Post News Media ព័ត៌មានសេដ្ឋកិច្ច ស៊ីអេច ចាប់អា...

ស៊ីអេច ចាប់អារម្មណ៍បង្កើត រោងចក្រកែច្នៃសំរាម ទៅជាថាមពលអគ្គិសនី នៅភ្នំពេញ

ចែកចាយបន្ត

ក្រុមហ៊ុន ស៊ីអេច គឹមហ៊ាងអភិវឌ្ឍន៍ (ខេមបូឌា) ចាប់អារម្មណ៍លើ គម្រោងវិនិយោគសាងសង់រោងចក្រកែច្នៃសំរាម ទៅជាថាមពលអគ្គិសនី នៅរាជធានីភ្នំពេញ។ នេះបើយោងតាមការឲ្យដឹងពីគេហទំព័រ រដ្ឋបាលរាជធានីភ្នំពេញ។

លោក អៀង អូននី អភិបាលរងនៃគណ:អភិបាលរាជធានីភ្នំពេញ រួមជាមួយមន្ទីរជំនាញនានា ក៏បានប្រជុំពិភាក្សាស្តីពីគម្រោងស្នើសុំនេះ ដែលជាលទ្ធផល លោក អៀង អូននី បានឯកភាពឲ្យក្រុមហ៊ុន ធ្វើការសិក្សាលម្អិត នៅទីលានចាក់សំរាម ទាំងផ្នែកបច្ចេកទេស ទីតាំង ទាំងបរិមាណសំរាម ទាំងទុនវិនិយោគ។

បច្ចុប្បន្ន នៅរាជធានីភ្នំពេញ មានសំរាមប្រមាណជិត ២ពាន់តោន ក្នុង១ថ្ងៃ ដែលត្រូវបានប្រមូលទៅចាក់ទុក នៅតាមទីលានចាក់សំរាមផ្សេងៗ។

សាលារាជធានីភ្នំពេញ បាននិងកំពុងរកវិធីសាស្រ្ត ក្នុងការគ្រប់គ្រង ប្រមូល និងរកដៃគូសហការក្នុងការកែច្នៃសំរាម ដើម្បីកាត់បន្ថយបរិមាណសំរាមដែលកើនឡើងដូចសព្វថ្ងៃ និងធ្វើឲ្យបរិស្ថានក្នុងទីក្រុង មានសោភ័ណភាពល្អប្រសើរ។

កាលពីខែធ្នូ ឆ្នាំ ២០១៦កន្លងទៅ វិនិយោគិនកម្ពុជា ក៏គ្រោងនឹងបង្កើតរោងចក្រកែច្នៃសំរាមដំបូងបង្អស់នៅកម្ពុជា ដែលគម្រោងនេះអាចនឹងធ្វើឡើងនៅក្នុងតំបន់ទីក្រុងបៃតង 7NG។ នេះបើយោងតាមការឲ្យដឹងពីលោកឧកញ៉ា ស្រី ចាន់ថន អគ្គនាយកក្រុមហ៊ុន Skyland។

លោកបានឲ្យដឹងដែរថា រោងចក្រកែច្នៃសំរាមនេះ នឹងជួយការពារកង្វក់បរិស្ថាន ដើម្បីធ្វើឲ្យទឹកដី Skyland ក្លាយជាទីក្រុងបៃតងស្រស់ស្អាត និងមានអនាម័យពិតប្រាកដ។

គួររម្លឹកផងដែរថា កាលពីខែ កក្កដា ឆ្នាំ ២០១៦ កន្លងទៅនេះ រាជរដ្ឋាភិបាលកម្ពុជា ក៏បាននាំយកម៉ាស៊ីនកែច្នៃសំរាម តម្លៃជាង ៥សែនដុល្លារអាមេរិក ដែលមានសមត្ថភាពកែច្នៃសំរាម បានពី ១០០តោនទៅ ១៥០តោនក្នុងមួយថ្ងៃ៕

ចែកចាយបន្ត