ក្រុមហ៊ុន Marselisborg ក្នុងរដ្ឋ Aarhus នៃប្រទេសដាណឺម៉ាក ទទួលបានជោគជ័យលើបច្ចេកវិទ្យាចម្រាញ់ទឹកស្អាតសម្រាប់ផឹក និងថាមពលអគ្គិសនី ចេញពីទឹកលូ និងទឹកសំរាមដែលបន្សល់ដោយប្រជាពលរដ្ឋ។ នេះបើយោងតាមសារព័ត៌មានអន្តរជាតិ NS ចេញផ្សាយកាលពីពេលថ្មីៗនេះ។

បច្ចុប្បន្ន ក្រុមហ៊ុន អាចផលិតអគ្គិសនីបានរហូតដល់ទៅ ១៥០ភាគរយនៃតម្រូវការក្នុងក្រុមហ៊ុន ហើយថាមពលដែលលើស គឺត្រូវបានប្រើសម្រាប់ចែកចាយទឹកស្អាតដល់ប្រជាជន ២សែននាក់ ទៅទូទាំងទីក្រុង នឹងសល់ខ្លះទៀត អាចលក់ឲ្យក្រុមហ៊ុនតូចៗក្នុងស្រុកបានផងដែរ។

ថាមពលអគ្គិសនី ដែលចម្រាញ់ចេញពីទឹកលូ និងទឹកសំរាម គឺភាគច្រើនផលិតចេញពីចំហេះនៃជីវឧស្ម័នមេតាន ហើយក្រុមហ៊ុនមិនបានបន្ថែម សារធាតុសរីរាង្គទៀតនោះទេ។

បើទោះបីជាបច្ចេកវិទ្យានេះទទួលបានជោគជ័យ វាមិនងាយនឹងចម្លងតាមនោះទេ ព្រោះវាទាមទារទាំងបទពិសោធន៍ និងលទ្ធភាព ហើយបើចំណាយទុនកាន់តែច្រើន នោះតម្លៃអគ្គិសនី និងទឹកក៏កាន់តែថ្លៃ៕