Post News Media ព័ត៌មានសេដ្ឋកិច្ច ត្រឹមតែ២០នាទី...

ត្រឹមតែ២០នាទី ក្រុមហ៊ុនឱសថខាតបង់ ២៤ពាន់លានដុល្លារ ដោយសារ Donald Trump

ចែកចាយបន្ត

កាលពីម្សិលមិញនេះ ប្រធានាធិបតីថ្មីរបស់សហរដ្ឋអាមេរិក Donald Trump បានធ្វើឲ្យក្រុមហ៊ុនផលិតឱសថធំៗចំនួន ៩ បានខាតបង់ប្រាក់ប្រមាណ ២៤ពាន់លានដុល្លារអាមេរិក ក្នុងរយ:ពេលត្រឹមតែ ២០នាទីប៉ុណ្ណោះ ក្នុងសន្និសីទសារព័ត៌មានរបស់លោក Donald Trump។ នេះបើយោងតាមសារព័ត៌មានអន្តរជាតិ Fortune។

ភាគហ៊ុនរបស់ក្រុមហ៊ុនឱសថចំនួន ៩​ បានធ្លាក់ចុះភ្លាមៗ បន្ទាប់ពីលោក Donald Trump បានលើកឡើងពីការកែប្រែគោលនយោបាយក្នុងស្រុក ទាក់ទងនឹងអត្រាពន្ធ និងការកំណត់តម្លៃឱសថ។

លោកបានមានប្រសាសន៍ថា «យើងត្រូវតែយកវិស័យឧស្សាហកម្មឱសថមកវិញ ពួកគេរត់ទៅឆ្វេង រត់ទៅស្តាំ ហើយផ្គត់ផ្គង់ឱសថរបស់យើង តែមិនបានផលិតនៅទីនេះ» ពោលគឺ តាមគោលនយោបាយថ្មីរបស់ Donald Trump អាចនឹងមានការកំណត់ថ្លៃឱសថ ក៏ដូចជាការតម្លើងពន្ធសម្រាប់ក្រុមហ៊ុនឱសថនៅក្រៅប្រទេស ដែលមានរោងចក្រនៅអឺរ៉ុប អាស៊ី និងអាហ្វ្រិកជាដើម។

ទីផ្សារដែលខាតបង់ច្រើនរួមមាន Jonhson and Jonhson, Pfizer, Merck, Amgen, AbbVie, Bristol-Myers Squibb, Gilead, Celgene, and Eli Lilly ដែលខាតបង់ប្រមាណ ៣ភាគរយ នៃទ្រព្យសរុបទាំងអស់ ៩០៦ពាន់លានដុល្លារអាមេរិក។

យ៉ាងណាមិញ ក្រុមហ៊ុនក្នុងស្រុកមួយចំនួន ក៏មានអារម្មណ៍ធូរស្បើយ ក្រោយ Donald Trump ឈ្នះឆ្នោត ហើយរំពឹងថា នឹងតែលូតលាស់ដោយវិជ្ជមានបន្តទៅមុខទៀត៕