Post News Media ព័ត៌មានសេដ្ឋកិច្ច កម្ពុជា ចំណាយ...

កម្ពុជា ចំណាយលើការនាំចូលជ្រូក ប្រមាណ ៤០០លានដុល្លារ ក្នុងមួយឆ្នាំ

ចែកចាយបន្ត

ប្រទេសកម្ពុជា បានចំណាយលើការនាំចូលជ្រូក ប្រមាណជាង ៤០០លានដុល្លារអាមេរិកក្នុងមួយឆ្នាំ និងចំណាយប្រមាណ ២០០លានដុល្លារអាមេរិក នាំចូលបន្លែពីប្រទេសវៀតណាម និងចិន។ នេះបើយោងតាមការលើកឡើងរបស់លោកឧកញ៉ាបណ្ឌិត ម៉ុង ឫទ្ធី សហប្រធានក្រុមការងារផ្នែកកសិកម្ម កសិ-ឧស្សាហកម្ម។

ការនាំចូលដ៏ច្រើននេះ គឺបណ្តាលមកពីការផលិតក្នុងស្រុកមិនទាន់បានគ្រប់គ្រាន់ និងមិនទាន់អាចឆ្លើយតបទៅនឹងតម្រូវការក្នុងស្រុកនៅឡើយ ហើយការនាំចូលនេះ ក៏ធ្វើឲ្យប៉ះពាល់យ៉ាងធ្ងន់ធ្ងរដល់ការផលិតក្នុងស្រុកផងដែរ ដោយសារជ្រូកចិញ្ចឹមរបស់កសិករ អាចមានតម្លៃទាបជាងទីផ្សារ។

លោក បានបន្ថែមទៀត កម្ពុជា នាំចូលជ្រូកប្រមាណ ៤លានក្បាលក្នុងមួយឆ្នាំ ជាពិសេសនាំចូលមកពីប្រទេសថៃ និងវៀតណាម ដើម្បីបំពេញតម្រូវការក្នុងស្រុក តែនេះក៏បញ្ហាដែលគំរាមកំហែងដល់សុខភាព និងសេដ្ឋកិច្ចជាតិផងដែរ។

សព្វថ្ងៃនេះ កសិដ្ឋានចិញ្ចឹមជ្រូក ម៉ុង ឫទ្ធី បានផលិតពូជជ្រូកពិសេស ដែលមានគុណភាពល្អ និងដូចគ្នាជាមួយពូជជ្រូកនៅប្រទេសអង់គ្លេស ដែលមានតម្លៃប្រមាណ ៤ពាន់ដុល្លារអាមេរិក ខណ:ពូជជ្រូកនេះ លក់នៅស្រុកខ្មែរ ត្រឹមតែ ៣៨០ដុល្លារអាមេរិក ក្នុងមួយក្បាល។

យ៉ាងណាមិញ កាលពីពេលថ្មីៗនេះ ក្រុមហ៊ុនចិន ហ្វ័រវេដ បានបង្ហាញពីគម្រោងវិនិយោគលើវិស័យកសិកម្មនៅកម្ពុជា ដោយគ្រោងនឹងបង្កើតស្ថានីយចិញ្ចឹមជ្រូក នៅកម្ពុជាផងដែរ។

គួរបញ្ជាក់ដែរថា ការចិញ្ចឹមជ្រូកក្នុងស្រុក ផ្តល់ផលប្រយោជន៍ដល់អ្នកចិញ្ចឹម និងអ្នកផលិតចំណីសត្វ ព្រមទាំងជួយផ្តល់ការងារដល់ប្រជាពលរដ្ឋខ្មែរទៀតផង៕

13920206_1177732678931601_8575186903279299597_o