Post News Media ព័ត៌មានជាតិ តុលាការសម្រេច...

តុលាការសម្រេចបញ្ជូនយុវជន ដែលជេរប្រមាថលោកឧត្តមសេនីយ៍ឯក នន្ទ សុខា ទៅមណ្ឌលបន្សាបគ្រឿងញៀនញៀនឱកាសខ្ញុំ

ចែកចាយបន្ត

ភ្នំពេញ: លោក កែវ សុជាតិ តំណាងអយ្យការអមសាលាដំបូងរាជធានីភ្នំពេញបានបញ្ជាក់តាមទូរសព្ទនៅរសៀលថ្ងៃទី២២ ខែវិច្ឆិកា ឆ្នាំ២០១៦នេះថា ក្រោយពីសមត្ថកិច្ចជំនាញ ពិនិត្យទឹកនោមយុវជនឈ្មោះ ចាន់ សោភា រកឃើញមានផ្ទុកសារធាតុញៀន លោកក៏បានសម្រេចបញ្ជូនយុវជនរូបនេះទៅមណ្ឌលអប់រំកែប្រែ និងបន្សាបគ្រឿងញៀនឱកាសខ្ញុំ ដើម្បីផ្តល់ឱកាសឱ្យយុវជនជនរូបនេះទទួលបានការព្យាបាល និងទទួលបានការស្ដារនីតិសម្បទាឡើងវិញ។

លោកតំណាងអយ្យការបានបន្ថែមថា ចំពោះករណី ដែលយុវជនឈ្មោះ ចាន់ សោភា បានជេរប្រមាថ លើលោកឧត្តមសេនីយ៍ឯក នន្ទ សុខា មេបញ្ជាការរង អាវុធហត្ថលើផ្ទៃប្រទេស កាលពីយប់ថ្ងៃទី១៨ ខែវិច្ឆិកា ឆ្នាំ២០១៦ កន្លងទៅនោះ ខាងស្ថាប័នអយ្យការនឹងពិភាក្សាគ្នា ដើម្បីសម្រេចចេញដីកាបញ្ជូនសំណុំរឿងទៅជម្រះផ្ទាល់នៅពេលខាងមុខនេះ។

ចំពោះកាលបរិច្ឆេទនៃសវនាការជម្រះផ្ទាល់នោះលោក កែវ សុជាតិ បានបញ្ជសក់ថា ខាងតុលាការនៅមិនទាន់បានកំណត់ជាក់លាក់នៅឡើយទេ ដោយរង់ចាំកំណត់នាពេលក្រោយ។

តំណាងអយ្យការដដែលបានថ្លែងថា សំណុំរឿងរបស់យុវជនឈ្មោះ ចាន់ សោភា នេះ គឺអយ្យការមិនបានរកឃើញបទល្មើសពាក់ព័ន្ធករណីគ្រោះថ្នាក់ចរាចរណ៍នោះទេ។

សូមបញ្ជក់ថា ក្រោយពីមានឃាត់ខ្លួនកូនប្រុសសំណប់ចិត្តឈ្មោះ ចាន់ សោភា អាយុ២៣ឆ្នាំ ជាសិស្សយោធា ពាក់ព័ន្ធ នឹងរឿងជម្លោះជាមួយឧត្តមសេនីយ៍ឯក នន្ទ សុខា លោកវេជ្ជបណ្ឌិត ជាឪពុកជនសង្ស័យបានបង្ហោះសារជាវីដេអូឃ្លិបគំរាមសម្លាប់ខ្លួនផងដែរ ប្រសិនបើមិនមានការអនុគ្រោះដល់កូនរបស់គាត់។

គួររំលឹកថា មានករណីគ្រោះថ្នាក់ចរាចរណ៍មួយបានកើតឡើងកាលពីយប់ថ្ងៃទី១៨ ខែវិច្ឆិកា ឆ្នាំ២០១៦កន្លងទៅ នៅម្តុំផ្សារថ្មី ខណ្ឌដូនពេញ រវាងរថយន្តយុវជនកូនប្រុសលោក វេជ្ជបណ្ឌិត និងរថយន្តរបស់ឧត្តមសេនីយ៍ឯក នន្ទ សុខា មេបញ្ជាការរង អាវុធហត្ថលើផ្ទៃប្រទេស។ ក្រោយកើតហេតុគ្រោះថ្នាក់ចរាចរណ៍ ភាគីយុវជនបង្កដែលមានអាការ:ស្រវឹងស្រាខ្លាំងបានប្រើពាក្យពេចន៍អសុរសមួយចំនួនមកលើលោកឧត្តមសេនីយ៍ឯក នន្ទ សុខា ទើបនាំឱ្យមានការឃាត់ខ្លួន និងកសាងសំណុំរឿងមកតុលាការតែម្តង៕