កាលពីឆ្នាំ ២០១៦ ការអភិវឌ្ឍន៍ប្រភពអគ្គិសនីនៅកម្ពុជា មានការកើនឡើងប្រមាណ ១៩.៧៩ភាគរយ ខណៈការនាំចូលអគ្គិសនីពីប្រទេសជិតខាង មានការថយចុះពី ២៥.៧ភាគរយ មកត្រឹមតែ ២២ភាគរយ។ នេះបើយោងតាមការឲ្យដឹងពី គេហទំព័រអាជ្ញាធរអគ្គិសនីកម្ពុជា ចេញផ្សាយនៅថ្ងៃនេះ។
ប្រភពអគ្គិសនី ដែលផ្គត់ផ្គង់ជាចំបងឲ្យកម្ពុជា គឺប្រភពដុតធ្យូងថ្ម ៣៥ភាគរយ និងប្រភពវារីអគ្គិសនី ៣៦ភាគរយ ខណៈប្រភពនំាចូលសរុប ២២ភាគរយ។
ការប្រើប្រាស់អគ្គិសនីក្នុងអត្រាថ្លៃក្រោម ឬស្មើ ៨០០៛ គឺមានរហូតដល់ទៅ ៩៦.៨៤% នឹងត្រូវបានរំពឹងថា នឹងចុះជាងនេះ ក្នុងឆ្នាំ ២០១៧នេះ។
តម្លៃអគ្គិសនីចុះថ្លៃ គឺដោយសារ ការគៀងគររកដៃគូវិនិយោគលើវិស័យអគ្គិសនី ដែលមកទល់ពេលនេះ រដ្ឋាភិបាលបានសម្រេចអនុម័តលើ ៩គម្រោងក្នុងវិស័យអគ្គិសនី ដែលក្នុងនោះមាន រោងចក្រដើរដោយធ្យូងថ្មចំនួន ២គម្រោង និងរោងចក្រដើរដោយវារីអគ្គិសនីចំនួន ៧គម្រោង។
បច្ចុប្បន្ន ប្រជាពលរដ្ឋប្រមាណ ៧០ភាគរយទទួលបានអគ្គិសនីប្រើប្រាស់ ហើយរាជរដ្ឋាភិបាលគ្រោងនឹងសម្រេចឲ្យបាន ១០០ភាគរយ នៅត្រឹមឆ្នាំ ២០២០។
គួរបញ្ជាក់ដែរថា ក្នុងឆ្នាំនេះ អាជ្ញាធរអគ្គិសនីកម្ពុជា ក៏គ្រោងនឹងដាក់ឲ្យដំណើរការរោងចក្រធ្យូងថ្ម ទំហំ ១៣៥មេហ្កាវ៉ាត់ ដើម្បីទប់ទល់នឹងកំណើនសេចក្តីត្រូវការ ក៏ដូចជាកាត់បន្ថយការនាំចូលពីប្រទេសជិតខាង៕
