នៅស្ថានទូតអាមេរិក នឹងមានរៀបចំពិព័រណ៍វណ្ណ ម៉ូលីវណ្ណ ដែលនឹងតាំងបង្ហាញពីស្នាដៃរបស់បិតាស្ថាបត្យករកម្ពុជា វណ្ណ ម៉ូលីវណ្ណ ដោយបើកជូនសាធារណជនទស្សនា ចាប់ពីថ្ងៃច័ន្ទ ទី ៩ ខែមករា នេះទៅ។ នេះបើយោងតាមការឲ្យដឹងនៅថ្ងៃនេះពី គេហទំព័រស្ថានទូតអាមេរិកប្រចាំនៅកម្ពុជា។

លោកអ្នកអាចចូលទស្សនាពិព័រណ៍នេះ បានតាមរយៈការណាត់ ដោយផ្ញើអ៊ីម៉ែលទៅកាន់ [email protected] ហើយទស្សនាជាក្រុម កំរិតត្រឹមមនុស្សចំនួន ១០នាក់។

ការតាំងពិព័រណ៍ ដែលមានរូបថត និងគំរូរូបសំណាកផងនេះ ត្រូវបានចងក្រងដោយគម្រោងវណ្ណ ម៉ូលីវណ្ណ នឹងត្រូវដាក់តាំងក្នុងរយៈពេល ១ឆ្នាំ នៅស្ថានទូតអាមេរិក។

លោកស្រី Delphine ត្រូវជាកូនស្រីរបស់លោកតា វណ្ណ ម៉ូលីវណ្ណ ក៏សង្ឃឹមដែរថា ការតាំងពិព័រណ៍នេះ នឹងជួយជម្រុញទឹកចិត្តដល់ស្ថាបត្យករជំនាន់ក្រោយ ហើយនេះជាអ្វីដែលសំខាន់បំផុត សម្រាប់ឪពុកលោកស្រី។

គួររម្លឹកដែរថា ស្នាដៃសំខាន់ៗ ដែលមានភាពល្បីរន្ទឺរបស់លោកតា រួមមាន វិមានឯករាជ្យ សាលសន្និសីទចតុមុខ អគារគណៈរដ្ឋមន្រ្តី មហោស្រព្យជាតិកម្ពុជា និងស្តាតអូឡាំពិកជាដើម៕