ខឹងមិត្តភក្តិ...

ខឹងមិត្តភក្តិយកម៉ូតូខ្លួនទៅបញ្ចាំលេងល្បែង ជ្រុលដៃវាយជើង ក្លាយជាអ្នកទោស

ចែកចាយបន្ត

ភ្នំពេញៈ បុរសម្នាក់ក្លាយជាជនជាប់ចោទប្រើអំពើហិង្សា បង្កឲ្យមានរបួសស្នាម បន្ទាប់ពីផ្ទុះកំហឹងខឹងមិត្តភក្តិដែលបានយកម៉ូតូរបស់ខ្លួនទៅបញ្ចាំយកលុយលេងល្បែង កាលពីយប់ថ្ងៃទី១៩ ខែវិច្ឆិកា ឆ្នាំ២០១៦កន្លងមកនៅភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ រហូតមកដល់ព្រឹកថ្ងៃទី២១ បែជាមិត្តភក្តិប្តឹងប៉ូលិសចាប់ខ្លួនទៅវិញ ។

បុរសជាប់ចោទឈ្មោះ បេង ភារម្យ អាយុ៣១ឆ្នាំ មុខរបរកសិករ រស់នៅភូមិពោធិដុះ ឃុំបាគូរ ស្រុកកណ្តាលស្ទឹង ខេត្តកណ្តាល។ ចំណែកមិត្តភក្តិជាដើមបណ្តឹងមានឈ្មោះ ហេង គឿន ភេទប្រុស អាយុ២៨ឆ្នាំ មុខរបរកម្មករសំណង់ ស្នាក់នៅផ្ទះជួលភូមិជម្ពូវ័ន្ត សង្កាត់ចោមចៅ មានស្រុកកំណើត ភូមិ-ឃុំ ជាមួយគ្នា ហើយត្រូវជាមិត្តភក្តិនិងគ្នាទៀត ចិត្តមួយថ្លើមមួយ។

តាមសម្តីជនជាប់ចោទ បានឲ្យដឹងថា កាលពីវេលាម៉ោង៨យប់ថ្ងៃទី១៩ ខែវិច្ឆិកា កន្លងមក ខ្លួនបានជិះម៉ូតូមកលេងផ្ទះជួលរបស់មិត្តភក្តិនៅភូមិជម្ពូវ័ន្ត ហើយក្រោយពីបានជួបគ្នាហើយ ឈ្មោះ ហេង គឿន បានខ្ចីម៉ូតូម៉ាកគុបជ្រុង ជិះមួយភ្លេត តែបែជាទៅបាត់រហូត ដល់វេលាម៉ោង១០យប់ថ្ងៃដដែល ដើររកឃើញមិត្តភក្តិនៅមុខវត្តជម្ពូវ័ន្ត សាកសួររឿងម៉ូតូ ហេង គឿន បានប្រាប់ថា យកទៅបញ្ចាំនៅឃ្លាំងរំសេវបាត់ហើយ បានលុយ៥០ដុល្លារ លេងហ្គេមបាញ់ត្រីអស់លុយហើយ ខឹងខ្លាំងពេក ទ្រាំមិនបាន រើសបានឈើជ្រុង វាយជើងស្តាំបណ្តាលឲ្យរបួសមុតចេញឈាម ហើយចាកចេញបាត់ ។

តាមនគរបាលបានឲ្យដឹងថា ក្រោយពី ម្ចាស់ម៉ូតូ វាយមិត្តភក្តិហើយគេចខ្លួន រហូតដល់វេលាម៉ោង៨និង៣០នាទី ព្រឹកថ្ងៃទី២១ ខែវិច្ឆិកា នេះបន្ទាប់ពីប្រទះឃើញចុងចោទ នៅត្រង់វង្វង់មូលចោមចៅ ក៏ប្តឹងប៉ូលិសឃាត់ខ្លួន នាំទៅសាកសួរ និងចោទប្រកាន់ប្រើអំពើហិង្សា បង្កឲ្យមានរបួសស្នាមតែម្តងនៅប៉ុស្តិ៍ចោមចៅ។

ជនចាប់ចោទនិងដើមចោទ ទោះត្រូវជាមិត្តភក្តិនឹងគ្នា ក្រោយពីជួបបញ្ហា និយាយត្រូវរ៉ូវគ្នាក៏ដោយនៅប៉ុស្តិ៍រដ្ឋបាលក៏ដោយ ក៏ផ្នែកជំនាញអធិការដ្ឋានខណ្ឌពោធិ៍សែនជ័យ ទាមទារឲ្យបញ្ជូនជនជាប់ចោទទៅផ្នែកជំនាញ ៕

ចែកចាយបន្ត