នាយករដ្ឋមន្ត្...

នាយករដ្ឋមន្ត្រីវៀតណាមអំពាវនាវឱ្យប្រទេស G7 ផ្តល់ជំនួយដើម្បីទប់ទល់បម្រែបម្រួលអាកាសធាតុ

ចែកចាយបន្ត

វៀតណាម: លោកនាយករដ្ឋមន្រ្តីវៀតណាម Nguyen Xuan Phuc បានអំពាវនាវឲ្យបណ្តាប្រទេស G7 និងអង្គការពហុភាគីទាំងអស់ បន្តជួយដល់ប្រទេសនេះនិងប្រទេសមួយចំនួនទៀតដែលនៅជាប់ទន្លេមេគង្គក្នុងការគ្រប់គ្រងនិងការការពារធនធានទឹកនិងការកែលម្អសមត្ថភាពរបស់ខ្លួន ក្នុងការសម្របខ្លួនទៅនឹងការផ្លាស់ប្តូរអាកាសធាតុ នាពេលបច្ចុប្បន្ននេះ។

យោងតាមគេហទំព័របរទេសបានចេញផ្សាយនៅថ្ងៃទី២៨ ឧសភានេះ បានឲ្យដឹងថា មេដឹកនាំរបស់វៀតណាមបានធ្វើការអំពាវនាវបែបនេះ ខណៈពេលដែលកិច្ចប្រជុំកំពូល G7 ដែលបានបញ្ចប់កិច្ចប្រជុំរបស់ខ្លួនកាលពីថ្ងៃសុក្រម្សិលមិញ ស្ថិតនៅក្នុងកោះ Ise-Shima ខេត្ត Mie prefecture របស់ជប៉ុន។

លោកបានរំលឹកឡើងវិញអំពីការប្តេជ្ញាចិត្តរបស់វៀតណាមចំពោះការសំរេចបានកិច្ចព្រមព្រៀងប៉ារីស ដែលត្រូវបានឈានដល់នៅឯសន្និសីទលើកទី២១ នៃភាគីក្នុងអនុសញ្ញាក្របខ័ណ្ឌអង្គការសហប្រជាជាតិស្តីពីការប្រែប្រួលអាកាសធាតុ។

វៀតណាមបានកោតសរសើរភាពជាដៃគូសម្រាប់ហេដ្ឋារចនាសម្ព័ន្ធ ដែលមានគុណភាពនៅក្នុងតំបន់អាស៊ី ដែលបានចាប់ផ្តើមដោយប្រទេសជប៉ុន និងបានស្វាគមន៍ចំពោះការគាំទ្រដែលផ្តល់ដោយប្រទេសជាសមាជិក G7 ផ្សេងទៀត រួមទាំងអាមេរិកនិងមិត្តភក្តិនៃតំបន់មេគង្គក្រោម ចំពោះការអភិវឌ្ឍប្រកបដោយនិរន្តរភាព នៅតាមអាងទន្លេមេគង្គតាមរយៈការផ្តួចផ្តើមថ្មីនៅលើកម្មវិធីហេដ្ឋារចនាសម្ព័ន្ធនិរន្តរភាព។

សូមបញ្ជាក់ថា កិច្ចប្រជុំកំពូលប្រទេស G7 ត្រូវបានបញ្ចប់ទៅប្រកបដោយជោគជ័យនៅប្រទេសជប៉ុន កាលពីថ្ងៃសុក្រ ទី២៧ ឧសភា ម្សិលមិញ។ ហើយកិច្ចប្រជុំកំពូលនេះ ក៏បានផ្តោតទៅលើបញ្ហាសន្តិសុខពិភពលោក បញ្ហាការផ្តល់ជំនួយមនុស្សធម៌ និងបញ្ហាបម្រែបម្រួលអាកាសធាតុផងដែរ៕

G7