះថ្នាក់ចរាចរណ៍

ចែកចាយបន្ត