Post News Media ព័ត៌មានសេដ្ឋកិច្ច ពិព័រណ៍ផលិតផល...

ពិព័រណ៍ផលិតផលកសិកម្មអន្តរជាតិដំបូងបង្អស់នៅកម្ពុជា គ្រោងធ្វើឡើងនៅខែ មិថុនាខាងមុខនេះ

ចែកចាយបន្ត

ក្រុមហ៊ុនចិន Santhai Import Export គ្រោងនឹងរៀបចំពិព័រណ៍ផលិតផលកសិកម្មអន្តរជាតិ លើកដំបូង ឆ្នាំ ២០១៧ នៅកម្ពុជា ដែលនឹងប្រព្រឹត្តទៅ ចាប់ពីថ្ងៃទី ២៥ ដល់ ២៨ ខែមិថុនា ឆ្នាំ ២០១៧ខាងមុខនេះ។ នេះបើយោងតាមការឲ្យដឹងពី គេហទំព័រក្រសួងកសិកម្ម រុក្ខាប្រមាញ់ និងនេសាទ។

ពិព័រណ៌អន្តរជាតិនេះ នឹងមានការចូលរួមពីក្រុមហ៊ុនចិនចំនួន ៥០០ក្រុមហ៊ុន និងតំណាងក្រុមហ៊ុនចំនួន ៣០៤ក្រុមហ៊ុនមកពី បណ្តាប្រទេសក្នុងតំបន់អាស៊ាន ព្រមទាំង អ្នកវិនិយោគទុនក្នុងស្រុក និងថ្នាក់ដឹកនាំសំខាន់ៗផងដែរ។

ក្រសួងកសិកម្ម ស្វាគមន៍ចំពោះព្រឹត្តិការណ៍ ដែលស្របតាមផែនការជម្រុញ វិស័យឯកជនឲ្យសហការជាមួយក្រសួង និងសហគមន៍ ដើម្បីទាក់ទាញអ្នកវិនិយោគទុន ដែលប្រាកដប្រជា និងចូលរួមគាំទ្រដល់ ការអភិវឌ្ឍន៍ជាតិ។

លោក វេង សាខុន រដ្ឋមន្ត្រីក្រសួងកសិកម្ម ក៏បានស្នើដល់ក្រុមហ៊ុនវិនិយោគទាំងអស់ ចូលរួមគិតនូវមធ្យោបាយក្នុងការដោះស្រាយនូវបញ្ហាប្រឈមដូចជា ការប្រើប្រាស់ថាមពលពន្លឺព្រះអាទិត្យ នៅក្នុងឧស្សាហកម្មកសិកម្ម ពង្រីកទំហំការដឹកជញ្ជូនទាំងផ្លូវទឹក និងផ្លូវអាកាស ដើម្បីបញ្ជូនទៅដល់គោលដៅចុងក្រោយ ជាមួយតម្លៃអាចប្រកួតប្រជែងនៅលើទីផ្សារអន្តរជាតិបាន។

គួររម្លឹកដែរថា ពិព័រណ៍ពាណិជ្ជកម្មផលិតផលខ្មែរ នឹងប្រារព្ធធ្វើឡើងក្នុងព្រឹត្តិការណ៍អង្គរសង្រ្កាន្ត នៅថ្ងៃទី ១៤ ដល់ ១៦ ខែមេសាខាងមុខនេះ នៅក្រុងសៀមរាប ខេត្តសៀមរាប គឺដើម្បីចូលរួមអបអរសាទរ ពិធីបុណ្យចូលឆ្នាំថ្មីប្រពៃណីខ្មែរ និងជាឱកាស សម្រាប់យុវជន និងប្រជាពលរដ្ឋកម្ពុជា បានជួបជុំគ្នា ក្នុងនាមជាមហាគ្រួសារខ្មែរតែមួយ៕

ចែកចាយបន្ត