ក្រសួងពាណិជ្ជកម្ម នឹងដាក់ដំណើរការមជ្ឈមណ្ឌលពាណិជ្ជកម្ម នៅខេត្តសានស៊ី ប្រទេសចិន ដើម្បីជម្រុញទំហំពាណិជ្ជកម្មប្រទេសទាំងពីរ ឲ្យបាន ៥ពាន់លានដុល្លារអាមេរិក​ នៅក្នុងឆ្នាំ ២០១៧នេះ។ នេះបើយោងតាមការចេញផ្សាយនៅថ្ងៃនេះរបស់ ក្រសួងពាណិជ្ជកម្ម។

មជ្ឈមណ្ឌលនេះ នឹងជួយជម្រុញការនាំចេញផលិតផលកម្ពុជាកាន់តែច្រើន ក៏ដូចជាការទាក់ទាញវិនិយោគិន និងភ្ញៀវទេសចរចិន ទៅទស្សនាប្រទេសកម្ពុជាផងដែរ។

លោក ប៉ាន សូរស័ក្តី រដ្ឋមន្រ្តីក្រសួងពាណិជ្ជកម្ម បានថ្លែងអំណរគុណដល់លោក HU Heping អភិបាលខេត្តសានស៊ី ដែលបានជួយគាំទ្រដល់ការបើកដំណើរការមជ្ឈមណ្ឌលពាណិជ្ជកម្មរបស់កម្ពុជា នៅប្រទេសចិនផងដែរ។

កាលពីពេលថ្មីៗកន្លងទៅនេះ កម្ពុជា បានបើកសម្ពោធមជ្ឈមណ្ឌលពាណិជ្ជកម្មថ្មីមួយទៀត នៅទីក្រុងហៃនីង សាធារណរដ្ឋប្រជាមានិតចិន ដើម្បីជម្រុញការនាំចេញផលិតផលខ្មែរ ស្វែងរកទីផ្សារនៅក្រៅប្រទេស និងផ្សព្វផ្សាយវប្បធម៌ខ្មែរ។

លោក ឈួន ដារ៉ា រដ្ឋលេខាធិការក្រសួងពាណិជ្ជកម្ម បានចូលរួមសម្ពោធដាក់ឲ្យដំណើរការជាផ្លូវការនូវ មជ្ឈមណ្ឌលពាណិជ្ជកម្មថ្មីមួយទៀត ក្នុងផ្សារទំនើប China Import Food Mall នាទីក្រុងហៃនីង ខេត្តជឺជាំង។

គួរជម្រាបផងដែរថា ទំហំពាណិជ្ជកម្មទេ្វភាគីរវាងកម្ពុជា និងចិន នៅក្នុងឆ្នាំ ២០១៥ មានទឹកប្រាក់ប្រមាណ ៤.៤ពាន់លានដុល្លារអាមេរិក៕